ភ្នំពេញៈ ធនាគារ ABA ដែលជាគ្រឹះស្ថានហិរញ្ញវត្ថុកម្ពុជាឈានមុខ និងជាសម្ព័ន្ធធនាគារជាតិកាណាដាកាលពីថ្ងៃទី ៧ ខែធ្នូបានក្លាយជាធនាគារពាណិជ្ជទី ២ របស់កម្ពុជាត្រូវបានផ្ដល់ចំណាត់ថ្នាក់ដោយ Standard & Poor''s ជាទីភ្នាក់ងារវាយតម្លៃចំណាត់ថ្នាក់ពិភពលោកអំពីកម្រិតឥណទានរយៈពេលវែង ក្នុងកម្រិត «B+» ជាមួយនឹងចក្ខុវិស័យប្រកបដោយស្ថិរភាព។
ការវាយម្លៃនេះ ធ្វើឡើងរយៈពេលប្រហែល ៣ សប្តាហ៍បន្ទាប់ពីការផ្ដល់ចំណាត់ថ្នាក់ឥណទាន «BB» និងការវាយតម្លៃឥណទានកម្រិត «B+/Stable /B» សម្រាប់ធនាគារអេស៊ីលីដា ភីអិលស៊ី។
យោងតាមសេចក្តីប្រកាសព័ត៌មានរបស់ធនាគារ ABA កាលពីថ្ងៃទី ១៣ ខែធ្នូ ចក្ខុវិស័យស្ថិរភាពឆ្លុះបញ្ចាំងពីទស្សនៈរបស់ S&P ដែលថា ធនាគារមួយនេះនឹងគ្រប់គ្រងប្រកបដោយចីរភាពនូវកំណើនប្រាក់កម្ចី និងប្រាក់បញ្ញើយ៉ាងរហ័សទោះបីប្រទេសកម្ពុជា ងើបចេញពីជំងឺកូវីដ ១៩ ក៏ដោយ។ អ្នកស្រាវជ្រាវជឿជាក់ថា កម្មវិធីឌីជីថលរបស់ធនាគារ ABA ទទួលបានអត្ថប្រយោជន៍ឈានមុខគេដែលគាំទ្រដល់ការពង្រីកកម្ចី និងបញ្ញើ។ ដោយប្រៀបធៀបនឹងគូប្រជែងក្នុងប្រទេស ធនាគារនេះក៏មានដាក់ឱ្យអនុវត្តនូវប្រព័ន្ធគ្រប់គ្រងហានិភ័យសមស្របបំផុត រួមមានការវិភាគរំហូរសាច់ប្រាក់ ដើម្បីគាំទ្រដល់ការសម្រេចចិត្តឥណទានរបស់ខ្លួន។
ផ្អែកលើរបាយការណ៍មកពី S&P ការពង្រឹងបណ្ដាញរបស់ ABA ទទួលបានភាពលេចធ្លោដោយកំណើនប្រកបដោយស្ថិរភាពនៅក្នុងចំណែកទីផ្សារ ពាក់ព័ន្ធនឹងកម្ចី និងបញ្ញើ, បណ្ដាញបម្រើសេវារូបវន្ត និងឌីជីថល និងមូលដ្ឋានអតិថិជន។
S&P បានឱ្យដឹងថា៖ «ដោយរួមផ្សំជាមួយប្រសិទ្ធភាពប្រតិបត្តិការ កត្តាទាំងនេះ គាំទ្រ និងជំរុញលទ្ធផលឈានមុខរបស់ខ្លួន។ អ្នកជំនាញ ក៏វាយតម្លៃខ្ពស់ដល់គណៈគ្រប់គ្រងថា មានជំនាញ សមត្ថភាព និងភាពបត់បែនដែលពុះពារ រាល់លក្ខខណ្ឌ ឬបរិយាកាសប្រតិបត្តិការ ក្នុងអំឡុងវិបត្តិរីករាលដាលជាសកល និងជឿជាក់ថា ការគ្រប់គ្រងជាមួយកិច្ចគាំទ្រពីធនាគារជាតិកាណាដា ទាំងនៅក្នុងក្រុមប្រឹក្សាភិបាល និងគណៈសវនកម្មរបស់ ABA ជួយគាំទ្រដល់ការសម្រេចចិត្តផ្អែកលើហានិភ័យនៅធនាគារ ABA»។
