សៀមរាបៈ សេវាកម្មស្នាក់នៅហាក់ងើបឡើងវិញយ៉ាងរហ័ស ដោយបន្ទប់សណ្ឋាគារ និងផ្ទះសំណាក់ជិត ៣ ម៉ឺនបន្ទប់ នៅខេត្តសៀមរាបបានបើកដំណើរការអាជីវកម្មឡើងវិញ បន្ទាប់ពីការប្រកាសបើកប្រទេសឡើងវិញ និងការស្ថាបនាផ្លូវ ៣៨ ខ្សែដែលជាក្តីសង្ឃឹមនៃការទាក់ទាញទេសចរទាំងក្នុងស្រុក និងអន្តរជាតិ ប៉ុន្តែប្រតិបត្តិករផ្នែកឯកជនហាក់នៅមិនទាន់ជឿជាក់ខ្លាំងនោះទេ។
បើយោងតាមរបាយការណ៍មន្ទីរទេសចរណ៍ខេត្តសៀមរាប គិតត្រឹមថ្ងៃទី ៨ ខែធ្នូ ឆ្នាំ ២០២១ មានសណ្ឋាគារប្រមាណជិត ២ ម៉ឺនបន្ទប់ និងផ្ទះសំណាក់ ៨ ០០០ បន្ទប់ក្នុងខេត្តសៀមរាប បានដំណើរការឡើងវិញ បន្ទាប់ពីបានបិទទ្វារអស់រយៈពេលជិត ២ ឆ្នាំចាប់តាំងពីការរីករាលដាលជំងឺកូវីដ ១៩។
លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាបបានពន្យល់ថា ការបើកដំណើរការផ្ទះសំណាក់ និងសណ្ឋាគារក្នុងចំនួនច្រើននេះ ដោយសារភ្ញៀវទេសចរជាតិ និងអន្តរជាតិចាប់ផ្តើមធ្វើដំណើរមកកម្សាន្តនៅខេត្តទេសចរណ៍ប្រវត្តិសាស្ត្រ និងធម្មជាតិនេះជាបណ្តើរៗវិញហើយ ដោយក្នុងនោះមានជើងហោះហើរចំនួន ២ ខ្សែ នឹងដឹកភ្ញៀវទេសចរចូលមកខេត្តសៀមរាប។
លោកបន្តថា ជារៀងរាល់ថ្ងៃចុងសប្តាហ៍ ឬថ្ងៃបុណ្យជាតិមានភ្ញៀវទេសចរមកកម្សាន្តនៅខេត្តដ៏មានសក្តានុពលមួយនេះប្រមាណ ៦ ០០០ នាក់ដែលធ្វើឱ្យមានតម្រូវការបន្ទប់សណ្ឋាគារ និងផ្ទះសំណាក់ ខណៈអំឡុងនៃវិបត្តិកូវីដ ១៩ វិស័យទេសចរណ៍នៅក្នុងខេត្តសៀមរាបរងគ្រោះធ្ងន់ធ្ងរជាងគេក្នុងនោះវិស័យសណ្ឋាគារ និងផ្ទះសំណាក់បានបិទដំណើរការពី ៨០ ទៅ ៩០ ភាគរយ។
លោក សេងកាក់ និយាយថា៖ «បច្ចុប្បន្នគ្រប់ផ្នែកទាំងអស់ដូចជា សេវាកម្មអាហារដ្ឋាន សណ្ឋាគារ និងផ្ទះសំណាក់បានបើកដំណើរការឡើងវិញ ដែលជាផ្នែកមួយជួយជំរុញវិស័យសេដ្ឋកិច្ចឱ្យកាន់តែល្អប្រសើរនាពេលឆាប់ៗនេះ»។
ប្រធានសមាគមសណ្ឋាគារកម្ពុជាលោក ឌិន សុមេធារិទ្ធ បានប្រាប់ភ្នំពេញប៉ុស្តិ៍ថា ទោះបីបន្ទប់សណ្ឋាគារ និងផ្ទះសំណាក់ត្រូវបានបើកដំណើរការ ដើម្បីស្វាគមន៍ទទួលភ្ញៀវទេសចរជាតិ និងអន្តរជាតិក៏ដោយ ក៏មិនទាន់មានភ្ញៀវមកលេងនៅក្នុងខេត្តនេះច្រើនទេ។
