ភ្នំពេញៈ ធនាគារពិភពលោក (WB) បានព្យាករកំណើនផលិតផលសរុបក្នុងស្រុក (ផ.ស.ស) របស់កម្ពុជានៅក្នុងឆ្នាំ ២០២១ នេះនឹងសម្រេចបាន ២,២ ភាគរយប៉ុណ្ណោះដោយសារវិស័យសេវាកម្ម និងវិស័យសំណង់ និងអចលនទ្រព្យ នៅមានកំណើនយឺត។
សេចក្តីប្រកាសព័ត៌មានរបស់ WB ពីបច្ចុប្បន្នភាពចុងក្រោយនៃស្ថានភាពសេដ្ឋកិច្ចកម្ពុជា តាមរយៈរបាយការណ៍ថ្មីមួយក្រោមចំណងជើង «រស់ជាមួយកូវីដ ១៩» កាលពីថ្ងៃទី ៩ ខែធ្នូ ឱ្យដឹងថា ផលិតផលសរុបក្នុងស្រុក (ផ.ស.ស) របស់កម្ពុជាត្រូវបានព្យាករថា នឹងមានកំណើនត្រឹមតែ ២,២ ភាគរយប៉ុណ្ណោះក្នុងឆ្នាំនេះ ដោយសារវិស័យសេវាកម្ម (ទេសចរណ៍) និងវិស័យសំណង់ និងអចលនទ្រព្យនៅមានកំណើនយឺត បើទោះវិស័យសំខាន់ៗមួយចំនួនដូចជា ឧស្សាហកម្មកាត់ដេរ, ផលិតផលធ្វើដំណើរ, ស្បែកជើង, ឧស្សាហកម្មផលិតកង់ និងវិស័យកសិកម្ម នៅតែបន្តដើរតួទ្រទ្រង់ដល់ការស្តារសេដ្ឋកិច្ចឱ្យងើបឡើងវិញពីវិបត្តិកូវីដ-១៩ ក៏ដោយ។
សេចក្តីប្រកាសព័ត៌មានបានឱ្យដឹងថា៖ «ថ្វីដ្បិតតែការផលិតសម្រាប់ការនាំចេញបានរើបឡើងវិញ ហើយការនាំចេញផលិតផលកសិកម្មមានការកើនឡើងក៏ឱនភាពផ្នែកពាណិជ្ជកម្មបានរីកទំហំកាន់តែធំគួរឱ្យកត់សម្គាល់ ដោយសារមានការកើនឡើងនៃការនាំចូលមុខទំនិញមួយចំនួន ពិសេសមាស សម្រាប់យកមកធ្វើជាសញ្ជ័យធន (ការសន្សំ)»។
លោកស្រី Maryam Salim តំណាងធនាគារពិភពលោកប្រចាំកម្ពុជាបាននិយាយថា គ្រប់គ្នាដឹងហើយថា ពេលនេះកម្ពុជាកំពុងតែរស់នៅជាមួយជំងឺកូវីដ-១៩ ប្រជាជនចំនួនច្រើនលើសលប់បានចាក់វ៉ាក់សាំងការពាររួច ហើយរដ្ឋាភិបាលក៏បានចាប់ផ្តើមបើកប្រទេសឱ្យដំណើរការឡើងវិញសឹងតែគ្រប់ផ្នែកផងដែរ ដោយបន្តអនុវត្តវិធានការការពារសុខភាពដែលមានជាធរមានស្រាប់។
WB ក៏បានផ្តល់អនុសាសន៍ថា ដើម្បីធ្វើឱ្យសេដ្ឋកិច្ចមានកម្លាំងស្ទុះងើបឡើងវិញ កម្ពុជាចាំបាច់ត្រូវធ្វើកំណែទម្រង់ផ្នែកសំខាន់ៗមួយចំនួន ក្នុងនោះមានការដាក់ចេញនូវវិធាន និងបទប្បញ្ញត្តិច្បាស់លាស់ស្តីពីការរៀនរស់ជាមួយកូវីដ ១៩ ស្របតាម «គន្លងប្រក្រតីភាពថ្មី», វិធានការផ្នែកបទប្បញ្ញត្តិ និងផ្នែកសារពើពន្ធដែលជួយដល់ការរស់រានឡើងវិញនៃវិស័យទេសចរណ៍, និងការដាក់ចេញជាបន្ទាន់នូវបទប្បញ្ញត្តិនានាសម្រាប់ការអនុវត្តច្បាប់វិនិយោគថ្មី។
បន្ថែមពីលើនេះ WB ក៏បានណែនាំថា នៅពេលដែលការងើបឡើងវិញនៃសេដ្ឋកិច្ចលេចចេញជារូបរាងហើយ កម្ពុជាអាចចាប់ផ្តើមរៀបចំកែសម្រួលលម្ហសារពើពន្ធរបស់ខ្លួនឡើងវិញ ហើយជាមួយគ្នានោះ បន្តតាមដានមើលលើគុណភាពរបស់ធនធាន និងបង្កើនភាពទុកចិត្តលើប្រព័ន្ធធនាគារឱ្យបានកាន់តែប្រសើរ។
WB បានឱ្យដឹងទៀតថា ការរីករាលដាលជំងឺកូវីដ ១៩ បានធ្វើឱ្យមានផលប៉ះពាល់មួយចំនួនលើការរៀនសូត្រ និងការរកចំណូលផងដែរ៕ LA