ភ្នំពេញៈ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកម្ពុជា និងតំណាងធនាគារអភិវឌ្ឍន៍អាស៊ី (ADB) បានចុះហត្ថលេខាលើកញ្ចប់ហិរញ្ញប្បទាន ៣៣២,០៥ លានដុល្លារ ដើម្បីគាំទ្រដល់ការឆ្លើយតបរបស់កម្ពុជានឹងជំងឺកូវីដ ១៩ អភិវឌ្ឍវិស័យហិរញ្ញវត្ថុកសាងហេដ្ឋារចនាសម្ព័ន្ធទីក្រុង និងជួយកែលម្អបណ្តាញផ្លូវ។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក Anthony Gill នាយកស្តីទីនៃធនាគារ ADB ប្រចាំកម្ពុជាបានចុះហត្ថលេខាលើកិច្ចព្រមព្រៀងកម្ចី និងហិរញ្ញប្បទានឥតសំណងសម្រាប់គម្រោងសន្តិសុខសុខភាពមហាអនុតំបន់មេគង្គ (GMS) ៣០ លានដុល្លារ, គម្រោងវិនិយោគទីក្រុងដែលអាចរស់នៅបាន ១៨០ លានដុល្លារ, គម្រោងកែលម្អបណ្តាញផ្លូវថ្នល់ (ដំណាក់កាលទី ២) ៨២,០៥ លានដុល្លារ និងកម្មវិធីអភិវឌ្ឍន៍វិស័យហិរញ្ញវត្ថុប្រកបដោយបរិយាប័ន្ន ចំនួន ៤០ លាន។
តាមរយៈសេចក្តីប្រកាសរបស់ ADB លោក Gill បានលើកឡើងថា៖ «ក្នុងនាមជាដៃគូអភិវឌ្ឍន៍យូរអង្វែងកម្ពុជា ADB ប្តេជ្ញាគាំទ្រលទ្ធភាពប្រកួតប្រជែងផ្នែកសេដ្ឋកិច្ចរបស់ប្រទេស និងការអភិវឌ្ឍប្រកបដោយបរិយាប័ន្ន។ គម្រោងទាំងនេះនឹងជំរុញការងើបឡើងវិញនៃសេដ្ឋកិច្ចកម្ពុជាតាមរយៈការកែលម្អសេវាថែទាំសុខភាពបរិយាប័ន្នហិរញ្ញវត្ថុហេដ្ឋារចនាសម្ព័ន្ធ និងសេវាកម្មទីក្រុងនៅទីតាំងយុទ្ធសាស្ត្រមួយចំនួន និងបណ្តាញផ្លូវថ្នល់»។
យោងតាមធនាគារប្រចាំតំបន់អាស៊ីនេះ គម្រោងសន្តិសុខសុខភាពមហាអនុតំបន់មេគង្គនឹងធ្វើឱ្យប្រសើរឡើងនូវសេវាមន្ទីរពិសោធន៍ និងការត្រួតពិនិត្យបង្ការការឆ្លងរោគតាមមន្ទីរពេទ្យខេត្ត និងស្រុកចំនួន ៨១ នៅទូទាំងប្រទេសកម្ពុជា។ វានឹងជំរុញប្រព័ន្ធតាមដាន និងឆ្លើយតបជំងឺការគ្រប់គ្រងការរាតត្បាតនៃជំងឺកូវីដ ១៩ និងការតាមរកករណីឆ្លងដោយភ្នាក់ងារសុខាភិបាលមជ្ឈិមខេត្ត និងស្រុក។
គម្រោងនេះក៏បានផ្តល់មូលនិធិតាមរយៈជំនួយ ៥ លានដុល្លារពីមូលនិធិជប៉ុនសម្រាប់ការកាត់បន្ថយភាពក្រីក្រ (JFPR) របស់រដ្ឋាភិបាលផងដែរ។
គម្រោងវិនិយោគទីក្រុងដែលអាចរស់នៅបាននឹងជួយផ្តល់សេវាគ្រប់គ្រងទឹកសំណល់ និងសំណល់រឹងកាន់តែប្រសើរសម្រាប់ប្រជាពលរដ្ឋជាង ១៤ ម៉ឺននាក់នៅក្រុងបាវិត, កំពត និងក្រុងប៉ោយប៉ែត។ វានឹងជួយទីក្រុងទាំង ៣ កែលម្អប្រព័ន្ធបង្ហូរទឹកភ្លៀង និងលូក្នុងទីក្រុង និងកាត់បន្ថយទឹកជំនន់។ JFPR បានផ្តល់ជំនួយបច្ចេកទេស ២ លានដុល្លារគាំទ្រដល់កិច្ចខិតខំប្រឹងប្រែង ដើម្បីកែលម្អផែនការប្រើប្រាស់ដីធ្លី និងអភិបាលកិច្ចក៏ដូចជាការងារផ្សេងទៀត៕ LA