ភ្នំពេញ: កម្ពុជាស្នើដល់កៀហ្ស៊ីស៊ីស្ថាន (Kyrgyzstan) ពន្លឿនការសិក្សារួម ស្តីពីការបង្កើតកិច្ចព្រមព្រៀងពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ុប-អាស៊ីដើម្បីពង្រីកការនាំចេញរបស់កម្ពុជាបន្ថែមទៀត ទៅកាន់ប្រទេសសំខាន់ៗទាំង ៥ នៅក្នុងសហភាពសេដ្ឋកិច្ចអឺរ៉ុប-អាស៊ី។
គំនិតផ្តួចផ្តើមនេះ ត្រូវបានលើកឡើងនៅក្នុងជំនួបរវាង លោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មជាមួយនឹង លោក Almazbek Beishenaliev ឯកអគ្គរដ្ឋទូត និងជាប្រធានស្ថានបេសកកម្មអចិន្រៃ្តយ៍សាធារណរដ្ឋកៀហ្ស៊ីស្ថានប្រចាំអង្គការសហប្រជាជាតិ និងអង្គការអន្តរជាតិ នៅទីក្រុងហ្ស៊ឺណែវ ប្រទេសស្វ៊ីស នៅអង្គការពាណិជ្ជកម្មពិភពលោក (WTO) កាលពីថ្ងៃទី ០១ ខែឆ្នូ ឆ្នាំ ២០២១។
លោក សុខ សុភ័ក្ត្រ បានបញ្ជាក់ថា ទំនាក់ទំនងការទូត និងកិច្ចសហប្រតិបត្តិការពាណិជ្ជកម្ម និងសេដ្ឋកិច្ចទ្វេភាគីរវាងកម្ពុជា និងសាធារណរដ្ឋកៀហ្ស៊ីស៊ីស្ថាន ពិតជាមានសារៈសំខាន់ណាស់ ជាពិសេសជំនួបរវាង លោក Sooronbay Jeenbekov អតីតប្រធានាធិបតីនៃសាធារណរដ្ឋ កៀហ្ស៊ីស៊ីស្ថាន កាលពីឆ្នាំ ២០១៩ និងគំនិតផ្តួចផ្តើមការសិក្សារួមអំពីការបង្កើតកិច្ចព្រមព្រៀង ពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ុប-អាស៊ី (Eurasian Economic Union-EAEU) ដែលជាទីផ្សារមួយដ៏ធំគ្របដណ្ដប់ប៉ែកខាងអឺរ៉ុបខាងកើត ដោយមានសមាជិកចំនួន ៥ ប្រទេសរួមមាន អាមេនី (Armenia), បេឡារុស (Belarus), កាហ្សាក់ស្ថាន (Kazakhstan), កៀហ្ស៊ីស៊ីស្ថាន (Kyrgyzstan) និងរុស្ស៊ី (Russia) មានប្រជាជនសរុបប្រមាណជាង ២០០ លាននាក់។
លោកបានបន្តថា កម្ពុជា មានគោលជំហរក្នុងការពង្រឹង និងពង្រីកកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគរវាងប្រទេសទាំង ២ និងបានស្នើភាគីកៀហ្ស៊ីស៊ីស្ថានឱ្យជួយពិនិត្យលទ្ធភាពពន្លឿនការសិក្សារួមអំពីការបង្កើតកិច្ចព្រមព្រៀងពាណិជ្ជកម្មសេរីរវាងកម្ពុជា-សហភាពសេដ្ឋកិច្ចអឺរ៉ុបអាស៊ី នេះផងដែរ។
លោក Almazbek Beishenaliev ជាប្រធានស្ថានបេសកកម្មអចិន្រៃ្តយ៍សាធារណរដ្ឋកៀហ្ស៊ីស៊ីស្ថាន (Kyrgyzstan) បានយល់ព្រមទទួលយកសំណើរបស់គណៈប្រតិភូកម្ពុជា ដោយសន្យា ថានឹងបញ្ជូនសំណើនេះ ទៅជម្រាបថ្នាក់ដឹកនាំសាធារណរដ្ឋកៀហ្ស៊ីស៊ីស្ថាន ដើម្បីពន្លឿនការសិក្សារួមនេះ។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញប៉ុស្តិ៍ថា កិច្ចព្រមព្រៀងពាណិជ្ជកម្មសេរីរវាងកម្ពុជា-សហភាពសេដ្ឋកិច្ចអឺរ៉ុបអាស៊ីនេះបានមែន គឺជារឿងដ៏ប្រសើរបំផុត ព្រោះកម្ពុជានឹងអាចនាំចេញផលិតផលជាង ១ ម៉ឺនមុខទៅកាន់តំបន់នេះ។
លោកបានបញ្ជាក់ទៀតថា៖ «សម្រាប់ទំនាក់ទំនងសេដ្ឋកិច្ចជាមួយ Eurasian នេះ យើងនៅមានកម្រិតនៅឡើយទេ ដូច្នេះដើម្បីជំរុញឱ្យទំហំពាណិជ្ជកម្មរវាង Eurasian នេះកើនឡើងបាន ពិសេសប្រទេសរុស្ស៊ី ដែលធំជាងគេក្នុងចំណោម ៥ ប្រទេសនេះ គឺយើងត្រូវជំរុញបន្ថែមទៀត ជាពិសេសការចុះកិច្ចព្រមព្រៀងពាណិជ្ជកម្មសេរីនេះ»៕