.jpg)
លោក Paul Kambur នាយកក្រុមហ៊ុន Bioterra Capital (ពីឆ្វេងទី៣) ជួបពិភាក្សាជាមួយ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី ៨ ធ្នូ។ រូបថត Sakhon Veng
ភ្នំពេញៈ ប្រធានរដ្ឋបាលព្រៃឈើ លោក កែវ អូម៉ាលីស្ស បានស្វាគមន៍ក្រុមហ៊ុនអាមេរិកដែលមានបំណងវិនិយោគលើការដាំដើមប្រេងខ្យល់ និងអាកាស្យាសម្រាប់ការកែច្នៃផ្គត់ផ្គង់ទីផ្សារក្នុងស្រុក និងនាំចេញ ដោយអះអាងថា កម្ពុជាមានផ្ទៃដីរាប់ម៉ឺនហិកតាសម្រាប់ដាំដុះ។
ការអះអាងរបស់លោក អូម៉ាលីស្ស ធ្វើឡើងបន្ទាប់ពីលោក Paul Kambur នាយកក្រុមហ៊ុន Bioterra Capital ជួបពិភាក្សាជាមួយ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដើម្បីស្នើសុំការណែនាំពីដំណើរការនៃការវិនិយោគលើឧស្សាហកម្មព្រៃឈើ ការដាំឈើឡើងវិញ ការកែច្នៃ និងនាំចេញ។
ក្នុងជំនួបនោះ លោក វេង សាខុន បានប្រាប់ឱ្យក្រុមហ៊ុន Bioterra Capital សហការជាមួយក្រុមហ៊ុនក្នុងស្រុក ដើម្បីទទួលបានដីសម្បទាន និងការសហការជាមួយរដ្ឋបាលព្រៃឈើសម្រាប់ការដាំឈើនៅតាមស្ថានីយ។
លោក កែវ អូម៉ាលីស្ស បានប្រាប់ភ្នំពេញប៉ុស្តិ៍ នៅថ្ងៃទី ១២ ខែធ្នូថា ជារឿងល្អដែលក្រុមហ៊ុនអាមេរិកចាប់អារម្មណ៍លើការវិនិយោគដាំឈើប្រេងខ្យល់ និងអាកាស្យានៅកម្ពុជា ព្រោះកម្ពុជាមានលក្ខណៈអំណោយផលលើការវិនិយោគច្រើនទាំងការនាំចេញ សណ្ឋានដី ជាពិសេសច្បាប់វិនិយោគថ្មីដែលបានបង្កភាពងាយស្រួល និងអំណោយផលដល់អ្នកវិនិយោគ។
លោកបន្ថែមថា៖ «នៅកម្ពុជាមានការដាំដុះដើមប្រេងខ្យល់ និងអាកាស្យាច្រើន ដោយនៅតាមដីរដ្ឋមានការដាំដើមឈើប្រភេទនេះប្រមាណជាង ១ ម៉ឺនហិកតា និងការដាំជាលក្ខណៈឯកជនរាប់ម៉ឺនហិកតាផ្សេងទៀត»។
លោកអះអាងថា ដើមប្រេងខ្យល់ និងអាកាស្យាត្រូវបានដាំដុះភាគច្រើននៅខេត្តកំពត ព្រះសីហនុ បាត់ដំបង ប៉ៃលិន កោះកុង បន្ទាយមានជ័យ ក្រចេះ កំពង់ឆ្នាំង និងព្រៃវែង។
លោកបន្តថា ប្រេងខ្យល់ និងអាកាស្យា គឺជាប្រភេទឈើសំខាន់សម្រាប់ប្រើប្រាស់ធ្វើជាអុស ដើម្បីផ្គត់ផ្គង់ថាមពលក្នុងវិស័យឧស្សាហកម្ម បន្ទាប់មកអាចយកទៅធ្វើជាក្រដាស គ្រឿងសង្ហារិម ឬធ្វើជាចន្ទល់ជាដើម។
លោកបន្ថែមទៀតថា សម្រាប់ការដាំ ដើម្បីធ្វើជាឈើចន្ទល់ត្រូវចំណាយរយៈពេល ២,៥ ឆ្នាំ ហើយបើដាំសម្រាប់យកទៅច្នៃធ្វើជាគ្រឿងសង្ហារិម គឺត្រូវចំណាយពេលពី ៥ ទៅ ៧ ឆ្នាំ។
បើតាមលោក អូម៉ាលីស្ស បច្ចុប្បន្នមានក្រុមហ៊ុនមិនតិចជាង ១០ នោះទេ ដែលកំពុងវិនិយោគលើការដាំដើមប្រេងខ្យល់ និងអាកាស្យា ដោយក្រុមហ៊ុនទាំងនេះ ភាគច្រើនវិនិយោគលើការដាំដុះនៅខេត្តបាត់ដំបង ប៉ៃលិន និងបន្ទាយមានជ័យ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានលើកឡើងថា ក្រសួងកសិកម្ម នឹងរង់ចាំសហការ និងគាំទ្រលើគម្រោងនេះ ធ្វើយ៉ាងណាឱ្យក្រុមហ៊ុនអាចសម្រេចបានភាពជោគជ័យ៕ LA
