.jpg)
ភ្ញៀវទេសចរកំពុងលេងកម្សាន្តនៅឆ្នេរសមុទ្រ ខេត្តកែប។ ហុង មិនា
ភ្នំពេញៈ មន្ត្រីក្នុងវិស័យទេសចរណ៍តាមបណ្តាខេត្តគោលដៅទេសចរណ៍សំខាន់ៗបានលើកឡើងថា ខណៈព្រឹត្តិការណ៍ស្វាគមន៍ឆ្លងឆ្នាំសកល ២០២១ កាន់តែខិតជិតមកដល់ ខេត្តរបស់ពួកគេនៅមិនមានផែនការរៀបចំព្រឹត្តិការណ៍ ឬកម្មវិធីអ្វីធំដុំទេ ប៉ុន្តែការចុះទៅពង្រឹងការអនុវត្ត SOP ដល់ប្រតិបត្តិករដែលបម្រើសេវាផ្សេងៗត្រូវបានធ្វើជាប្រចាំ ដើម្បីចូលរួមទប់ស្កាត់ការផ្ទុះរីករាលដាលនៃជំងឺកូវីដ ១៩។
លោក សោម ពិសិដ្ឋ អភិបាលខេត្តកែបបានប្រាប់ថា មកដល់ពេលនេះខេត្តកែប នៅមិនទាន់មានផែនការរៀបចំព្រឹត្តិការណ៍ស្វាគមន៍ និងអបអរសាទរឆ្លងឆ្នាំ ២០២១ ទេ ព្រោះការរីករាលដាលជំងឺកូវីដ ១៩ ស្ថិតក្នុងភាពប្រុងប្រយ័ត្ននៅឡើយ។ លោកបន្តថា បើសិនខេត្តរៀបចំព្រឹត្តិការណ៍ណាមួយនោះវាហាក់ដូចជាការលើកទឹកចិត្តឱ្យមានការជួបជុំមនុស្ស ដូច្នេះខេត្តមានតែលើកទឹកចិត្តឱ្យប្រជាជនមកលេងកម្សាន្តធម្មតា និងណែនាំឱ្យមានវិធានការការពារកុំឱ្យឆ្លងជំងឺកូវីដ ១៩។
លោកថ្លែងថា៖ «បើយើងរៀបចំឱ្យមានការប្រគំតន្ត្រី ច្រៀងរាំ និងពិព័រណ៍នានា យើងដូចជាលើកទឹកចិត្ត។ អ៊ីចឹងស្ថានភាពនេះ ខ្ញុំគិតថា រង់ចាំមានការណែនាំ ឬនិងរង់ចាំស្ថានភាពជាក់ស្តែងពីក្រសួងស្ថាប័នជំនាញដូចជាក្រសួងទេសចរណ៍ និងក្រសួងសុខាភិបាលសិន»។
ស្រដៀងគ្នានេះប្រធានមន្ទីរទេសចរណ៍ខេត្តកំពត លោក សយ ស៊ីណុល បានប្រាប់ថា សម្រាប់ខេត្តកំពតមិនមានការរៀបចំព្រឹត្តិការណ៍ណាមួយទទួលភ្ញៀវទេសចរកម្សាន្តទេ ព្រោះវាស្ថិតក្នុងភាពប្រយ័ត្នប្រយែងនៅឡើយ។ ទោះជាយ៉ាងណាលោកលើកឡើងថា ទោះបីគ្មានរៀបចំសកម្មភាព និងព្រឹត្តិការណ៍ក៏ខេត្តកំពតនឹងទទួលភ្ញៀវទេសចរមកលេងកម្សាន្តក្នុងចំនួនច្រើនផងដែរ ព្រោះខេត្តនេះមានតំបន់ទេសចរណ៍ និងរមណីយដ្ឋានមានចំនួនច្រើន។
ចំណែកប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្រគ្រឹះស្នា ឱ្យដឹងដែរថា រហូតមកដល់ពេលនេះលោកមិនទាន់ទទួលបានព័ត៌មានពីការរៀបចំព្រឹត្តិការណ៍អបអរសាទរឆ្លងឆ្នាំសកលនៅឡើយទេ ប៉ុន្តែលោកបានឃើញផ្នែកឯកជនដាក់ពាក្យស្នើសុំរៀបចំប្រគំតន្ត្រី និងតាំងពិព័រណ៍ទៅរដ្ឋបាលខេត្តដែរ។
