.jpg)
វិទ្យាស្ថានជាតិវិទ្យាសាស្ត្រ បច្ចេកវិទ្យា និងនវានុវត្តន៍នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានចុះអនុស្សរណៈនៃការយោគយល់គ្នា (MoU) ជាមួយសាកលវិទ្យាល័យអន្តរជាតិផារ៉ាហ្គន។
ភ្នំពេញៈ វិទ្យាស្ថានជាតិវិទ្យាសាស្ត្រ បច្ចេកវិទ្យា និងនវានុវត្តន៍នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានចុះអនុស្សរណៈនៃការយោគយល់គ្នា (MoU) ជាមួយសាកលវិទ្យាល័យអន្តរជាតិផារ៉ាហ្គន ក្នុងគោលបំណងដើម្បីសម្រេចបាននូវចក្ខុវិស័យអភិវឌ្ឍសេដ្ឋកិច្ចជាតិឆ្នាំ ២០៣០-២០៥០ តាមរយ:ការពង្រឹងវិស័យវិទ្យាសាស្ត្រ បច្ចេកវិទ្យា និងនវានុវត្តន៍។
ពិធីចុះ MoU ត្រូវបានប្រព្រឹត្តទៅតាមប្រព័ន្ធអនឡាញក្រោមអធិបតីភាពលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ ដោយ MoU នេះត្រូវបានចុះហត្ថលេខារវាងលោក គួក ហ្វីដេរ៉ូ អគ្គនាយកនៃវិទ្យាស្ថានជាតិវិទ្យាសាស្ត្រ បច្ចេកវិទ្យា និងនវានុវត្តន៍ និង លោក ដេត សុខឧត្តម សាកលវិទ្យាធិការនៃសាកលវិទ្យាល័យអន្តរជាតិផារ៉ាហ្គន។
លោក ចម ប្រសិទ្ធ បានបង្ហាញការសាទរយ៉ាងពេញទំហឹងចំពោះការចុះ MoU នេះ និងមានជំនឿថាកិច្ចសហការណ៍នេះ នឹងរួមចំណែកក្នុងការជំរុញការរៀបចំវេទិកាវិទ្យាសាស្ត្រ អភិវឌ្ឍសមត្ថភាពបុគ្គលិក លើកតម្កើងគុណតម្លៃនៃវិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីធានាបានការអភិវឌ្ឍប្រកបដោយចីរភាពរបស់ប្រទេសកម្ពុជា។
តាមរយៈ MoU នេះ ភាគីទាំង ២ នឹងធានាកិច្ចសហប្រតិបត្តិការដោយឈរលើគោលការណ៍អត្ថប្រយោជន៍ទៅវិញទៅមកលើចំណុចអាទិភាពរួមគ្នាមួយចំនួន ដូចជា ការស្រាវជ្រាវអនុវត្ត និងការអភិវឌ្ឍ, ការជំរុញលើកកម្ពស់វិស័យវិទ្យាសាស្ត្រ បច្ចេកវិទ្យា នវានុវត្តន៍ និងព័ត៌មានវិទ្យា, ការបណ្ដុះបណ្ដាល និងការសិក្សាអំពីវិទ្យាសាស្ត្រ បច្ចេកវិទ្យា នវានុវត្តន៍ និងព័ត៌មានវិទ្យា, ការអភិវឌ្ឍសមត្ថភាព ការបណ្ដុះបណ្ដាល និងការអភិវឌ្ឍជំនាញបុគ្គលិក, ការអនុវត្តចំណុចសកម្មភាពផ្សេងៗទៀត ដែលទទួលបានការឯកភាពដោយគូភាគី៕
