.jpg)
លោក គឹម ហួត ប្រធានមន្ទីរពាណិជ្ជកម្មខេត្តបាត់ដំបង នាពេលកន្លងទៅ។ រូបថត មន្ទីរពាណិជ្ជកម្មខេត្តបាត់ដំបង
ភ្នំពេញៈ វិនិយោគិនខ្មែរបានបញ្ចេញទុនបង្កើតរោងចក្រផលិតប្រេងឆាដំបូងបំផុតនៅកម្ពុជាសម្រាប់ចែកចាយទីផ្សារក្នុងស្រុក និងនាំចេញ ដែលរោងចក្រនេះមានទីតាំងនៅស្រុកថ្មគោល ខេត្តបាត់ដំបង។
លោក ស្រី ចាន់ថន អគ្គនាយកក្រុមហ៊ុន Skyland 7NG ដែលវិនិយោគលើរោងចក្រនេះបានបដិសេធធ្វើអត្ថាធិប្បាយកាលពីថ្ងៃទី ១៤ ខែធ្នូ ប៉ុន្តែកាលពីថ្ងៃទី ១០ ខែធ្នូ លោកបានសរសេរនៅលើបណ្តាញសង្គមផ្ទាល់ខ្លួនថា បន្ទាប់ពីបានស្នើសុំច្បាប់អនុញ្ញាតពីអាជ្ញាធររួច លោកបានចាប់ផ្តើមឈូសដីធ្វើផ្លូវចូលរៀបចំសាងសង់អគារ ឃ្លាំង និងការិយាល័យរោងចក្រនេះ។ លោកបន្តថា នេះជារោងចក្រផលិតប្រេងឆាដំបូងគេនៅកម្ពុជា ហើយវានឹងបើកដំណើរការក្នុងពេលឆាប់ៗ។
លោកនិយាយថា៖ «បន្ទាប់ពីនោះ ខ្ញុំនឹងបន្តគម្រោងក្នុងការបង្កើតរោងចក្រផលិតគ្រឿងអាហារកំប៉ុង ក៏ដូចជារោងចក្រកែច្នៃផ្លែឈើស្រស់ ផលិតជាទឹកផ្លែឈើកំប៉ុង ដើម្បីជួយកសិករផង និងផ្តល់ការងារដល់បងប្អូនខ្មែរយើង ព្រមទាំងចូលរួមជាមួយរដ្ឋាភិបាលកម្ពុជា ដើម្បីកាត់បន្ថយការធ្វើចំណាកស្រុកទៅប្រទេសជិតខាង ក៏ដូចជាកាត់បន្ថយការនាំចូលផលិតផលពីក្រៅប្រទេសផងដែរ»។
ប្រធានមន្ទីរពាណិជ្ជកម្មខេត្តបាត់ដំបង លោក គឹម ហួត បានប្រាប់ភ្នំពេញប៉ុស្តិ៍នៅថ្ងៃទី ១៤ ខែធ្នូថា លោកមិនមានព័ត៌មានលម្អិតពីគម្រោងនេះទេ ប៉ុន្តែតាមព័ត៌មានលោកទទួលបានពីថ្នាក់ដឹកនាំក្រុមហ៊ុន Skyland 7NG គឺក្រុមហ៊ុននេះនឹងបង្កើតរោងចក្រផលិតប្រេងឆាដំបូងបំផុតនៅកម្ពុជា ដោយចម្រាញ់កន្ទក់ធ្វើជាប្រេងឆា។ រោងចក្រនេះស្ថិតក្នុងស្រុកថ្មគោល ព្រោះជាតំបន់សម្បូររោងម៉ាស៊ីនកិនស្រូវ ដែលមានភាពងាយស្រួលក្នុងការប្រមូលកន្ទក់យកមកចម្រាញ់។
លោកបន្តថា វត្តមានរបស់រោងចក្រនេះនឹងជួយកាត់បន្ថយការនាំចូលពីក្រៅប្រទេស ខណៈផលិតផលប្រេងឆានាំចូលមួយចំនួនមិនមានគុណភាព និងស្តង់ដាអនាម័យល្អនោះទេ។ លោកថ្លែងថា៖ «វាល្អណាស់នៅពេលដែលមានរោងចក្រនេះ ប៉ុន្តែបើតាមឧកញ៉ា ស្រី ចាន់ថន រយៈពេល ២ ឆ្នាំទៀតបានធ្វើរួច។ អ្វីដែលប្លែកនោះគឺការប្រើកន្ទក់»។
លោក តូច ឈួនសៅរិទ្ធ ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តបាត់ដំបង បាននិយាយថា លោកមិនទាន់ទទួលបានពាក្យស្នើសុំ ឬរបាយការណ៍ស្នើសុំបង្កើតរោងចក្រផលិតប្រេងឆានៅឡើយទេ។ ទោះយ៉ាងណា លោកបញ្ជាក់ថា ជាសំណាងមួយរបស់ខេត្តបាត់ដំបងបើសិនរោងចក្រនេះដំណើរការ ព្រោះវានឹងអាចជួយផ្តល់ឱកាសការងារ និងចំណូលដល់ប្រជាជននៅមូលដ្ឋាន។
អ្នកនាំពាក្យរដ្ឋបាលខេត្តបាត់ដំបងលោក សឿម ប៊ុនរិទ្ធិ និយាយថា គម្រោងនេះនឹងរួមចំណែកបង្កើនជំនាញដល់ប្រជាពលរដ្ឋ ព្រោះជាធម្មតាកម្មករនៅកម្ពុជាមិនសូវមានជំនាញច្រើនទេ ប៉ុន្តែបើមានរោងចក្រនឹងជួយជំរុញឱ្យពួកគាត់ក្លាយទៅជាបុគ្គលិក និងពលករជំនាញជាមិនខាន៕ LA
