ភ្នំពេញៈ ធនាគារនៃកម្ពុជា (NBC) បានប្រកាសដាក់ឱ្យដំណើរការជាផ្លូវការយុទ្ធនាការ “តោះ! និយាយពីលុយ៖ តក់ៗពេញបំពង់”Official Launch of “Let’s talk Money: Little by Little” Campaign ដែលយុទ្ធនាការនេះត្រូវបានរំពឹងថា នឹងជួយពង្រីកការយល់ដឹងផ្នែកហិរញ្ញវត្ថុដល់ប្រជាជន ក៏ដូចជាជួយកាត់បន្ថយការខ្ចីបំណុលមិនត្រឹមត្រូវ។
ការប្រកាសដាក់ចេញនូវយុទ្ធនាការនេះបានធ្វើឡើងក្នុងសិក្ខាសាលាផ្សព្វផ្សាយផ្ទាល់ និងតាមរយៈអនឡាញស្តីពី «ការអនុវត្តយុទ្ធសាស្ត្រជាតិស្តីពីបរិយាបន្នហិរញ្ញវត្ថុ ឆ្នាំ ២០១៩-២០២៥ និងការដាក់ឱ្យដំណើរការជាផ្លូវការយុទ្ធនាការ «តោះ! និយាយពីលុយ៖ តក់ៗពេញបំពង់» កាលពីថ្ងៃទី ៣ ខែធ្នូ ឆ្នាំ ២០២១។
ទេសាភិបាលរងធនាគារជាតិនៃកម្ពុជាលោកស្រី អ៊ុក ម៉ាលី បានលើកឡើងថា យុទ្ធនាការ“តោះ! និយាយពីលុយ៖ តក់ៗពេញបំពង់ គឺជាផ្នែកមួយនៃការអនុវត្តនូវយុទ្ធសាស្ត្រជាតិស្តីពីបរិយាបន្នហិរញ្ញវត្ថុឆ្នាំ ២០១៩-២០២៥ ដែលជាក្របខ័ណ្ឌនៃគោលនយោបាយជាតិ ដោយផ្តោតការយកចិត្តទុកដាក់លើការលើកកម្ពស់បរិយាបន្នហិរញ្ញវត្ថុនៅកម្ពុជា។ យុទ្ធនាការនេះ ក៏ជាឧបករណ៍សំខាន់មួយសម្រាប់គាំទ្រដល់ការអនុវត្តយុទ្ធសាស្ត្រអភិវឌ្ឍន៍វិស័យហិរញ្ញវត្ថុ ឆ្នាំ ២០១៦-២០២៥ ដែលសំដៅធានាស្ថិរភាពគោលនយោបាយម៉ាក្រូសេដ្ឋកិច្ច និងរក្សាកំណើនសេដ្ឋកិច្ចប្រកបដោយចីរភាព។ យុទ្ធសាស្ត្រជាតិនេះបានកំណត់ពីចក្ខុវិស័យ និងទិសដៅក្នុងការជំរុញបរិយាបន្នហិរញ្ញវត្ថុ បង្កើនលទ្ធភាពទទួលបានសេវាហិរញ្ញវត្ថុផ្លូវការដែលមានគុណភាព ទាន់ពេលវេលា តម្លៃសមរម្យ និងមានកិច្ចការពារស្របច្បាប់ ជាពិសេស កាត់បន្ថយអត្រាស្ត្រីដែលមិនទាន់ទទួលបានសេវាហិរញ្ញវត្ថុផ្លូវការ ដើម្បីធ្វើឱ្យប្រសើរឡើងនូវសុខុមាលភាពសង្គម បង្កើនប្រាក់ចំណូលដល់ប្រជាពលរដ្ឋ កាត់បន្ថយភាពក្រីក្រ និងចូលរួមចំណែកដល់ការអភិវឌ្ឍសង្គម-សេដ្ឋកិច្ចជារួម។
លោកស្រី អ៊ុក ម៉ាលី បាននិយាយថា៖ «ចំណេះដឹងផ្នែកហិរញ្ញវត្ថុត្រូវបានទទួលស្គាល់ថា ជាកាតាលីករដ៏សំខាន់ ដែលអាចជំរុញបរិយាប័ន្នហិរញ្ញវត្ថុ និងកាត់បន្ថយការខ្ចីបំណុលលើសលប់»។
