ទីក្រុងប៉ារីសៈ ក្រុមហ៊ុនផលិតសម្ភារសំណង់ Saint-Gobain របស់ប្រទេសបារាំងបានឱ្យដឹងនៅថ្ងៃចន្ទថា ខ្លួននឹងទិញរបស់ក្រុមហ៊ុន GCP Applied Technologies ដែលមានមូលដ្ឋាននៅសហរដ្ឋអាមេរិក ដើម្បីបង្រួបបង្រួមគោលជំហររបស់ខ្លួនលើទីផ្សារគីមីសំណង់សកល។
ក្រុមហ៊ុន Saint-Gobain បាននិយាយនៅក្នុងសេចក្តីថ្លែងការណ៍ថា ខ្លួននឹងទិញយកទាំងអស់នូវភាគហ៊ុនដែលមានក្នុងក្រុមហ៊ុន GCP ក្នុងតម្លៃផ្លាស់ប្តូរជុំវិញ ២ ពាន់លានអឺរ៉ូ (២,៣ ពាន់លានដុល្លារ)។
សេចក្តីថ្លែងការណ៍បានលើកឡើងថា៖ «ការទិញផ្តាច់នេះជាជំហានប្រកបដោយការសម្រេចចិត្តក្នុងការបង្កើតជំហរឈានមុខរបស់ក្រុមហ៊ុន Saint-Gobain នៅទូទាំងពិភពលោកក្នុងគីមីសំណង់ដោយការលក់សរុបមានចំនួនច្រើនជាង ៤ ពាន់លានអឺរ៉ូ»។
កាលពីខែឧសភា ក្រុមហ៊ុន Saint-Gobain បានទិញក្រុមហ៊ុន Chryso ដែលមានមូលដ្ឋាននៅក្នុងប្រទេសបារាំង ដែលមានឯកទេសខាងគីមីសំណង់ផងដែរ ក្នុងតម្លៃ ១,២ ពាន់លានអឺរ៉ូ។
ក្រុមហ៊ុន Saint-Gobain បាននិយាយថា ក្រុមហ៊ុន Chryso មានទីតាំងឈរជើងយ៉ាងរឹងមាំក្នុងតំបន់អឺរ៉ុប មជ្ឈិមបូព៌ា និង អាហ្វ្រិក ខណៈក្រុមហ៊ុន GCP មានកន្លែងឈរជើងនៅអាមេរិក តំបន់អាស៊ីប៉ាស៊ីហ្វិក។
ក្រុមហ៊ុនបារាំងបាននិយាយថា GCP ដែលមានប្រាក់ចំណូល ១ ពាន់លានដុល្លារមានរោងចក្រផលិតចំនួន ៥០ នៅក្នុងប្រទេសចំនួន ៣៨ នៅក្នុងពិភពលោក។
ក្រុមហ៊ុនអាមេរិកមានឯកទេសលើសារធាតុបន្ថែមស៊ីម៉ងត៍ ល្បាយបេតុង ហេដ្ឋារចនាសម្ព័ន្ធ និងការការពារទឹកជ្រាបតាមអគារពាណិជ្ជកម្ម និងលំនៅឋាន។
ក្រុមហ៊ុន Saint-Gobain បាននិយាយថា៖ «GCP គឺជាឱកាសពិសេសមួយសម្រាប់ Saint-Gobain ដើម្បីបង្កើតវត្តមានឈានមុខគេទូទាំងពិភពលោកនៅក្នុងវិស័យគីមីសំណង់ដែលកំពុងកើនឡើង»។
ក្រុមហ៊ុន Saint-Gobain រំពឹងថា ប្រតិបត្តិការនេះនឹងបញ្ចប់នៅចុងឆ្នាំក្រោយ អាស្រ័យលើការយល់ព្រមពីម្ចាស់ហ៊ុនរបស់ក្រុមហ៊ុន GCP និងភ្លើងខៀវពីនិយតករ៕ RR