ភ្នំពេញៈ គណៈកម្មាធិការជាតិគ្រប់គ្រងកម្មសិទ្ធិបញ្ញានៃក្រសួងពាណិជ្ជកម្ម បានចុះអនុស្សរណៈនៃការយោគយល់គ្នា (MoU) ជាមួយអង្គការកម្មសិទ្ធិបញ្ញាពិភពលោក ដើម្បីអនុវត្តផែនការសកម្មភាព និងគោលនយោបាយកម្មសិទ្ធិបញ្ញាកម្ពុជា សម្រាប់កិច្ចសហប្រតិបត្តិការផ្នែកបច្ចេកទេស។
ការចុះ MoU នេះបានធ្វើឡើងកាលពីថ្ងៃទី ៩ ខែធ្នូ ឆ្នាំ ២០២១ តាមរយៈប្រព័ន្ធវីដេអូ រវាង លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក Daren Tang អគ្គនាយកអង្គការកម្មសិទ្ធិបញ្ញាពិភពលោក។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញ-ប៉ុស្តិ៍ថា ការចុះ MoU ជាមួយអង្គការកម្មសិទ្ធិបញ្ញាពិភពលោកនេះ គឺដោយសារកម្ពុជាត្រូវការជំនួយបច្ចេកទេសបន្ថែមពាក់ព័ន្ធនឹងការកសាងសមត្ថភាពមន្ត្រី, ការជំរុញបច្ចេកទេសលើការរៀបចំប្រព័ន្ធផ្សេងៗតាមបច្ចេកវិទ្យាថ្មីៗ, ការរៀបចំលិខិតបទដ្ឋានគតិយុត្ត ដើម្បីឆ្លើយតបនឹងបម្រែបម្រួលផ្សេងៗ និងការពិនិត្យមើលលើជំនួយឧបត្ថម្ភផ្សេងៗទៀត។
លោកបន្តថា កម្ពុជាមានច្បាប់គោលមួយចំនួនសម្រាប់ការពារកម្មសិទ្ធិបញ្ញារួចហើយ ដូចជា ច្បាប់ម៉ាកពាណិជ្ជនាម និងអំពើប្រកួតប្រជែងមិនស្មោះត្រង់,ច្បាប់ប្រកាសនីយបត្រតក្កកម្ម និងគំនូរឧស្សាហកម្ម, ច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែល, ច្បាប់ម៉ាកសម្គាល់ភូមិសាស្ត្រទំនិញ, និងច្បាប់ការពារពូជដំណាំថ្មី ជាដើម។ បច្ចុប្បន្នក្រសួងពាណិជ្ជកម្មក៏កំពុងរៀបចំច្បាប់ការពារការសម្ងាត់ពាណិជ្ជកម្ម និងព័ត៌មានមិនបើកចំហផងដែរ។
ចំពោះការអនុវត្តច្បាប់ទាំងនេះ ត្រូវបានលោក ប៉ែន សុវិជាតិ អះអាងថា កម្ពុជាជាប្រទេសឈានមុខគេនៅក្នុងតំបន់ទាក់ទងនឹងការការពារកម្មសិទ្ធិបញ្ញានេះ។ លោកអះអាងថា៖ «កម្ពុជាយើងនៅក្នុងតំបន់ត្រូវបានគេចាត់ទុកជាប្រទេសឈានមុខគេក្នុងការការពារកម្មសិទ្ធិបញ្ញា មានន័យថា យើងសកម្មជាងគេក្នុងការការពារកម្មសិទ្ធិបញ្ញា ដូច្នេះការអនុវត្តកាតព្វកិច្ចរបស់យើងក្រោម WIPO (World Intellectual Property Organization) យើងជាប្រទេសមួយដែលគេទទួលស្គាល់ថាអនុវត្តបានល្អជាងគេ»។
លោក ហៃ លីអ៊ាង អគ្គនាយកក្រុមហ៊ុនកសិកម្ម Confirel បានឱ្យភ្នំពេញ-ប៉ុស្តិ៍ដឹងដែរថា ការចុះអនុស្សរណៈយោគយល់គ្នាជាមួយអង្គការកម្មសិទ្ធិបញ្ញាពិភពលោក គឺជាការជំរុញទឹកចិត្តបន្ថែមទៀតដល់អ្នកដែលខិតខំប្រឹងលើការងារស្រាវជ្រាវ និងបង្កើតស្នាដៃថ្មីដោយខ្លួនឯង ព្រោះកម្ពុជាសម្បូរកម្មសិទ្ធិបញ្ញាទាំងស្នាដៃស្រាវជ្រាវ ការបង្កើតផលិតផលនានា និងការបង្កើតស្នាដៃផ្នែកសិល្បៈជាដើម។
យ៉ាងណាមិញលោកបញ្ជាក់ថា ថ្វីដ្បិតតែកម្ពុជាបានខិតខំប្រឹងចងក្រងបង្កើតច្បាប់គោលជាច្រើនក្នុងគោលបំណងការពារកម្មសិទ្ធិបញ្ញានេះ ប៉ុន្តែលោកយល់ថា ការអនុវត្តរបស់អាជ្ញាធរនៅមានកម្រិត ព្រោះនៅមានផលិតផលក្លែងបន្លំម៉ាកសញ្ញាជាច្រើននៅលើទីផ្សារ និងការលួចស្នាដៃរបស់អ្នកដទៃយកទៅធ្វើជារបស់ខ្លួនជាដើម។
លោកបន្ថែមថា៖ «យើងអនុវត្តបានតិចតួចណាស់ ដោយសារតែសង្គមយើងមិនទាន់ឱ្យតម្លៃទៅលើកម្មសិទ្ធិបញ្ញា ហើយសង្គមឱ្យតម្លៃទៅលើកម្មសិទ្ធិបញ្ញាបានទាល់តែអាជ្ញាធរត្រូវធ្វើយ៉ាងណាឱ្យមានការគោរពកម្មសិទ្ធិបញ្ញាជាដាច់ខាត។ ឧទាហរណ៍ម្រេចកំពតជាដើម ឃើញចរាចរណ៍នៅលើទីផ្សារច្រើនជាងផលិតផលដែលមានដូចនេះមានការក្លែងបន្លំច្រើន»។
លោកក៏ស្នើដល់អាជ្ញាធរពាក់ព័ន្ធឱ្យបង្កើនការពង្រឹងបន្ថែមទៀត ចំពោះការអនុវត្តច្បាប់កម្មសិទ្ធិបញ្ញាដែលបង្កើតហើយឱ្យមានប្រសិទ្ធភាពខ្ពស់ ចៀសវាងការបង្ខូចឈ្មោះ ឬម៉ាកផលិតផលរបស់ខ្មែរនៅលើទីផ្សារ។
បើតាមអ្នកនាំពាក្យក្រសួងពាណិជ្ជកម្មនៅកម្ពុជាការរំលោភកម្មសិទ្ធិបញ្ញាត្រូវរងការផាកពិន័យ ដែលអនុវត្តដោយអគ្គនាយកកិច្ចការពារអ្នកប្រើប្រាស់អំពើប្រកួតប្រជែង និងបង្ក្រាបក្លែងបន្លំ ដែលជាអ្នកអនុវត្តផ្ទាល់ និងអគ្គនាយកគយ និងរដ្ឋាករដែលស្ថាប័ននេះមានសិទ្ធិចាប់ផាកពិន័យ ទោះបីជាមាន ឬមិនមានពាក្យបណ្តឹងពីម្ចាស់សិទ្ធិក៏ដោយ៕ LA