ភ្នំពេញៈ កំណើននៃតម្រូវការវត្ថុធាតុដើមសម្រាប់ដំណើរការផលិតកម្ម និងកែច្នៃ ព្រមទាំងការបញ្ជាទិញពីដៃគូបានធ្វើឱ្យចំនួនទឹកប្រាក់ពីការនាំចូល-នាំចេញរបស់បណ្តាសហគ្រាសនៅក្នុងតំបន់សេដ្ឋកិច្ចពិសេសក្រុងព្រះសីហនុ (SSEZ) រយៈពេល ១១ ខែ ឆ្នាំ ២០២១ សម្រេចបានជាង ២ ពាន់លានដុល្លារ កើនជិតពាក់កណ្តាលបើធៀបរយៈពេលដូចគ្នាឆ្នាំ ២០២០។
ទិន្នន័យចុងក្រោយពី SSEZ កាលពីចុងសប្តាហ៍មុនបង្ហាញថា ចាប់ពីខែមករា ដល់ខែវិច្ឆិកា ឆ្នាំ ២០២១ បរិមាណនៃការនាំចូល-នាំចេញទំនិញរបស់រោងចក្រ/សហគ្រាស នៅក្នុងតំបន់សេដ្ឋកិច្ចពិសេសក្រុងព្រះសីហនុមានតម្លៃសរុប ២ ០០១ លានដុល្លារ កើន ៤០,០៣ ភាគរយបើធៀបនឹងរយៈពេលដូចគ្នាឆ្នាំមុនដែលមានចំនួន ១ ៤២៩ លានដុល្លារ។
SSEZ បានសរសេរថា៖ «តំបន់សេដ្ឋកិច្ចពិសេសព្រះសីហនុប្តេជ្ញានឹងខិតខំបន្តរក្សានូវកំណើននៃការនាំចេញ-នាំចូលទំនិញឱ្យកើនឡើងខ្ពស់បន្ថែមទៀត»។ លោក ហុង វណ្ណៈ អ្នកស្រាវជ្រាវសេដ្ឋកិច្ច-អន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា បានប្រាប់ភ្នំពេញប៉ុស្តិ៍ ក្នុងថ្ងៃទី ១៣ ខែធ្នូថា ទោះបីជាស្ថានភាពការឆ្លងរាលដាលជំងឺកូវីដ ១៩ នៅបន្តការគំរាមកំហែងដល់កំណើនសេដ្ឋកិច្ចកម្ពុជា និងពិភពលោកទាំងមូលក៏បរិមាណការនាំចូល-នាំចេញទំនិញរបស់ SSEZ នៅតែបង្ហាញសញ្ញាវិជ្ជមានជាប្រចាំ។ លោកបន្តថា ផ្អែកតាមទិន្នន័យខាងលើ ការនាំចូលនាំចេញអាចកើនឡើងដូចគ្នា ខណៈការកើនឡើងចំនួនទឹកប្រាក់នាំចូល វាមិនមែនជារឿងអាក្រក់ទេ ដោយសារការនាំចូលរបស់រោងចក្រ/សហគ្រាស គឺជាវត្ថុធាតុដើមសម្រាប់ចូលរួមក្នុងចង្វាក់ផលិតកម្ម។ ការកើនឡើងទំហំនៃទឹកប្រាក់នាំចូលវត្ថុធាតុដើមកាន់តែច្រើនបង្ហាញថា ការបញ្ជាទិញពីសំណាក់ដៃគូមានកាន់តែច្រើនដែរ។
លោកថ្លែងថា៖ «កំណើនទឹកប្រាក់នាំចូល-នាំចេញសរុបដល់ជាង ៤០ ភាគរយរបស់ SSEZ បញ្ជាក់ថា ផលិតផល និងសេវាកម្មដែលជារបស់រោងចក្រ/សហគ្រាសនៅទីនោះមានការបញ្ជាទិញច្រើន»។
ខេត្តព្រះសីហនុត្រូវរំពឹងថា នឹងអាចស្រូបទាញការចូលទៅបណ្តាក់ទុនកាន់តែច្រើនក្នុងពេលឆាប់ៗ ខណៈកាលពីខែមិថុនា ឆ្នាំ ២០២១ លោកនាយករដ្ឋមន្ត្រី ហ៊ុន សែន បានចុះហត្ថលេខាលើអនុក្រឹត្យដែលនឹងប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសពហុគោលបំណង។ បច្ចុប្បន្នក្នុងខេត្តព្រះសីហនុ មានគម្រោងសាងសង់ធំៗជាច្រើនដូចជា ហេដ្ឋារចនាសម្ព័ន្ធផ្លូវថ្នល់ សំណង់អគារធំៗ និងជាពិសេសគម្រោងពង្រីកកំពង់ផែកុងតឺន័រសមុទ្រទឹកជ្រៅដែលគ្រោងនឹងចាប់ផ្តើមនៅដើមឆ្នាំ ២០២២។ បន្ថែមពីលើនេះរដ្ឋាភិបាលក៏ទើបបានប្រកាសដាក់ឱ្យអនុវត្តនូវច្បាប់វិនិយោគថ្មី ដែលគេដឹងថា មានការលើកទឹកចិត្តច្រើនសម្រាប់អ្នកវិនិយោគ។
ប្រធានសមាគមភ័ស្តុភារកម្មកម្ពុជា (CLA) លោក ស៊ិន ចន្ធី និយាយថា ស្ថានភាពសេដ្ឋកិច្ច និងការដឹកជញ្ជូននៅកម្ពុជាចាប់ផ្តើមមានដំណើរល្អស្ទើរដូចមុនពេលមានវិបត្តិកូវីដ ១៩ ហើយ ដោយការដឹកជញ្ជូនទំនិញចូល ចេញក្រៅប្រទេសមានដំណើរការមមាញឹកគួរឱ្យកត់សម្គាល់។ លោកបន្តថា ភាពល្អប្រសើរនេះដោយសារការគ្រប់គ្រង និងការចាក់វ៉ាក់សាំងប្រឆាំងនឹងកូវីដ-១៩ នៅកម្ពុជាមានភាពជោគជ័យល្អ ដែលសកម្មភាពនេះមិនត្រឹមតែធ្វើឱ្យចង្វាក់ផលិតកម្មមានសមត្ថភាពឆ្លើយតបនឹងការបញ្ជាទិញប៉ុណ្ណោះទេ ប៉ុន្តែថែមទាំងជាកម្លាំងចលករស្រូបទាញវិនិយោគិនឱ្យមកបណ្តាក់ទុនផងដែរ។
លោកថ្លែងថា៖ «កំណើនការដឹកជញ្ជូនគឺបញ្ជាក់ពីកំណើនសេដ្ឋកិច្ច។ បើការដឹកជញ្ជូនមានសម្ទុះខ្លាំង ការផលិតក៏ខ្លាំងទៅតាមនោះដែរ»។
ក្នុងឆ្នាំ ២០២០ ការនាំចេញ-នាំចូលរបស់ SSEZ មានទឹកប្រាក់សរុប ១ ៥៦៥ លានដុល្លារកើនឡើង ២៦,៥២ ភាគរយធៀបនឹងឆ្នាំ ២០១៩។
គិតមកដល់ត្រឹមឆ្នាំ ២០២១ តំបន់សេដ្ឋកិច្ចពិសេសដែលបានបង្កើតនៅទូទាំងប្រទេសកម្ពុជា មានចំនួនសរុប ៣៩។ នេះបើតាមក្រុមប្រឹក្សាអភិវឌ្ឍន៍កម្ពុជា (CDC)៕ LA