ភ្នំពេញៈ ប្រាក់ចំណូលរបស់កំពង់ផែស្វយ័តភ្នំពេញ(ក.ស.ភ) ដែលជាក្រុមហ៊ុនចុះបញ្ជីនៅផ្សារមូលបត្រកម្ពុជា (CSX) ក្នុងរយៈពេល ១១ខែឆ្នាំ២០២១ មានប្រមាណជាង ៣០លានដុល្លារ កើនឡើងប្រហែល ១៤ភាគរយបើធៀបនឹងរយៈពេលដូចគ្នាឆ្នាំ២០២០ ក្នុងនោះចំណូលពីប្រតិបត្តិការផែ(Port Operation) បានគ្របដណ្តប់ជាង ៨០ភាគរយ។ នេះបើយោងតាមសេចក្តីប្រកាសព័ត៌មាន។
ទិន្នន័យរបស់ ក.ស.ភ ដែលផ្ញើឱ្យវិនិយោគិន និងសាធារណជន ចុះកាលបរិច្ឆេទថ្ងៃទី៩ ខែធ្នូ ឆ្នាំ២០២១ បានបង្ហាញថា ចាប់ពីខែមករា ដល់ខែវិច្ឆិកា ឆ្នាំ២០២១ ចំណូលដែល ក.ស.ភ រកបាន(ពុំទាន់ធ្វើសវនកម្ម) មានចំនួនសរុប ៣០ ៣៩០ ១៧២ ដុល្លារ កើនឡើង ១៤ភាគរយបើធៀបនឹងរយៈពេលដូចគ្នាឆ្នាំ២០២០ ដែលមានចំនួន ២៦ ៦៥៨ ២២១ ដុល្លារ។
យោងតាម ក.ស.ភ ក្នុងចំណោមចំណូលទាំងនោះរួមមាន ចំណូលពីប្រតិបត្តិការផែ(Port Operation) មានចំនួន ២៤ ៣៧៧ ៦៨៣ដុល្លារ កើន ១៦ភាគរយ ធៀបរយៈពេលដូចគ្នាឆ្នាំ២០២០, ចំណូលពីអាជ្ញាធរផែ(Port Authority) ៣ ២៣៣ ០៧២ដុល្លារ ធ្លាក់ចុះ ៣ភាគរយ, ចំណូលពីសេវាកម្មផ្សេងៗ (Other Services) ៣០៧ ៥៤១ដុល្លារ កើន ៨៩ភាគរយ និងចំណូលផ្សេងៗ(Other Income) ២ ៤៧១ ៨៧៦ កើន ១២ភាគរយ។
ដោយឡែកសម្រាប់ខែវិច្ឆិកា ចំណូលសរុបដែល ក.ស.ភ ទទួលបានមានចំនួន ២ ៧៦៥ ៦០៩ដុល្លារ កើនឡើង ១៩ភាគរយពីចំនួន ២ ៣៣២ ៣៦៩ដុល្លារក្នុងខែវិច្ឆិកា ឆ្នាំ២០២០។ ក្នុងនោះចំណូលពីប្រតិបត្តិការផែ មានចំនួន ២ ២៩១ ១៣៧ដុល្លារ កើន ២៤ភាគរយ, ចំណូលពីអាជ្ញាធរផែ ៣១១ ០៩៨ដុល្លារ កើន ៥ភាគរយ, ចំណូលពីសេវាកម្មផ្សេងៗ ៦ ៤២០ដុល្លារ កើន ១០០ភាគរយ និងចំណូលផ្សេងៗ ១៥៦ ៩៥៤ ថយចុះ ១៦ភាគរយ។
ប្រាក់ចំណូលប្រចាំឆ្នាំ២០២០ របស់ ក.ស.ភ (មិនទាន់ធ្វើសវនកម្ម) មានចំនួន ២៩,៤៨ លានដុល្លារ ធ្លាក់ចុះ ៦ ភាគរយ បើធៀបនឹង ៣១,៣១ លានដុល្លារ (ធ្វើសវនកម្មរួច) កាលពីឆ្នាំ ២០១៩។ នេះបើតាម ក.ស.ភ។
លោក ហ៊ី បាវី អគ្គនាយកកំពង់ផែស្វយ័តភ្នំពេញ បាននិយាយថា ការធ្លាក់ចុះប្រាក់ចំណូលឆ្នាំ ២០២០ គឺដោយសារស្ថានភាពកូវីដ១៩ រីករាលដាលដែលធ្វើឱ្យប៉ះពាល់ដល់សកម្មភាពដឹកជញ្ជូនទំនិញ និងសេវាកម្មផ្សេងៗ៕