.jpg)
តាមការគណនារបស់ភ្នំពេញប៉ុស្តិ៍ចំពោះគម្រោងដែលត្រូវបាន CDC អនុម័ត ហើយបង្ហោះនៅលើហ្វេសប៊ុកផ្លូវការចាប់ពីខែមករា ដល់ដំណាច់ខែមិថុនា ឆ្នាំ ២០២១ មានចំនួន ៧០ ជាមួយនឹងទុនវិនិយោគ ២ ៤២៨ លានដុល្លារ។ ហ៊ាន រង្សី
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) កំពុងពិចារណាក្នុងការបង្កើនទំហំទឹកប្រាក់វិនិយោគ ដើម្បីធ្វើប្រតិភូកម្មដល់អនុគណៈកម្មាធិការវិនិយោគរាជធានី-ខេត្តលើសិទ្ធិអនុម័ត ដើម្បីបង្កលក្ខណៈងាយស្រួលដល់វិនិយោគិនដែលគម្រោងវិនិយោគនៅតាមបណ្តារាជធានី-ខេត្ត ដោយអាចទទួលបានការអនុម័តកាន់តែរហ័ស និងងាយស្រួលជាងមុន ជាពិសេសគឺអនុលោមតាមច្បាប់វិនិយោគថ្មី។
ក្រុមប្រឹក្សាអភិវឌ្ឍន៍កម្ពុជាកាលពីថ្ងៃទី ១៤ ខែធ្នូ បានបើកកិច្ចប្រជុំអន្តរក្រសួង ដើម្បីពិភាក្សាលើសេចក្តីព្រាងអនុក្រឹត្យស្តីពីការបង្កើតអនុគណៈកម្មាធិការវិនិយោគរាជធានី-ខេត្ត ក្រោយពីសភាពាណិជ្ជកម្មកម្ពុជាបានស្នើសុំកែសម្រួលគោលការណ៍មួយចំនួន ដើម្បីឱ្យស្របនឹងច្បាប់ស្តីពីវិនិយោគថ្មីដែលមានលក្ខណៈបន្ធូរបន្ថយជាងមុន។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញ-ប៉ុស្តិ៍ក្នុងថ្ងៃទី ១៥ ខែធ្នូថា នៅពេលច្បាប់វិនិយោគថ្មីដាក់ប្រើប្រាស់ហើយនោះអនុគណៈកម្មាធិការវិនិយោគរាជធានី-ខេត្តក៏ត្រូវរៀបចំអនុក្រឹត្យថ្មីឱ្យស្របទៅតាមច្បាប់ថ្មីដែរ ដោយក្នុងនោះទំហំទឹកប្រាក់ដែលអនុគណៈកម្មាធិការនេះត្រូវអនុម័តក៏នឹងមានចំនួនច្រើនជាងមុនដែរ។ លោកបានបន្តថា កាលពីមុនអនុគណៈកម្មាធិការវិនិយោគរាជធានី-ខេត្តមានសិទ្ធិអនុម័តគម្រោងមានទំហំទុនវិនិយោគត្រឹម ២ លានដុល្លារចុះក្រោម ប៉ុន្តែគម្រោងមានទំហំទុនវិនិយោគចាប់ពី ២ លានដុល្លារឡើង ត្រូវឆ្លងកាត់ការត្រួតពិនិត្យពីក្រុមប្រឹក្សាអភិវឌ្ឍន៍កម្ពុជា ឬគណៈកម្មាធិកាវិនិយោគកម្ពុជា។
លោកបានបន្ថែមថា អនុក្រឹត្យថ្មីនេះអាចនឹងមានការកែសម្រួលលើចំណុចនេះ ព្រោះថ្មីៗនេះ សភាពាណិជ្ជកម្មកម្ពុជាបានស្នើសុំឱ្យមានការកែសម្រួលដល់ ១០ លានដុលា្លរ។
លោកបញ្ជាក់ថា៖ «តាមការស្នើសុំរបស់វិស័យឯកជនដើម្បីបង្ខិតរោងចក្រសហគ្រាសទៅដល់បណ្តាខេត្តឱ្យកាន់តែច្រើនចៀសវាងកកកុញនៅភ្នំពេញ ទើបយើងស្នើសុំឱ្យមានការអនុម័តកាន់តែធំនៅតាមខេត្ត ដែលកាលនោះស្នើសុំ ១០ លានដុល្លារចុះសុំអនុម័តត្រឹមខេត្ត តែក្រោយសិក្សាស្រាវជ្រាវយើងឃើញថា គម្រោងវិនិយោគនៅកម្ពុជាក្រោម ៥ លានដុល្លារចុះ មានដល់ ៧៥ ភាគរយ ដូចនេះប្រហែលជាអាចនឹងកែសម្រួលមកត្រឹមនេះ»។
លោក គី សេរីវឌ្ឍន៍ អ្នកស្រាវជ្រាវសេដ្ឋកិច្ចបានប្រាប់ភ្នំពេញប៉ុស្តិ៍ថា ការផ្តល់ការសម្រេចដល់ថ្នាក់រាជធានី-ខេត្ត គឺជាការធ្វើវិមជ្ឈការឱ្យថ្នាក់ក្រោម ដើម្បីដោះស្រាយ និងសម្រេចលើការវិនិយោគ ដូចនេះវាជាការទទួលខុសត្រូវ និងជាបន្ទុកបន្ថែមទៅរាជធានី-ខេត្តចៀសវាងការដោះសារផ្សេង។
លោកបន្ថែមថា៖ «ការធ្វើវិមជ្ឈការដល់ថ្នាក់ក្រោមជាតិ មានន័យថា ការិយាធិបតេយ្យត្រូវកាត់បន្ថយ ដូច្នេះអាចជាការទាក់ទាញមួយសម្រាប់អ្នកវិនិយោគ ពិសេសវិនិយោគិនបរទេស គឺអាចសំដៅត្រង់ទៅខេត្តតែម្តង ដោយមិនចាំបាច់ទំនាក់ទំនងឯកសារពីខាងលើ ឬសិក្សាវែងឆ្ងាយនោះទេ»។
តាមការគណនារបស់ភ្នំពេញប៉ុស្តិ៍ចំពោះគម្រោងដែលត្រូវបាន CDC អនុម័ត ហើយបង្ហោះនៅលើហ្វេសប៊ុកផ្លូវការចាប់ពីខែមករា ដល់ដំណាច់ខែមិថុនា ឆ្នាំ ២០២១ មានចំនួន ៧០ ជាមួយនឹងទុនវិនិយោគ ២ ៤២៨ លានដុល្លារ ដែលភាគច្រើនជាគម្រោងវិនិយោគលើរោងចក្រកាត់ដេរ ស្បែកជើង ផលិតផលធ្វើដំណើរ គ្រឿងបង្គុំអគ្គិសនី គ្រឿងបង្គុំទោចក្រយាន គ្រឿងសង្ហារិម វិស័យថាមពលអគ្គិសនី និងបដិសណ្ឋារកិច្ច ជាដើម៕
