.jpg)
ភ្នំពេញៈ ទំនាក់ទំនងពាណិជ្ជកម្ម និងកិច្ចសហប្រតិបត្តិការអាជីវកម្ម និងវិនិយោគរវាងប្រទេសកម្ពុជា និងហ្វីលីពីន ត្រូវរំពឹងថា នឹងមានភាពរីកចម្រើនជាងមុន បន្ទាប់ពីវិស័យឯកជននៃប្រទេសទាំង ២ បានឈានដល់ការចុះអនុស្សរណៈនៃការយោគយល់គ្នា (MoU)។
អនុស្សរណៈនៃការយោគយល់គ្នានេះ ត្រូវបានធ្វើឡើងរវាងប្រធានសភាពាណិជ្ជកម្មកម្ពុជា លោក គិត ម៉េង ជាមួយ លោក Amb. Benedicto V. Yujuico ប្រធានសភាពាណិជ្ជកម្ម និងឧស្សាហកម្មហ្វីលីពីន កាលពីថ្ងៃទី ២ ខែ ធ្នូ ឆ្នាំ ២០២១ តាមប្រព័ន្ធអនឡាញ។
ការចុះអនុស្សរណៈនៃការយោគយល់គ្នានេះ ប្រព្រឹត្តទៅក្នុងអំឡុងពេលនៃកិច្ចប្រជុំគណៈកម្មការចម្រុះស្តីពីកិច្ចសហប្រតិបត្តិការទ្វេភាគីកម្ពុជា-ហ្វីលីពីន លើកទី៣ ក្រោមអធិបតីភាព លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា និងលោក Honorable Teodoro L. Locsin Jr រដ្ឋមន្ត្រីក្រសួងការបរទេសនៃសាធារណរដ្ឋហ្វីលីពីន។
យោងតាមសេចក្តីប្រកាសព័ត៌មានរបស់សភាពាណិជ្ជកម្មកម្ពុជា MoU នេះធ្វើឡើងក្នុងគោលបំណងចូលរួមជំរុញ និងពង្រឹងកិច្ចសហប្រតិបត្តិការសេដ្ឋកិច្ច និងធុរកិច្ចរវាងកម្ពុជា និងសាធារណរដ្ឋហ្វីលីពីន ក្នុងវិស័យជាច្រើនដូចជា បច្ចេកវិទ្យាព័ត៌មាន និងនវានុវត្តន៍ កសិកម្ម កម្មន្តសាល អាជីវកម្មសិទ្ធិពិសេស ទេសចរណ៍ សេវាកម្ម និងការអភិវឌ្ឍសហគ្រាសធុនតូច និងមធ្យម។ សភាពាណិជ្ជកម្មនៃប្រទេសទាំង ២ ក៏បានសន្យានឹងចែករំលែកព័ត៌មានឱ្យគ្នាទៅវិញទៅមកជាទៀងទាត់ ក៏ដូចជារៀបចំបេសកកម្មធុរកិច្ច និងវិនិយោគ សិក្ខាសាលា សន្និសីទ ការតាំងពិព័រណ៍ និងជំនួបពាណិជ្ជកម្មជាដើម។
បន្ថែមពីលើនេះ ភាគីទាំង ២ ក៏បានឯកភាពគ្នាក្នុងការបង្កើតក្រុមប្រឹក្សាធុរកិច្ចហ្វីលីពីន-កម្ពុជា ដែលមានទីស្នាក់ការនៅសាធារណរដ្ឋហ្វីលីពីន និងក្រុមប្រឹក្សាធុរកិច្ចកម្ពុជា-ហ្វីលីពីន ដែលមានទីស្នាក់ការនៅកម្ពុជា ដើម្បីពិភាក្សារៀបចំផែនការវិនិយោគនៅពេលអនាគត៕
