.jpg)
លោកស្រី Kristalina Georgieva ប្រធានមូលនិធិរូបិយវត្ថុអន្តរជាតិ។ AFP
ទីក្រុងវ៉ាស៊ីនតោនៈ ប្រធានមូលនិធិរូបិយវត្ថុអន្តរជាតិ លោកស្រី Kristalina Georgieva បាននិយាយកាលពីថ្ងៃសុក្រថា វីរុសបំប្លែងថ្មី «អូមីកុ្រង» នៃកូវីដ ១៩ អាចពន្យឺតការងើបឡើងវិញសេដ្ឋកិច្ចសកល ដូចដែលវីរុសបំប្លែងដែលតា បានកើតឡើង។
លោកស្រីបាននិយាយថា៖«វីរុសបំប្លែងថ្មី ដែលប្រហែលរីករាលដាលលឿន អាចប៉ះពាល់ទំនុកចិត្ត និងស្មារតី យើងទំនងឃើញការធ្លាក់ចុះខ្លះនៃការព្យាករក្នុងខែតុលា សម្រាប់កំណើនសកល»។
លោកស្រី Georgieva បាននិយាយនៅក្នុងការព្យាករ សេដ្ឋកិច្ចសកលថ្មីៗនេះ ថា មូលនិធិបង្ហាញកំណើនសេដ្ឋកិច្ចពិភពលោកចំនួន ៥,៩ ភាគរយនៅឆ្នាំនេះ និង ៤,៩ ភាគរយនៅឆ្នាំ ២០២២ ប៉ុន្តែសហរដ្ឋអាមេរិក និងប្រទេសសេដ្ឋកិច្ចធំៗផ្សេងទៀត រងគ្រោះការកែប្រែធ្លាក់ចុះខ្លាំង បន្ទាប់ពីការរីករាលដាលវីរុសបំប្លែង ដែលតា បណ្តាលឱ្យតានតឹងមួយចំនួន។
ប្រធាន IMF និយាយថា៖ «សូម្បីនៅមុនការមកដល់នៃវីរុសបំប្លែង យើងព្រួយបារម្ភថា ការងើបឡើងវិញនៅតែបាត់បង់កម្លាំងជំរុញមួយចំនួន» ដោយបានកត់សម្គាល់ថា អ្នកធ្វើគោលនយោបាយពេលនេះកំពុងដោះស្រាយបញ្ហាថ្មីដូចជាអតិផរណា។
ការព្យាករថ្មីៗនេះរបស់ IMF បានបង្ហាញក្តីបារម្ភថាបញ្ហាការផ្គត់ផ្គង់សកល និងការចែកចាយវ៉ាក់សាំងមិនស្មើកំពុងពន្យឺតការងើបឡើងវិញនិងបណ្តាលឱ្យប្រទេសខ្លះត្រូវគេបោះបង់ចោល។
ការងើបឡើងនូវតម្រូវការក្នុងប្រទេសសេដ្ឋកិច្ចរីកចម្រើនមួយចំនួនប្រឈមជាមួយការខ្វះខាតនៃសមាភាគសំខាន់ៗដូចជាឧបករណ៍អេឡិចត្រូនិកពាក់កណ្តាលចម្លង បានរុញច្រានរលកតម្លៃហក់ឡើង។
មិនដល់២ខែផង លោកស្រី Georgieva បានបង្ហាញទំនុកចិត្តថា អតិផរណានឹងមិនក្លាយជា «រថភ្លើងរត់ចេញ» ប៉ុន្តែកាលពីថ្ងៃសុក្រ លោកស្រីបាននិយាយថាធនាគារកណ្តាលអាមេរិកនឹងត្រូវដំឡើងអត្រាការប្រាក់នៅឆ្នាំ២០២២ជាជាងនៅឆ្នាំ២០២៣ដូចដែល IMF បានព្យាករពីមុន។
ធនាគារកណ្តាលអាមេរិកដែលបានកាត់អត្រាប្រាក់កម្ចីដល់សូន្យនៅប៉ុន្មានថ្ងៃនៅពេលចាប់ផ្តើមរីករាលដាល បានចាប់ផ្តើមដកចេញវិធានការជំរុញសេដ្ឋកិច្ចនិងបានចង្អុលបង្ហាញវានឹងបង្កើនដំណើរការ ដែលនឹងធ្វើឱ្យខ្លួនមានជំហរដើម្បីដកចេញអត្រាការប្រាក់សូន្យនៅពាក់កណ្តាលឆ្នាំក្រោយ។
លោកស្រីបញ្ជាក់៖ «យើងពិតជាជឿថា មាគ៌ាចំពោះការដំឡើងអត្រាការប្រាក់គោលនយោបាយប្រហែលដំណើរការលឿនជាង»៕ AFP/RR
