.jpg)
កុងតឺន័រផ្ទុកទំនិញនាំចេញ-នាំចូល របស់វៀតណាម។ VNA
ទីក្រុងហាណូយៈ ទោះបីជា ផលប៉ះពាល់នៃវិបត្តិការរីករាលដាលជំងឺកូវីដនៅតែបន្តមាន ក្រសួងឧស្សាហកម្ម និងពាណិជ្ជកម្មវៀតណាម បានព្យាករថា តម្លៃពាណិជ្ជកម្មសរុបរបស់វៀតណាម នៅឆ្នាំនេះ ប្រហែលសម្រេចកំណត់ត្រាថ្មី ចន្លោះ ៦៤០ និង ៦៤៥ ពាន់លានដុល្លារ ដោយអតិរេកពាណិជ្ជកម្មស្តួចស្តើង។
ក្រសួងបានភ្ជាប់លទ្ធផលទៅនឹងកិច្ចខិតខំប្រឹងប្រែងនៃសហគមន៍ធុរកិច្ចក្នុងការជម្នះការលំបាកនៃការរីករាលដាលកូវីដ១៩ ដើម្បីរក្សានិងស្តារផលិតកម្ម។ ជាក់ស្តែង ឧស្សាហកម្មសំខាន់ៗ ដូចជា វាយនភណ្ឌ កាត់ដេរសម្លៀកបំពាក់ ស្បែកជើង ស្ថិតនៅលើផ្លូវសម្រេចបាន នូវទិសដៅអាជីវកម្មរបស់ពួកគេ លឿនជាងការរំពឹងទុក។
ពីឥឡូវនេះរហូតដល់ចុងឆ្នាំ ឧស្សាហកម្មទាំងអស់ចាប់យកកាលានុវត្តភាព ដើម្បីទទួលបានអត្រាកំណើនកៀកនឹងកម្រិតមុនការរីករាលដាលដែលបានផ្ទុះឡើង។ ឧស្សាហកម្មទាំងឡាយដែលនាំចេញខ្ពស់ ដូចជា ទូរស័ព្ទ អេឡិចត្រូនិក គ្រឿងម៉ាស៊ីន និងគ្រឿងបន្លាស់ ទំនងបង្ហាញអត្រាកំណើនចន្លោះ ១៥ ភាគរយ និង ២៥ ភាគរយនៅឆ្នាំនេះ។
នាពេលបច្ចុប្បន្ននេះ សហគ្រាសក្នុងស្រុកចំនួន ២០ ភាគរយបានទទួលយកការលើកទឹកចិត្តពន្ធនាំចេញពី កិច្ចព្រមព្រៀងពាណិជ្ជកម្មសេរី អឺរ៉ុប-វៀតណាម (EVFTA)ជាមួយនឹងវិញ្ញាបនបត្រនៃប្រភពដើម (C/O) ។ សម្រាប់ការដឹកជញ្ជូនទៅកាន់សហភាពអឺរ៉ុបដែលមានតម្លៃតិចជាង ៦ ០០០ អឺរ៉ូ សហគ្រាសក្នុងស្រុកត្រូវបានអនុញ្ញាតឱ្យបញ្ជាក់ប្រភពដើមដោយខ្លួនឯង។ នេះជួយធានាថាអាជីវកម្មតូចៗមិនចាំបាច់ចំណាយពេលអនុវត្ត C/O ខណៈពេលដែលនៅតែអាចរីករាយនឹងការលើកទឹកចិត្តពន្ធ។
បច្ចុប្បន្ននេះ ការលំបាកធំបំផុតដែលសហគ្រាសក្នុងស្រុកប្រឈម គឺការខ្វះខាតកម្លាំងពេលកម្ម។ សហគ្រាសមានមូលដ្ឋានភាគខាងត្បូង កំពុងប្រឈមការលំបាកច្រើន ក្នុងការសម្របសម្រួលនៃការវិលត្រឡប់នៃកម្មករ ដែលបានចាកចេញពីតំបន់ ហើយបើគ្មានវត្តមានកម្លាំងពលកម្មគ្រប់គ្រាន់ទេ គេមិនបានស្តារផលិតកម្មឡើងវិញ១០០ភាគរយនោះទេ៕ VNS-ANN/RR