ទោះយ៉ាងណា លោកបន្តថា កម្ពុជាមានគោលការណ៍ក្នុងការបើកប្រទេសឡើងវិញកាលពីកន្លងមកនេះ វាគឺជាសញ្ញាល្អសម្រាប់ក្រុមហ៊ុនអាកាសចរណ៍ត្រៀមរៀបចំជើងហោះហើររបស់ខ្លួនចូលមកក្នុងប្រទេសកម្ពុជាវិញ ប៉ុន្តែប្រសិនមិនមានគោលការណ៍នេះទេ ក្រុមហ៊ុនអាកាសចរណ៍នានានឹងបន្តរង់ចាំមើលរហូត ហើយបើសិននៅមានរបាំងចត្តាឡីស័កទៀតនោះភ្ញៀវទេសចរក៏មិនអាចធ្វើដំណើរមកដែរ។
លោកថ្លែងថា៖ «គាត់បើកៗ ហើយប៉ុន្តែអត់ភ្ញៀវអន្តរជាតិទេ ដោយឡែកសម្រាប់ភ្ញៀវខ្មែរ វាតិចតួចណាស់បើធៀបជាមួយនឹងបន្ទប់សណ្ឋាគារ និងផ្ទះសំណាក់ ហើយខ្មែរយើងដើរតែពេលបុណ្យទានប៉ុណ្ណោះ។ នៅសៀមរាបមានសណ្ឋាគារច្រើនធ្លាប់តែទទួលភ្ញៀវក្នុង ១ ឆ្នាំគឺជិត ៣ លាននាក់។ ឥឡូវភ្ញៀវធ្លាក់ចូលជាង ៩០ ភាគរយ»។
ទោះជាយ៉ាងនេះក្តីលោកថា វានៅតែមានសញ្ញាល្អសម្រាប់អាជីវកម្មសណ្ឋាគារ និងផ្ទះសំណាក់ដែលបានបើកដំណើរឡើងវិញនៅចុងខែនេះ ឬដើមខែក្រោយ បន្ទាប់ពីមានការត្រៀមហោះហើររបស់ក្រុមហ៊ុនអាកាសចរណ៍ថៃអ៊ែរវ៉េ និងអាកាសចរណ៍សិង្ហបុរី ដែលនឹងចាប់ផ្តើមប្រតិបត្តិការហោះហើរ ដឹកភ្ញៀវទេសចរមកពីប្រទេសនានាចូលកម្ពុជា ជាពិសេសចូលខេត្តសៀមរាប។
ស្រដៀងគ្នានេះ លោក ធួន ស៊ីណាន ប្រធានសមាគមទេសចរណ៍អាស៊ី-ប៉ាស៊ីហ្វិក បាននិយាយថា បច្ចុប្បន្នលោកមិនទាន់មើលឃើញថា សណ្ឋាគារ និងផ្ទះសំណាក់ បើកដំណើការ ច្រើនដូចការលើកឡើងរបស់មន្ទីរទេសចរណ៍ខេត្តសៀមរាបទេ។ តាមស្ថានភាពជាក់ស្តែងសម្រាប់សណ្ឋាគារលំដាប់ផ្កាយ ៣ និងផ្កាយ ៤ មិនទាន់បើកដំណើរការទេ ពីព្រោះពួកគេយល់ឃើញថា មិនទាន់មានភ្ញៀវទេសចរធ្វើដំណើរចូលមកកាន់ខេត្តនេះច្រើន។
លោកបន្តថា៖ «តាមភ្នែកខ្ញុំ មិនឯកភាពតាមមន្ទីរទេសចរណ៍ខេត្តទេ។ ខ្ញុំគិតថា សម្រាប់ខេត្តសៀមរាបនៅតែបន្តមានហានិភ័យខ្ពស់ ព្រោះក្នុងខេត្តនេះមិនមានភ្ញៀវទេសចរនៅក្នុងស្រុកច្រើនមកទស្សនាជាប្រចាំដូចខេត្តភូមិភាគឦសានខេត្តកំពត និងកែបទេ»។
ចំពោះភ្ញៀវទេសចរអន្តរជាតិវិញ លោក ធួន ស៊ីណាន មើលឃើញថា ក៏មិនទាន់មានច្រើនកុះករដែរនាពេលនេះ បើទោះបីរដ្ឋាភិបាលបានសម្រេចបើកប្រទេសឱ្យមានស្ថានភាពទូលំទូលាយក៏ដោយ។ រហូតមកដល់ពេលនេះ មិនទាន់មានភ្ញៀវទេសចរបរទេសណាម្នាក់កក់សំបុត្រមកទស្សនានៅចុងឆ្នាំនេះ ឬដើមឆ្នាំក្រោយនៅឡើយទេ ព្រោះភ្ញៀវបានខ្លាចរអាចំពោះមេរោគបំប្លែងថ្មី (អូមីក្រុង)៕ LA