.jpg)
ពិធីបើកការដ្ឋានសាងសង់រោងចក្រថាមពលជីវម៉ាស។ ហេង ជីវ័ន
ភ្នំពេញៈ រោងចក្រថាមពលជីវម៉ាសដុតអង្កាមដ៏ធំដំបូងគេនៅកម្ពុជាដែលមានតម្លៃវិនិយោគជិត ៦ លានដុល្លារនឹងលេចរូបរាងក្នុងទឹកដីខណ្ឌច្បារអំពៅ រាជធានីភ្នំពេញនាក្នុងខែកក្កដា ឆ្នាំ ២០២២ ដោយរោងចក្រនេះនឹងផលិតថាមពលកម្តៅសម្រាប់ប្រើប្រាស់ក្នុងរោងចក្រផលិតស្រាបៀរក្រុមហ៊ុន Heineken Cambodia។
រោងចក្រជីវម៉ាស ដែលបើកដំណើរការសាងសង់កាលពីថ្ងៃទី ៨ ខែធ្នូ ឆ្នាំ ២០២១នេះ គឺជាការសហការគ្នារវាងក្រុមហ៊ុន Heineken Cambodia ជាមួយក្រុមហ៊ុន BECIS ដែលមានមូលដ្ឋាននៅក្នុងប្រទេសសិង្ហបុរីក្នុងតម្លៃវិនិយោគ ៥,៨ លានដុល្លារ ដោយត្រូវចំណាយពេលសាងសង់ ៧ ខែ។ រោងចក្រនេះនឹងដុតអង្កាមដែលយកមកពីខេត្តព្រៃវែង។
លោកស្រី Anne Ollivier នាយកផ្នែកកិច្ចការសហគ្រាសក្រុមហ៊ុន Heineken Cambodia បានលើកឡើងថា ការប្តេជ្ញារបស់ក្រុមហ៊ុនចំពោះនិរន្តរភាពមិនមែនជារឿងថ្មីនោះទេ។ ការចូលរួមអភិវឌ្ឍកម្ពុជាឱ្យមានភាពល្អប្រសើរប្រកបដោយចីរភាព គឺជាមហិច្ឆតារបស់ក្រុមហ៊ុន។
លោកស្រីបន្ថែមថា៖ «១ ទសវត្សរ៍ចុងក្រោយនេះ យើងបាននិងកំពុងផ្តោតលើប្រសិទ្ធភាពថាមពល និងបានចាប់ផ្តើមប្រើប្រាស់ថាមពលកកើតឡើងវិញដូចជាជីវម៉ាស។ តាំងពីឆ្នាំ ២០១៣ មក យើងបានកាត់បន្ថយរួចហើយនូវការបញ្ចេញឧស្ម័នកាបូន ៥០ ភាគរយ»។
លោកស្រីបន្តថា ការសាងសង់រោងចក្រថាមពលនេះ បង្ហាញពីជំហានឆ្ពោះទៅមុខដ៏ធំមួយរបស់ក្រុមហ៊ុនក្នុងការបញ្ឈប់ទាំងស្រុងនូវការបញ្ចេញឧស្ម័នកាបូនក្នុងផលិតកម្មនៅឆ្នាំ ២០៣០។
នាយកប្រចាំប្រទេសរបស់ក្រុមហ៊ុន BECIS លោក Neil Allen ថ្លែងថា៖ «យើងពិតជាមានមោទនភាពចំពោះប្រទេសកម្ពុជា និងភាពជាដៃគូរបស់យើងជាមួយនឹង Heineken Cambodia ខណៈយើងបោះជំហានឆ្ពោះទៅអនាគតថាមពលប្រកបដោយចីរភាព»។
លោក សៅ សុភាព រដ្ឋលេខាធិការក្រសួងបរិស្ថានបានលើកឡើងថា ការប្រើប្រាស់ថាមពលកកើតឡើងវិញដូចជាថាមពលជីវម៉ាសកំពុងត្រូវបានយកចិត្តទុកដាក់ពីវិស័យសាធារណៈ និងឯកជន ដែលនឹងរួមចំណែកក្នុងការបន្ថយការប្រើប្រាស់ថាមពលពីឥន្ធនៈ។
លោកបានបន្តថា៖ «គម្រោងរោងចក្រថាមពលជីវម៉ាសនេះនឹងរួមចំណែកបន្ថែមទៀតក្នុងការលើកកម្ពស់ការប្រើប្រាស់ថាមពលកកើតឡើងវិញ និងកាត់បន្ថយការសាយភាយឧស្ម័នផ្ទះកញ្ចក់ និងរួមចំណែកឆ្លើយតបទៅនឹងបញ្ហាប្រែប្រួលអាកាសធាតុ»។
បើតាមក្រុមហ៊ុន Heineken Cambodia តាមរយៈការប្តូរមកប្រើប្រាស់ថាមពលជីវម៉ាសនេះ ក្រុមហ៊ុនរំពឹងថា នឹងអាចសន្សំសំចៃឧស្ម័នកាបូនបាន ១៧ ០០០ តោនក្នុង ១ ឆ្នាំ។
តាមការគ្រោងទុក ក្រុមហ៊ុន Heineken Cambodia មានគោលបំណងចង់កាត់បន្ថយការបញ្ចេញកាបូនឱ្យបាន ៣០ ភាគរយនៅត្រឹមឆ្នាំ ២០៣០ នៅគ្រប់ខ្សែចង្វាក់ផលិតកម្មទាំងមូលរបស់ខ្លួនធៀបនឹងឆ្នាំ ២០១៨៕ LA
