.jpg)
ភ្ញៀវទេសចរដែលបានទៅលេងខេត្តព្រះសីហនុថ្មីៗនេះ។ ហេង ជីវ័ន
ភ្នំពេញ: រាជរដ្ឋាភិបាលកម្ពុជាបានសម្រេចបន្តការលើកលែងពន្ធដល់វិស័យដែល បានរងគ្រោះពីការរីករាលដាលនៃជំងឺកូវីដ ១៩ ដើម្បីទុកពេលឱ្យអាជីវកម្មក្នុងវិស័យទាំងនោះ ស្ទុះងើបឡើងវិញក្នុងការជំរុញ កំណើនល្បឿនសេដ្ឋកិច្ច និង ភាពមិនប្រាកដប្រជានាពេលខាងមុខនៃជំងឺកូវីដ ១៩។
ថ្លែងក្នុងឱកាសសម្ពោធដាក់ឱ្យប្រើប្រាស់ផ្លូវជាតិលេខ ១១ និងផ្លូវក្នុងក្រុងព្រៃវែង លោកនាយករដ្ឋមន្ត្រី ហ៊ុន សែន បានមានប្រសាសន៍ថា ទោះបីជា រដ្ឋាភិបាលសម្រេចប្រកាសឱ្យបើកដំណើរការសេដ្ឋកិច្ចឡើងវិញក៏រដ្ឋាភិបាលនៅតែបន្តការអនុគ្រោះពន្ធ និងការឧបត្ថម្ភដល់វិស័យដែលរងគ្រោះ និងកម្មករ ក្នុងវិស័យទេសចរណ៍ និងរោងចក្រប៉ុន្មានខែបន្តទៀត ដើម្បីឆាប់ងើបឡើងវិញនៃវិស័យនេះ ស្របពេលដែលការរីករាលដាលនៃជំងឺកូវីដ ១៩ នៅមិនទាន់សាបរលត់។
លោកនាយករដ្ឋមន្ត្រី ហ៊ុន សែន បានមានប្រសាសន៍យ៉ាងដូច្នេះថា៖ «ទោះបីជាយើងបើកសេដ្ឋកិច្ចឡើងវិញ ក៏យើងនៅតែបន្តផ្តល់ភាពអនុគ្រោះ។
កម្មវិធីអនុគ្រោះពន្ធដារទៅលើបណ្តាមុខជំនួញមួយចំនួនដែលយើងបានប្រកាសកន្លងទៅ។ យើងក៏មិនទាន់បញ្ចប់នៅពេលដែលយើងបើកប្រទេសនេះដែរ យើងត្រូវបន្តទៅទៀត ដើម្បីដោះស្រាយសុខុមាលភាពរបស់ប្រជាពលរដ្ឋ និងភាពមិនច្បាស់លាស់នាពេលខាងមុខ។
លោក គង់ វិបុលអគ្គនាយកនៃអគ្គនាយកដ្ឋានពន្ធដារ (GDT) កាលពីខែមុនក៏បានថ្លែងប្រាប់ អ្នកសារព័ត៌មានផងដែរថាស្របពេលដែលកម្ពុជានៅបន្តក្នុងការប្រយុទ្ធប្រឆាំងនឹងការរីករាលដាលនៃជំងឺកូវីដ ១៩ លោកបានធ្វើការសុំសេចក្តីសម្រេចពីរដ្ឋាភិបាលក្នុងការបន្តការលើកលែងពន្ធលើវិស័យដែលរងគ្រោះបន្ថែមទៀតរហូតដល់ប៉ុន្មានខែក្នុងឆ្នាំ ២០២២ សំដៅធ្វើយ៉ាងណាជួយស្រោចស្រង់វិស័យដែលរងផលប៉ះពាល់ឱ្យឆាប់ងើបឡើងវិញ។
លោកបានថ្លែងយ៉ាងដូច្នេះថា៖ «ខ្ញុំបានទទួលការសម្រេចពីរដ្ឋាភិបាលហើយសម្តេច តេជោលោកបានប្រកាសបើកសេដ្ឋកិច្ចឡើងវិញពីថ្ងៃទី ១ ខែវិច្ឆិកា ដូច្នេះដើម្បីចាប់ផ្តើមបើកនេះគឺរដ្ឋាភិបាល មិនទាន់យកពន្ធនូវអ្វីដែលបានផ្តល់ ជូនវិស័យដែលប៉ះពាល់នោះទេ។ រដ្ឋាភិបាលបានសម្រេចដល់វិស័យដែលប៉ះពាល់ ព្រោះអីទុកឱ្យវិស័យទាំងនោះមានការងើបឡើងវិញ។ ផ្នែកដែលប៉ះពាល់ដូចជា ទេសចរណ៍ អាកាសចរណ៍ កសិកម្ម និង ផ្នែកផលិតកម្ម ជាដើមនឹង ទទួលបាន ៦ ខែបន្តទៀត ។
