ភ្នំពេញៈ អ្នកនៅក្នុងវិស័យទេសចរណ៍ក្នុងស្រុកបានលើកឡើងថា ការផ្តល់ចំណាត់ថ្នាក់កំពូលឱ្យអង្គរវត្ត ជាប្រាសាទល្បីល្បាញជាងគេនៅក្នុងទ្វីបអាស៊ីរបស់គេហទំព័រ Touropia Travel Guides គឺជាធាតុផ្សំថ្មីបន្ថែមទៀតក្នុងការបង្កើនសក្តានុពលភាពទាក់ទាញភ្ញៀវទេសចរបរទេសឱ្យចូលមកកម្សាន្តនៅកម្ពុជាកាន់តែច្រើន។
គេហទំព័រ Touropia Travel Guides កាលពីពេលថ្មីៗនេះបានឱ្យដឹងថា លទ្ធផលនៃការសិក្សារបស់ខ្លួនបង្ហាញថា ប្រាសាទអង្គរវត្តកម្ពុជាជាប់ចំណាត់ថ្នាក់លេខ ១ ជាប្រាសាទល្បីល្បាញជាងគេបំផុតនៅក្នុងទ្វីបអាស៊ី ខណៈលេខ ២ ប្រាសាទ Borobudur (ឥណ្ឌូនេស៊ី), លេខ ៣ Baalbek (លីបង់), លេខ ៤ Harmandir Sahib (ឥណ្ឌា) និងលេខ ៥ Kinkakuji ឬ Golden Pavilion (ជប៉ុន)។
ចំណែកលេខ ៦ ប្រាសាទ Heaven (ចិន), លេខ ៧ Wat Phra Kaew ឬ Emerald Buddha(ថៃ), លេខ ៨ Taktsang Dzong ឬ Tiger''s Nest (ប៊ូតាន), លេខ ៩ Ranakpur (ឥណា្ឌ) និងលេខ ១០ ប្រាសាទ Lotus (ឥណ្ឌា)។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាបានប្រាប់ភ្នំពេញប៉ុស្តិ៍ នាថ្ងៃទី ១៤ ខែធ្នូថា លទ្ធផលសិក្សារបស់ Touropia Travel Guides គឺជាតថភាពមួយថ្មីទៀតដែលនឹងចូលរួមចំណែកផ្តល់ព័ត៌មានទៅសាធារណជន ពិសេសភ្ញៀវទេសចរចំពោះសក្តានុពលនៃប្រាសាទអង្គរវត្តរបស់កម្ពុជា។ ប្រាសាទអង្គរវត្ត មិនត្រឹមតែជាសម្បត្តិបេតិកភណ្ឌពិភពលោក និងជាអច្ឆរិយវត្ថុលើពិភពលោកប៉ុណ្ណោះទេ ប៉ុន្តែថែមទាំងបង្កប់នូវរឿងរ៉ាវប្រវត្តិសាស្ត្រជាច្រើនរបស់ប្រទេសកម្ពុជា និងជាឃ្លាំងគម្ពីរក្បួនច្បាប់ និងដំណើររឿងទាក់ទងនឹងព្រះពុទ្ធសាសនា និងព្រាហ្មណ៍សាសនាផងដែរ។
លោកនិយាយថា៖ «បន្ថែមលើការប្រកាសបើកទទួលភ្ញៀវទេសចរចាក់វ៉ាក់សាំងឱ្យចូលមកទស្សនាកម្ពុជា ព័ត៌មាននៃការផ្តល់ចំណាត់ថ្នាក់លេខ ១ ឱ្យប្រាសាទអង្គរវត្តពី Touropia Travel Guides នឹងជួយទាក់ទាញភ្ញៀវទេសចរបរទេសចាក់វ៉ាក់សាំងប្រឆាំងនឹងជំងឺកូវីដ ១៩ ចូលមកកម្សាន្តនៅកម្ពុជាកាន់តែច្រើន»។