ដោយឡែកលោក ស៊ន សារុន នាយករដ្ឋបាលខេត្តមណ្ឌលគិរីបានឱ្យដឹងថា សម្រាប់ខេត្តមណ្ឌលគិរី គឺមានគម្រោងរៀបចំព្រឹត្តិការណ៍មួយចំនួនដែរនៅក្នុងឱកាសពិធីបុណ្យឆ្លងឆ្នាំ ២០២១ ខាងមុខ ដូចជា ការតាំងពិព័រណ៍ និងប្រគំតន្ត្រី ជាដើម ប៉ុន្តែមិនធ្វើធំទេ ដើម្បីអនុញ្ញាតឱ្យប្រជាពលរដ្ឋមានឱកាសចូលលេងកម្សាន្ត ក្រៅពីទៅកម្សាន្តនៅតំបន់រមណីយដ្ឋាន។
លោកបន្តថា បច្ចុប្បន្នរដ្ឋបាលខេត្តកំពុងរៀបចំហេដ្ឋារចនាសម្ព័ន្ធ និងកែលម្អបំពាក់ភ្លើងបំភ្លឺតាមផ្លូវនានា ដើម្បីផ្តល់ភាពសប្បាយរីករាយ និងត្រៀមរក្សាសន្តិសុខដល់ភ្ញៀវ។ ទោះយ៉ាងណាសម្រាប់ខេត្តមណ្ឌលគិរីក៏មានការខ្វះខាតទីតាំងស្នាក់នៅផងដែរ ព្រោះប្រជាពលរដ្ឋមកលេងកម្សាន្តមានចំនួនច្រើន។
លោកបានថ្លែងថា៖ «សណ្ឋាគារ ផ្ទះសំណាក់ និងភោជនីយដ្ឋានរបស់យើងនៅមិនទាន់ឆ្លើយតបនឹងតម្រូវការបានទេ។ ទោះបីយ៉ាងណាឥឡូវប្រជាជនមួយចំនួននៅពេលគាត់ទៅលេងកន្លែងណា គាត់តែងត្រៀមតង់តែម្តង អ៊ីចឹងអត់បញ្ហាទេ»។
នាយករដ្ឋបាលខេត្តសៀមរាបលោក ស៊ុន ចំណាន បានឱ្យដឹងថា សម្រាប់ខេត្តសៀមរាបដែលជាខេត្តគោលដៅទេសចរណ៍វប្បធម៌ ក៏នឹងមានរៀបចំព្រឹត្តិការណ៍នៅទីតាំងសំខាន់ៗមួយចំនួនដែរ ដើម្បីឱ្យភ្ញៀវទេសចរលេងកម្សាន្ត និងអបអរសាទរពិធីបុណ្យឆ្លងឆ្នាំសកលខាងមុខ។
លោកបានរំពឹងថា ភ្ញៀវទេសចរមកលេងកម្សាន្តក្នុងខេត្តសៀមរាបនឹងមានចំនួនច្រើននៅពេលបុណ្យឆ្លងឆ្នាំនេះ ព្រោះស្របជាមួយនឹងការបើកសម្ពោធដាក់ឱ្យប្រើប្រាស់ផ្លូវទាំង ៣៨ ក្នុងក្រុងសៀមរាបនាថ្ងៃទី ២៩ ខែធ្នូ ឆ្នាំ ២០២១ ខាងមុខ។
លោក តុប សុភ័ក អ្នកនាំពាក្យក្រសួងទេសចរណ៍ បានប្រាប់ ភ្នំពេញ ប៉ុស្តិ៍ នៅថ្ងៃទី ១៣ ខែធ្នូថា លោកមិនទាន់ទទួលបានព័ត៌មានពីបណ្តាខេត្តស្តីពីការរៀបចំព្រឹត្តិការណ៍ឆ្លងឆ្នាំនៅឡើយទេ ប៉ុន្តែជាធម្មតានៅដំណាច់ឆ្នាំនីមួយៗ រដ្ឋបាលខេត្តគោលដៅទេសចរណ៍តែងរៀបចំកម្មវិធីអបអរសាទរឆ្លងឆ្នាំនៅក្នុងលក្ខណៈណាមួយដែលអាចគ្រប់គ្រងបាន។
លោកបន្តទៀតថា ក្រសួងរំពឹងថា នៅអំឡុងពេលបុណ្យឆ្លងឆ្នាំសកលខាងមុខភ្ញៀវទេសចរផ្ទៃក្នុងនឹងនៅតែបន្តចេញដើរលេងកម្សាន្តតាមគោលដៅខេត្តទេសចរណ៍នានា ដូចជាខេត្តនៅជាប់មាត់សមុទ្រ ខេត្តសៀមរាប និងខេត្តមណ្ឌលគិរី ជាដើម ព្រោះរៀងរាល់ចុងសប្តាហ៍មានប្រជាជនជាច្រើនបានចេញដើរកម្សាន្ត៕ LA
វីដេអូ៖