យោងតាមការចេញផ្សាយការស្រាវជ្រាវ អ្នកជំនាញរបស់ S&P បានលើកឡើង ជាពិសេសអំពីស្ថានភាពធុរកិច្ចដ៏មានស្ថិរភាព និងសក្តានុពលកំណើនបន្ថែមរបស់ធនាគារ ABA។
លោក Zhiger Atchabarov នាយកប្រតិបត្តិការអន្តរជាតិនៃធនាគារ ABA បានឱ្យដឹងថា ចំណាត់ថ្នាក់ឥណទានអន្តរជាតិ ឆ្លុះបញ្ចាំងពីទស្សនៈឯករាជ្យលើភាពជាទីពឹង និងឥណទានគួរជាទីទុកចិត្តរបស់ធនាគារ។ ហើយការបញ្ជាក់ជាថ្មីលើកម្រិតឥណទានពី S&P ឆ្នាំនេះ ស្ដែងឱ្យឃើញពីស្ថិរភាពនៃយុទ្ធសាស្ត្រធុរកិច្ច និងភាពបត់បែនដែលឆ្លើយតបតាមការផ្លាស់ប្ដូរនានា។
លោកលើកឡើងថា៖ «ទោះជាឆ្លងកាត់បញ្ហាកូវីដ យើងនៅតែអាចរក្សាគុណភាពខ្ពស់នៃទ្រព្យសកម្ម អនុវត្តអភិបាលកិច្ចបានត្រឹមត្រូវ និងការពង្រឹងស្ថិរភាពហិរញ្ញវត្ថុរបស់យើង ដែលជាការត្រៀមខ្លួនយ៉ាងល្អសម្រាប់ កំណើនបន្ថែម»។
ភ្នាក់ងារវាយតម្លៃ អន្តរជាតិ S&P បានផ្តល់ចំណាត់ថ្នាក់ឥណទានកម្រិត «B» ដល់ធនាគារ ABA កាលពីឆ្នាំ ២០១៧។ ចំណាត់ថ្នាក់នេះត្រូវបានដំឡើងដល់កម្រិត «B+» កាលពីឆ្នាំ ២០១៩ ផ្អែកលើកំណើន និងចំណែកទីផ្សារជាសារវន្តនៃប្រាក់កម្ចី និងប្រាក់បញ្ញើជាមួយប្រាក់ចំណេញលើសពីមធ្យម។
របាយការណ៍ CSX កាលពីថ្ងៃទី ១៨ ខែសីហា ធនាគារ ABA បានឱ្យដឹងថា ការប្រាក់សរុប និងប្រាក់ចំណូលសរុបបានកើនឡើងដល់ ៤៤៣,៩៣៨ និង ១៩៥,២៤៨ ពាន់លានរៀល (១០៩ និង ៤៨ លានដុល្លារ នៅក្នុងត្រីមាសនេះកើន ២៩ ភាគរយនិង ៤២ ភាគរយរៀងគ្នាបើធៀបនឹងរយៈពេលដូចគ្នាកាលពីឆ្នាំមុន។ ប្រាក់ចំណេញសុទ្ធ «បន្តកើនឡើងជាលំដាប់» ក្នុងអំឡុងពេលនេះ។ ធនាគារបានកត់ត្រាប្រាក់ចំណូលចំនួន ៩៣ លានដុល្លារក្នុងអំឡុងពេលពីខែមករាដល់ខែមិថុនា៕LA