ទាក់ទងចំនួនភ្ញៀវទេសចរធ្វើដំណើរមកដល់កម្ពុជាលោក ស៊ីណាន បាននិយាយថា ដោយសារប្រទេសកម្ពុជាប្រកាសបើកទទួលភ្ញៀវទេសចរបរទេសចាក់វ៉ាក់សាំងភ្លាមៗ (ថ្ងៃទី ១៥ ខែវិច្ឆិកា ឆ្នាំ ២០២១) ដូច្នេះចំនួនភ្ញៀវចូលមកប្រទេសកម្ពុជានារយៈពេល ១ ខែមកនេះនៅមិនទាន់មានចំនួនច្រើនទេ។ លោកអះអាងថា៖ «ពេលនេះយើងឃើញថា ភ្ញៀវរាយ (១-២ នាក់) មានការកើនឡើង ប៉ុន្តែសម្រាប់ភ្ញៀវជាក្រុមគឺស្ទើរតែមិនមានសោះតែម្តង។ ទោះបីយ៉ាងណា ខ្ញុំរំពឹងថា ភ្ញៀវលក្ខណៈជាក្រុមនឹងអាចចាប់ផ្តើមមានបណ្តើរៗឡើងវិញចាប់ពីអំឡុងខែមីនា ឆ្នាំ ២០២២ តទៅ»។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានប្រាប់ថា លទ្ធផលការសិក្សារបស់ Touropia Travel Guides តិច ឬច្រើនពិតជាមានឥទ្ធិពលសម្រាប់វិស័យទេសចរណ៍កម្ពុជា ខណៈកន្លងមកក៏មានស្ថាប័ន/ក្រុមហ៊ុនទេសចរណ៍លំដាប់ពិភពលោកមួយចំនួនក៏បានផ្តល់ចំណាត់ថ្នាក់កំពូលបែបនេះដល់ប្រាសាទអង្គរវត្តកម្ពុជាដែរ។ ការផ្សព្វផ្សាយរបស់ស្ថាប័ន/ក្រុមហ៊ុនទេសចរណ៍លំដាប់អន្តរជាតិ បានជួយឱ្យកម្ពុជាចំណេញយ៉ាងច្រើនពីការធ្វើយុទ្ធនាការផ្សព្វផ្សាយដែលត្រូវចំណាយថវិកាជាតិជាច្រើនលានដុល្លារ។
លោកលើកឡើងថា៖ «ឥទ្ធិពលនេះ នឹងជួយឱ្យអ្នកទេសចរអន្តរជាតិចាប់អារម្មណ៍ដាក់ប្រទេសកម្ពុជា ពិសេសប្រាសាទអង្គរវត្តជាកន្លែងដែលពួកគេចង់ឃើញ ខណៈប្រាសាទអង្គរវត្តត្រូវបានចាត់ទុកជាស្នាដៃកំពូលដែលមានអាយុកាលរាប់រយឆ្នាំមកហើយ»។
កាលពីថ្ងៃទី ២៤ ខែមិថុនា គេហទំព័រ Tripadvisor ក៏បានរកឃើញថា តំបន់ប្រាសាទអង្គរវត្ត ទឹកធ្លាក់ ភូមិបណ្តែតទឹក និងប្រាសាទបន្ទាយស្រីក្នុងខេត្តសៀមរាប បានជាប់លេខ ១ ក្នុងពិភពលោកជាកន្លែងទេសចរណ៍ប្រណីតសម្រាប់ដំណើរកម្សាន្ត ៣ ថ្ងៃ។
ថ្ងៃអង្គារម្សិលមិញ (ថ្ងៃទី ១៤ ខែធ្នូ) គឺជាខួប ២៩ ឆ្នាំដែលឧទ្យានជាតិអង្គរត្រូវបានចុះក្នុងបញ្ជីបេតិកភណ្ឌរបស់មនុស្សជាតិនៃអង្គការយូណេស្កូ។ នេះបើតាមក្រសួងទេសចរណ៍។
ទិន្នន័យក្រសួងទេសចរណ៍បង្ហាញថា ពីខែមករា-ខែតុលា ឆ្នាំ ២០២១ កម្ពុជាទទួលបានភ្ញៀវបរទេសសរុប ១៤៤ ៤៣៣ នាក់ ធ្លាក់ ៨៨,៦ ភាគរយបើធៀបទៅនឹងរយៈពេលដូចគ្នាឆ្នាំ ២០២០៕ LA
វីដេអូ៖