ភ្នំពេញៈ ការបន្តអូសបន្លាយពេលនៃការឆ្លងរាលដាលជំងឺកូវីដ ១៩ បានធ្វើឱ្យចំនួនភ្ញៀវទេសចរបរទេសធ្វើដំណើរចូលមកកម្ពុជាក្នុងរយៈពេល ១០ ខែដំបូងឆ្នាំ ២០២១ មានប្រមាណជាង ១៤ ម៉ឺននាក់ ថយចុះជិត ៩០ ភាគរយបើធៀបនឹងរយៈពេលដូចគ្នាឆ្នាំ ២០២០។ នេះបើយោងតាមទិន្នន័យពីក្រសួងទេសចរណ៍។
ទិន្នន័យក្រសួងទេសចរណ៍បង្ហាញថា ចាប់ពីខែមករា ដល់ខែតុលា ឆ្នាំ ២០២១ កម្ពុជាទទួលបានភ្ញៀវទេសចរបរទេសសរុប ១៤៤ ៤៣៣ នាក់ ធ្លាក់ចុះ ៨៨,៦ ភាគរយបើធៀបនឹងរយៈពេលដូចគ្នាឆ្នាំ ២០២០ ដែលមានចំនួន ១ ២៤៦៧ ៨៩០ នាក់។ នៅក្នុងនោះភ្ញៀវជនជាតិថៃមានច្រើនជាងគេ ៦៩ ៩១០ នាក់, ចិន ៣៩ ៧៩១ នាក់, វៀតណាម ៨ ៨៩៨ នាក់, ឥណ្ឌូនេស៊ី ៤ ៧២៩ នាក់, កូរ៉េ ៣ ៤៣៤ នាក់, អាមេរិក ៣ ៣៧៣ នាក់ ព្រមទាំងភ្ញៀវមកពីបណ្តាប្រទេសមួយចំនួនទៀត។
ក្នុងចំណោមនោះ ភ្ញៀវធ្វើដំណើរតាមផ្លូវអាកាសមានចំនួន ៦៩ ៤១៣ នាក់ ស្មើនឹង ៤៨,១ ភាគរយ និងផ្លូវគោកទឹក ចំនួន ៧៥ ០២០ នាក់ ស្មើនឹង ៥១,៩ ភាគរយ។
ដោយឡែកសម្រាប់ខែតុលា ភ្ញៀវបរទេសដែលមកដល់កម្ពុជាមានចំនួន ១២ ៧៥៩ នាក់ ធ្លាក់ចុះ ៣៦,៩ ភាគរយបើធៀបនឹងខែតុលា ឆ្នាំ ២០២០។
ចំនួនភ្ញៀវបរទេសចូលមកកម្ពុជាបានចាប់ផ្តើមមានកំណើនឡើងវិញចាប់ពីដើមខែធ្នូ នេះតទៅ ខណៈរដ្ឋាភិបាលកម្ពុជាបានសម្រេចបើកទទួលភ្ញៀវទេសចរបរទេសចាក់វ៉ាក់សាំងប្រឆាំងនឹងជំងឺកូវីដ ១៩ គ្រប់ដូសចាប់តាំងពីថ្ងៃទី ៣០ ខែវិច្ឆិកា ឆ្នាំ ២០២១។
ក្នុងឆ្នាំ ២០២០ កម្ពុជាទទួលបានភ្ញៀវបរទេសសរុប ១ ៣០៦ ១៤៣ នាក់ធ្លាក់ចុះ ៨០,២ ភាគរយបើធៀបទៅនឹងឆ្នាំ ២០១៩ ដែលមានចំនួន ៦ ៦១០ ៥៩២ នាក់។ នេះបើយោងតាមទិន្នន័យពីក្រសួងទេសចរណ៍៕