យោងតាមលោកស្រី អ៊ុក ម៉ាលី យុទ្ធនាការនេះធ្វើឡើង បន្ទាប់ពីយុទ្ធនាការ “តោះ! និយាយពីលុយ” កាលពីឆ្នាំ ២០១៦។ យុទ្ធនាការ “តោះ! និយាយពីលុយ៖ តក់ៗពេញបំពង់” ត្រូវបានបង្កើតឡើង ដោយផ្តោតជាចម្បងលើសារៈសំខាន់នៃការគិតគូរឱ្យបានដិតដល់ ការថ្លឹងថ្លែងជម្រើសផលិតផល និងសេវាហិរញ្ញវត្ថុ និងការរៀបចំផែនការសកម្មភាព ដើម្បីជួយអ្នកប្រើប្រាស់ឱ្យទទួលបានការយល់ដឹងកាន់តែប្រសើរអំពីសិទ្ធិ ការទទួលខុសត្រូវ និងការចូលរួមក្នុងការសម្រេចចិត្តផ្នែកហិរញ្ញវត្ថុ។
លោក រ័ត្ន សុវណ្ណនរៈ អគ្គនាយកត្រួតពិនិត្យនៃធនាគារជាតិនៃកម្ពុជាបានលើកឡើងថា នៅពេលដែលមានការចូលរួមពីភាគីពាក់ព័ន្ធជាច្រើនក្នុងការលើកកម្ពស់ការយល់ដឹងផ្នែកហិរញ្ញវត្ថុ តាមរយៈការអប់រំផ្លូវការដល់សិស្ស និស្សិត និងសិក្ខាកាមជំនាញ យុទ្ធនាការ តោះ! និយាយពីលុយ នឹងចូលរួមចំណែកក្នុងការលើកកម្ពស់ការយល់ដឹងរបស់ប្រជាពលរដ្ឋទូទៅ ជាពិសេសប្រជាជននៅតាមតំបន់ជនបទ ដែលមានលទ្ធភាពប្រើប្រាស់សេវាហិរញ្ញវត្ថុផ្លូវការ ប៉ុន្តែទទួលបានព័ត៌មាននៅមានកម្រិត។
លោក Shane Nichols ប្រធានអង្គការ Good Return បាននិយាយថា អង្គការ Good Return ប្តេជ្ញាគាំទ្រគ្រួសារកម្ពុជាតាមរយៈកម្មវិធីលើកកម្ពស់ចំណេះដឹងផ្នែកហិរញ្ញវត្ថុ ជួយដល់អាជីវកម្មខ្នាតតូច និងគាំទ្រការអនុវត្តប្រកបដោយក្រមសីលធម៌នៅក្នុងវិស័យហិរញ្ញវត្ថុ។ លោកបានបញ្ជាក់ថា៖ «យើងខ្ញុំមានក្តីសោមនស្សរីករាយ ដែលបានសហការជាមួយធនាគារជាតិនៃកម្ពុជាក្នុងការបង្កើតយុទ្ធនាការ «តោះ! និយាយពីលុយ៖ តក់ៗពេញបំពង់» ដ៏មានសារៈសំខាន់នេះ»។
លោក Kaveh Zahedi អគ្គលេខាធិការរងអង្គការ UNESCAP បានលើកឡើងថា UNESCAP មានមោទនភាពដែលបានចូលរួមគាំទ្រយុទ្ធនាការ «តោះ! និយាយពីលុយ៖ តក់ៗពេញបំពង់» របស់ធនាគារជាតិនៃកម្ពុជា។ គំនិតផ្តួចផ្តើមនេះ ផ្សព្វផ្សាយយ៉ាងទូលំទូលាយនូវខ្សែវីដេអូខ្លី ដែលបង្កប់នូវសារយ៉ាងសំខាន់អំពីការទទួលខុសត្រូវផ្នែកហិរញ្ញវត្ថុ សមភាពយេនឌ័រ និងគំនិតសហគ្រិនភាព ដែលទាំងនេះ សុទ្ធសឹងជាកត្តាគន្លឹះក្នុងការសម្រេចបាននូវសេដ្ឋកិច្ចប្រកបដោយបរិយាបន្ន និងនិរន្តរភាព៕
វីដេអូ៖