លោក កាំង ម៉ូនីកា អគ្គលេខាធិការរងសមាគម រោងចក្រកាត់ដេរនៅកម្ពុជា (GMAC) នៅថ្ងៃទី ៦ ខែធ្នូ បានសម្តែងការកោតសរសើរចំពោះកិច្ចអន្តរាគមន៍របស់រដ្ឋាភិបាល និងការគ្រប់គ្រងការរីករាលដាលនៃជំងឺកូវីដ ១៩ បានយ៉ាងល្អក្នុងគោលបំណង ស្តារសេដ្ឋកិច្ច និងសុខុមាលភាពសង្គម។
លោកបានមានប្រសាសន៍ថា៖ «ប្រសិទ្ធភាពរបស់រដ្ឋាភិបាលក្នុងការគ្រប់គ្រងជំងឺរាតត្បាតជំងឺកូវីដ ១៩ និងផែនការច្បាស់លាស់ក្នុងការបើកប្រទេស និងសេដ្ឋកិច្ចក្រោមលក្ខខណ្ឌការរស់នៅតាមគន្លងថ្មីគឺជាការលើកទឹកចិត្ត និងការគាំទ្រដ៏ល្អបំផុតដល់វិស័យផលិតកម្មដែលផ្តោតលើការនាំចេញរបស់យើង»។
«ទោះបីជាមិនមានការលើកទឹកចិត្តបន្ថែមលើផ្នែកពន្ធដារសម្រាប់វិស័យរបស់យើងទេ ប៉ុន្តែមានការឧបត្ថម្ភធនប្រាក់ឈ្នួលសម្រាប់កម្មករដែលត្រូវបានការព្យួរការងារជាបណ្តោះអាសន្ន។ បច្ចុប្បន្ននេះ វិស័យនេះបានស្ទុះងើបឡើងវិញយ៉ាងល្អជាមួយនឹងកំណើនវិជ្ជមានបើធៀបទៅនឹងឆ្នាំ ២០២០»។
លោកបន្ថែមថា រហូតមកដល់ពេលនេះមានកំណើន មធ្យមក្នុងការនាំចេញ សម្លៀកបំពាក់កំណើនដ៏ល្អក្នុងការនាំចេញស្បែកជើង និងកំណើន គួរឱ្យកត់សម្គាល់ក្នុងការនាំចេញទំនិញធ្វើដំណើរ។
អស់រយៈពេលជិត ២ ឆ្នាំហើយចាប់តាំងពីការរីករាលដាលនៃជំងឺកូវីដ ១៩ ដែលបានកំពុងរំខានដល់សុខុមាលភាពប្រជាជន និងសេដ្ឋកិច្ចសកល និងក្នុងតំបន់ រដ្ឋាភិបាលកម្ពុជាបានដាក់ចេញនូវវិធានការអន្តរាគមន៍ជំរុញសេដ្ឋកិច្ច ១០ ជុំមកហើយ ដែលមានតម្លៃជាង ២ ពាន់លានដុល្លារសំដៅជំរុញសេដ្ឋកិច្ច ដើម្បីបើកដំណើរការឡើងវិញនៃអាជីវកម្ម ក្នុងអំឡុងពេល និងក្រោយវិបត្តិ។ វិធានការគាំទ្រផ្តោតលើវិស័យវាយនភណ្ឌ កាត់ដេរ ស្បែកជើង ទំនិញធ្វើដំណើរ និងវិស័យ ទេសចរណ៍ដែលរងផលប៉ះពាល់យ៉ាងធ្ងន់ធ្ងរ។
កាលពីចុងខែវិច្ឆិកា ការិយាល័យស្រាវជ្រាវម៉ាក្រូសេដ្ឋកិច្ចអាស៊ានបូក ៣ (Amro) បានព្យាករថា កំណើនសេដ្ឋកិច្ចរបស់កម្ពុជានឹងសម្រេចបានក្នុងរង្វង់ ២,៨ ភាគរយ នៅឆ្នាំ ២០២១ ដែលត្រូវគាំទ្រដោយវិស័យនានានឹងងើបឡើងវិញ ខណៈដែលរដ្ឋាភិបាលបានព្យាករថាសេដ្ឋកិច្ចកម្ពុជានឹងមានកំណើនរង្វង់ ៤,៨ ភាគរយក្នុងឆ្នាំ ២០២២។
Amro បានលើកឡើងថា៖ «ការពង្រឹងការគ្រប់គ្រងជំងឺរាតត្បាត និងការអនុវត្តគោលនយោបាយដែលអាចបត់បែនបាន ដើម្បីគាំទ្រដល់វិស័យដែលងាយរងគ្រោះ នឹងធ្វើឱ្យសេដ្ឋកិច្ចដើរលើផ្លូវងើបឡើងវិញដ៏រឹងមាំនៅតែមានសារៈសំខាន់ ខណៈពេលដែលការចាក់វ៉ាក់សាំងដ៏ឆាប់រហ័ស ដែលកំពុងបន្ត និងធានាបាននូវការបើកសេដ្ឋកិច្ចឡើងវិញ ប្រកបដោយស្ថិរភាព»៕
វីដេអូ៖
