ភ្នំពេញៈ ធនាគារអេស៊ីលីដា ភីអិលស៊ី និងក្រុមហ៊ុនតូតាល់-កម្ពុជាបានចុះកិច្ចព្រមព្រៀងជាដៃគូ ដើម្បីបម្រើសេវាទូទាត់វិក្កយបត្រតាមរយៈធនាគារអេស៊ីលីដា ជូនដល់អតិថិជនទូទៅ និងសាធារណជនសម្រាប់ការទូទាត់ជាមុនរបស់ក្រុមហ៊ុនតូតាល់កម្ពុជា។
លោក អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា បានថ្លែងក្នុងពិធីចុះហត្ថលេខាកាលពីថ្ងៃទី ៨ ខែធ្នូថា ការចាប់ដៃគូនេះនឹងផ្តល់មធ្យោបាយក្នុងការទូទាត់តាមបែបឌីជីថលប្រកបដោយសុវត្ថិភាព សាមញ្ញ និងមានប្រសិទ្ធភាព។
លោកបន្តថា ក្នុងឆ្នាំ ២០០៥ ក្រុមហ៊ុនតូតាល់កម្ពុជាបានបើកគណនីសេវាប្រមូលសាច់ប្រាក់ (Cash Collection) ជាមួយធនាគារអេស៊ីលីដា។ ចាប់ពីឆ្នាំ ២០១៥ ដល់បច្ចុប្បន្នក្រុមហ៊ុនតូតាល់-កម្ពុជាបានពង្រីកការទូទាត់តាមម៉ាស៊ីន POS របស់ អេស៊ីលីដា រហូតដល់ ៥៩ ស្ថានីយ។
លោកថ្លែងថា៖ «ដោយយល់ឃើញពីសារៈសំខាន់ និងសេចក្តីត្រូវការរបស់អតិថិជន ធនាគារអេស៊ីលីដា និងក្រុមហ៊ុនតូតាល់-កម្ពុជាបានសហការគ្នាពង្រីកនិងបន្ថែមមធ្យោបាយទូទាត់តាមរយៈអេស៊ីលីដាម៉ូបាល ដែលជាជម្រើសទាន់សម័យ ដើម្បីបម្រើអតិថិជនទាំងអស់»។
លោកស្រី Dinah Jogia Kumar ប្រធានគ្រប់គ្រងក្រុមហ៊ុនតូតាល់កម្ពុជាបានប្រាប់ថា ការចុះកិច្ចព្រមព្រៀងនេះគឺដើម្បីស្វែងរកដំណោះស្រាយជូនដល់អតិថិជនតាមប្រព័ន្ធឌីជីថល។
លោកស្រីបន្តថា៖ «យើងបង្កើនសេវានៅតាមស្ថានីយពីលើអ្វីដែលយើងមានរួមជាមួយនឹងការទូទាត់មុន ដែលមានសារៈសំខាន់ដល់អតិថិជន»។
បើតាមលោកស្រី Dinah ការទូទាត់វិក្កយបត្រតាមប្រព័ន្ធអនឡាញ និងការទូទាត់ជាមុនពិតជាមានសារៈសំខាន់ណាស់សម្រាប់អតិថិជន ហើយកិច្ចសហការនេះអនុញ្ញាតឱ្យអតិថិជនចុះឈ្មោះប្រើប្រាស់ទទួលបានបទពិសោធនៃការទូទាត់តាមរយៈអេស៊ីលីដាម៉ូបាលកាន់តែមានប្រសិទ្ធភាព៕ LA
វីដេអូ៖