.jpg)
អគ្គនាយកដ្ឋានពន្ធដារ។ ហេង ជីវ័ន
ភ្នំពេញៈ ការប្រមូលចំណូលពន្ធរបស់អគ្គនាយកដ្ឋានពន្ធដារ (GDT) សម្រេចបានជាង ២,៥៦ ពាន់លានដុល្លារនៅក្នុងរយៈពេល ១១ ខែ ឆ្នាំ ២០២១ ដែលនេះឆ្លុះបញ្ចាំងពីប្រសិទ្ធភាពនៃការគ្រប់គ្រងការរីករាលដាលជំងឺកូវីដ ១៩ តាមរយៈការពន្លឿនការចាក់វ៉ាក់សាំងប្រឆាំងកូវីដ ១៩ ដើម្បីរក្សាបាននូវសកម្មភាពសេដ្ឋកិច្ច និងសង្គម។
យោងតាមសេចក្តីប្រកាសព័ត៌មានរបស់ GDT ចេញផ្សាយថ្ងៃទី ១៣ ខែធ្នូ ក្នុងរយៈពេល ១១ ខែ ឆ្នាំ ២០២១ ចំណូលពន្ធអាករដែលអគ្គនាយកដ្ឋានពន្ធដារប្រមូលបានមានចំនួន ២ ៥៦០,១២ លានដុល្លារ ស្មើនឹង ១១៤,១៣ ភាគរយនៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២១ ឬមានការកើនឡើង ១៤,១៣ ភាគរយបើធៀបនឹងរយៈពេលដូចគ្នាឆ្នាំ ២០២០។
ដោយឡែកក្នុងខែវិច្ឆិកា ឆ្នាំ ២០២១ ចំណូលពន្ធអាករគ្រប់ប្រភេទដែលអគ្គនាយកដ្ឋានពន្ធដារប្រមូលបានមានចំនួន ៩៩០,២៩ ពាន់លានរៀល ឬប្រមាណ ២៤៤,៥២ លានដុល្លារ ស្មើ ១០,៩០ ភាគរយនៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២០។ បើប្រៀបធៀបទៅនឹងចំណូលពន្ធអាករ ប្រចាំខែវិច្ឆិកា ឆ្នាំ ២០២០ កើនឡើង ១២,១៧ លានដុល្លារ ស្មើនឹង ៥,២៤ ភាគរយ។
លោក គង់ វិបុល អគ្គនាយកនៃអគ្គនាយកដ្ឋានពន្ធដារបាននិយាយថា ការគ្រប់គ្រងបានល្អនូវការរីករាលដាលជំងឺកូវីដ-១៩ របស់រាជរដ្ឋាភិបាល រហូតឈានទៅដល់ការបើកប្រទេសឡើងវិញ គឺជាកត្តាដ៏សំខាន់នៅក្នុងការរក្សាបាននូវសកម្មភាពសេដ្ឋកិច្ច។
លោកថ្លែងថា៖ «ប្រសិទ្ធភាពនៃការគ្រប់គ្រងស្ថានការណ៍នៃជំងឺកូវីដ ១៩ បានពេញលេញ និងមានប្រសិទ្ធភាពខ្ពស់តាមរយៈការចាត់វិធានការជាយុទ្ធសាស្ត្រក្នុងការចាក់វ៉ាក់សាំងជូនប្រជាពលរដ្ឋកម្ពុជាប្រកបដោយស្មារតីបុរេសកម្ម និងទាន់ពេលវេលា ដែលអាចកសាងភាពធន់របស់សហគមន៍ទៅនឹងជំងឺរាតត្បាតនេះ ហើយឈានទៅបើកប្រទេសជាតិឱ្យដំណើរការសេដ្ឋកិច្ចឡើងវិញនៅក្នុងខែវិច្ឆិកាកន្លងទៅនេះ។
លោកបន្តថា ការបន្តពង្រឹងអភិបាលកិច្ចល្អ និងរដ្ឋបាលល្អ ព្រមទាំងការប្រកាន់ខ្ជាប់នូវស្មារតីបុរេសកម្ម ពិសេសការរៀបចំអភិវឌ្ឍ និងដាក់ឱ្យប្រើប្រាស់ប្រព័ន្ធបច្ចេកវិទ្យាព័ត៌មានតាំងពីមុនការរីករាលដាលកូវីដ ១៩ ក៏ជាកត្តាអំណោយផលនៃការកៀរគរចំណូលផងដែរ។
លោក លឹម ហេង អនុប្រធានសភាពាណិជ្ជកម្មកម្ពុជាបានសង្កេតឃើញថា ចំណូលពន្ធដារនៅតែមានកំណើនដែលជាការឆ្លុះបញ្ចាំងពីភាពល្អប្រសើរនៃសកម្មភាពសេដ្ឋកិច្ច និងសង្គមរបស់កម្ពុជា។
លោកបន្តថា៖ «ដំណើរការសេដ្ឋកិច្ចនៅតែល្អប្រសើរទន្ទឹមពេលដែលយើងកំពុងចាក់វ៉ាក់សាំងបានយ៉ាងលឿងជាងគេបើធៀបបណ្តាប្រទេសផ្សេងៗទៀត។ ប្រទេសយើងនឹងកាត់បន្ថយការឆ្លងជំងឺកូវីដ ១៩ បានច្រើន ដូច្នេះការវិនិយោគនឹងមកបណ្ដើរៗ»។
ជាមួយគ្នានេះដែរកំណើននៃការកៀរគរចំណូលនេះមួយផ្នែកត្រូវបានលោក គង់ វិបុល បង្ហាញថា បានពីការគ្រប់គ្រងប្រមូលចំណូលពន្ធតាមប្រព័ន្ធបច្ចេកវិទ្យាព័ត៌មានដែលបានដាក់ឱ្យអនុវត្ត ជាបន្តបន្ទាប់ ជាពិសេស ToI E-Filling, E-Filing, E-Payment, GDT Tax Pre-filing App និងប្រព័ន្ធទទួលលិខិតប្រកាសពន្ធ ពាក្យស្នើសុំលិខិតរដ្ឋបាល និងឯកសារនានាតាមរយៈប្រព័ន្ធបញ្ជូនឯកសារអេឡិចត្រូនិក ព្រមទាំងការស្នើសុំវិញ្ញាបនបត្រ/លិខិតអនុញ្ញាតនានាតាមប្រព័ន្ធអនឡាញ៕ LA
