ភ្នំពេញៈ ក្រុមវិនិយោគិនក្នុងស្រុកមួយចំនួនធ្លាប់បានបង្ហាញបំណងបើកដំណើរការក្រុមហ៊ុនអាកាសចរណ៍ បន្ទាប់ពីផែនការវិនិយោគលើអាកាសយានដ្ឋានអន្តរជាតិតេជោក្រុងតាខ្មៅ (អាកាសយានដ្ឋានអន្តរជាតិភ្នំពេញថ្មី) ត្រូវបានលេចរូបរាងឡើងស្របនឹងការព្យាករកំណើនអ្នកដំណើររហូតដល់ទៅ ៣០ លាននាក់នៅឆ្នាំ ២០៣០ និង ៥០ លាននាក់នៅឆ្នាំ ២០៥០ ប៉ុន្តែបំណងទាំងនោះបានស្ងប់ស្ងាត់ទៅវិញ បន្ទាប់ពីការផ្ទុះឡើងនៃជំងឺកូវីដ ១៩ ដែលអូសបន្លាយរយៈពេលជិត ២ ឆ្នាំមកនេះ។ នេះបើយោងតាមមន្ត្រីជាន់ខ្ពស់នៃលេខាធិការដ្ឋានអាកាសចរស៊ីវិលកម្ពុជា។
អ្នកនាំពាក្យលេខាធិការដ្ឋានអាកាសចរស៊ីវិល លោក ស៊ិន ចាន់សេរីវុត្ថា បានប្រាប់ភ្នំពេញ-ប៉ុស្តិ៍ នាពេលថ្មីៗនេះថា មានក្រុមហ៊ុនឯកជនក្នុងស្រុកយ៉ាងហោច ២-៣ ក្រុមហ៊ុនបានចាប់អារម្មណ៍ចង់បើកក្រុមហ៊ុនអាកាសចរណ៍ ប៉ុន្តែត្រូវខកខានទៅវិញ ដោយសារការរីករាលដាលជំងឺកូវីដ ១៩។
លោកឱ្យដឹងទៀតថា ដោយសារគម្រោងអាកាសយានដ្ឋានអន្តរជាតិតេជោក្រុងតាខ្មៅមានភាពទាក់ទាញខ្លាំង ជាពិសេសទំហំ ភាពទំនើប និងមានស្តង់ដាខ្ពស់ អាចទទួលយន្តហោះខ្នាតធំបាន ទើបជំរុញឱ្យក្រុមហ៊ុនឯកជនមួយចំនួន ចាប់អារម្មណ៍វិនិយោគបើកក្រុមហ៊ុនអាកាសចរណ៍ថ្មីៗបន្ថែម ដើម្បីបម្រើដល់ការហោះហើរនាពេលអនាគត។
លោកបញ្ជាក់ថា៖ «បើស្ថានភាពល្អប្រសើរឡើងវិញ យើងឃើញមានចំណាប់អារម្មណ៍ក្នុងការបើកក្រុមហ៊ុន Airline (ក្រុមហ៊ុនអាកាសចរណ៍) ២ ទៅ ៣ ក្រុមហ៊ុនដែរ តែមិនទាន់ប្រាកដប្រជាដែរ ដូចដឹងស្រាប់ហើយថាក្រុមហ៊ុនអាកាសចរណ៍មានភាពប្រកួតប្រជែងខ្លាំង»។
ទោះជាយ៉ាងណា លោកមិនបានបង្ហាញអត្តសញ្ញាណរបស់វិនិយោគិនក្នុងស្រុកដែលធ្លាប់ជួបពិភាក្សានោះដែរ។
លោកបន្តថា យ៉ាងណាការបង្កើតក្រុមហ៊ុនអាកាសចរណ៍ច្រើនក៏អាស្រ័យលើកំណើននៃជើងហោះហើរ ពិសេសកំណើនឡើងវិញនៃការធ្វើដំណើរ បន្ទាប់ពីវិបត្តិកូវីដ ១៩ បានធូរស្រាល។
លោកបន្ថែមថា មុនពេលមានការរីករាលដាលកូវីដ ១៩ អាកាសចរស៊ីវិលបានព្យាករថា ក្នុងឆ្នាំ ២០២៣ អាកាសយានដ្ឋានអាចនឹងទទួលបានអ្នកដំណើរ ១៣ លាននាក់ នៅឆ្នាំ ២០៣០ ទទួលបាន ៣០ លាននាក់ និង ២០៥០ ទទួលបាន ៥០ លាននាក់។
លោកបន្តថា ការព្យាករនេះគឺឈរទៅលើមូលដ្ឋាននៃយន្តហោះ ដែលធ្លាប់ហោះមកកម្ពុជា ក៏ដូចជាការព្យាករទៅកំណើនសេដ្ឋកិច្ច និងភាពរីកចម្រើននៃវិស័យទេសចរណ៍កម្ពុជា។
បច្ចុប្បន្នកម្ពុជាមានក្រុមហ៊ុនអាកាសចរណ៍ជាតិរបស់ខ្លួនគឺ កម្ពុជាអង្គរអ៊ែរ ដែលបានបើកប្រតិបត្តិការនៅឆ្នាំ ២០០៩ ជាការវិនិយោគរួមគ្នារវាងរដ្ឋាភិបាលកម្ពុជា គ្រប់គ្រងភាគហ៊ុន ៥១ ភាគរយ និងក្រុមហ៊ុនអាកាសចរណ៍ Vietnam Airlines ដែលមានភាគហ៊ុន ៤៩ ភាគរយ ប៉ុន្តែក្រុមហ៊ុនអាកាសចរណ៍វៀតណាម បានប្រកាសលក់ភាគហ៊ុននៅក្រុមហ៊ុនកម្ពុជាអង្គរអ៊ែរ ប៉ុន្មានខែក្រោយវិបត្តិជំងឺកូវីដ ១៩ បានផ្ទុះឡើង។
ក្នុងកិច្ចប្រជុំគណៈរដ្ឋមន្ត្រីពីខែមេសា ឆ្នាំ ២០២០ លោក ស៊ិន ចាន់សេរីវុត្ថា បានប្រាប់ថា ការលក់ភាគហ៊ុនក្នុងក្រុមហ៊ុនកម្ពុជាអង្គរអ៊ែរ រួមទាំងយន្តហោះ A321 ចំនួន ៥ គ្រឿងមានតម្លៃសរុប ៣៧ លានដុល្លារ។
នៅគ្រាអញ្ជើញចុះទៅពិនិត្យវឌ្ឍនភាពនៃគម្រោងសាងសង់អាកាសយានដ្ឋានអន្តរជាតិតេជោក្រុងតាខ្មៅ នាខេត្តកណ្តាល កាលពីថ្ងៃទី ៩ ខែធ្នូ ឆ្នាំ ២០២១ លោកនាយករដ្ឋមន្ត្រី ហ៊ុន សែន បានថ្លែងថា នៅពេលគម្រោងសាងសង់អាកាសយានដ្ឋាន-អន្តរជាតិតេជោក្រុងតាខ្មៅ រួចរាល់ អាកាសយានដ្ឋាននេះនឹងអាចទទួលបានអ្នកដំណើរពី ១៣ លានទៅ ១៥ លាននាក់។
លោកនាយករដ្ឋមន្ត្រីបានលើកឡើងថា ការកសាងអាកាសយានដ្ឋានអន្តរជាតិថ្មីនេះ គឺជាការពង្រីកសមត្ថភាពក្នុងការទទួលជើងហោះហើរពីក្រៅប្រទេស ឬក្នុងប្រទេស ខណៈកន្លងមកសមត្ថភាពទទួលយន្តហោះនានារបស់អាកាសយានដ្ឋានដែលមានស្រាប់ទាំងនៅរាជធានីភ្នំពេញ និងខេត្តសៀមរាបនៅមានកម្រិតនៅឡើយ។
លោក ពុង ឃាវសែ អគ្គនាយកក្រុមហ៊ុនវិនិយោគទុនអាណិកជនកម្ពុជា (OCIC) ដែលជាក្រុមហ៊ុនវិនិយោគគម្រោងអាកាសយានដ្ឋានអន្តរជាតិតេជោក្រុងតាខ្មៅ ឱ្យដឹងថា មកដល់ពេលនេះគម្រោងសាងសង់នេះបានចំណាយថវិកាអស់ប្រមាណ ៣៧៥ លានដុល្លារនៃទំហំទឹកប្រាក់សម្រាប់សាងសង់សរុប ១ ៥០០ លានដុល្លារ។
ដើម្បីប្រមូលប្រភពហិរញ្ញវត្ថុសម្រាប់ពន្លឿនការសាងសង់ព្រលានយន្តហោះអន្តរជាតិតេជោក្រុងតាខ្មៅ ក្រុមហ៊ុនវិនិយោគអាកាសយានដ្ឋានកម្ពុជា (CAIC) បានដាក់ដំណើរការលក់សញ្ញាបណ្ណដែលមានទឹកប្រាក់ ៣០០ លានដុល្លារ ខណៈសញ្ញាបណ្ណតម្លៃជិត ១០០ លានដុល្លារត្រូវបានក្រុមហ៊ុនរដ្ឋ និងឯកជនទិញយកទៅកាន់កាប់។
បច្ចុប្បន្នគម្រោងនេះសម្រេចការសាងសង់បានជិត ៣០ ភាគរយ ដោយរំពឹងថា នឹងបញ្ចប់ការសាងសង់តាមការផែនការ ដែលបានកំណត់៕ LA