ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវដល់ម្ចាស់រថយន្តទាំងអស់ដែលមិនទាន់បានបង់ពន្ធរថយន្តរួសរាន់ទៅបង់ឱ្យបានទាន់ពេលវេលា ដើម្បីទទួលបានការអនុគ្រោះពន្ធ ១០ ភាគរយដែលមានរយៈពេលកំណត់ត្រឹមដំណាច់ខែធ្នូ ឆ្នាំ ២០២១ នេះ។
ការលើកឡើងនេះត្រូវបានធ្វើក្នុងអំឡុងពេលដែលលោកអញ្ជើញចូលរួមក្នុងពិធីសម្ពោធដាក់ឱ្យដំណើរការជាផ្លូវការនៃសណ្ឋាគារ ហៃយ៉ាត់ រីជិនស៊ី ភ្នំពេញ នាថ្ងៃទី ១៥ ខែធ្នូ ឆ្នាំ ២០២១។ លោកបានលើកឡើងថា នឹងមិនឱ្យមានព្រឹត្តិការណ៍ច្រំដែលកើតឡើងទៀតទេលើបញ្ហារថយន្តមិនបង់ពន្ធជ្រកក្រោមស្លាកលេខផ្សេងៗ ហើយក៏មិនឱ្យមានវត្តមានបើកលើផ្លូវចំពោះរថយន្តចង្កូតស្តាំដែរ គឺត្រូវយកទៅកែចង្កូតពីស្តាំទៅឆ្វេងវិញ ដូចនេះអ្នកដែលមិនទាន់បានបង់ពន្ធ សូមរួសរាន់ទៅបង់ពន្ធ។
លោកបញ្ជាក់ថា៖ «ក្រោយថ្ងៃទី ៣១ ខែធ្នូ ឆ្នាំ ២០២១ ត្រូវបង់ពន្ធពេញ មិនមានការអនុគ្រោះពន្ធ ១០ ភាគរយទៀតទេ ព្រោះនេះជារឿងជាបញ្ហាដែលយកឡានមកជិះអត់ពន្ធ»។
លោកបន្ថែមថា ថ្វីដ្បិតចំណូលពន្ធនៅឆ្នាំនេះមិនមានកំណើនច្រើនដូចកាលពីមិនទាន់មានវិបត្តិកូវីដ ១៩ ក៏ពិតមែន តែយ៉ាងហោចណាស់ក៏មានកំណើនលើសឆ្នាំមុនដែរ។
លោក គាម ចាន់កុសល អ្នកនាំពាក្យអគ្គនាយកដ្ឋានគយ និងរដ្ឋាករកម្ពុជាបានប្រាប់ភ្នំពេញប៉ុស្តិ៍ថា ការបន្ធូរបន្ថយនេះសម្រាប់តែរថយន្តគ្មានពន្ធមានស្រាប់ក្នុងប្រទេស ប៉ុន្តែលើកលែងរថយន្តដែលមានឆ្នាំម៉ូដែលចាប់ពី ២០២១ ឡើង (ត្រូវបង់ពន្ធពេញ)។
លោកប្រាប់ថា៖ «មកដល់ពេលនេះ មានរថយន្តសរុបទាំងចង្កូតឆ្វេង និងស្តាំ ប្រមាណ ២ ៨៥១ គ្រឿងហើយដែលបានបង់ពន្ធ និងកក់ប្រាក់រួចក្នុងនោះរថយន្តចង្កូតឆ្វេង ១ ៣៥២ គ្រឿង និងចង្កូតស្តាំ ១ ៤៩៩ គ្រឿង»។
បើតាមអ្នកនាំពាក្យខាងលើអត្រាពន្ធនាំចូលខុសគ្នាទៅតាមប្រភេទ។
សូមជម្រាបថា កាលពីអំឡុងខែតុលា ឆ្នាំ ២០២១ អគ្គនាយកដ្ឋានគយ និងរដ្ឋាករកម្ពុជាបានជូនដំណឹងម្តងរួចមកហើយដល់ម្ចាស់រថយន្តជ្រកក្រោមស្លាកលេខផ្សេងៗដែលគ្មានពន្ធឱ្យចូលមកបំពេញកាតព្វកិច្ចពន្ធ និងអាករនាំចូលយ៉ាងយូរត្រឹមថ្ងៃទី ៣១ ខែធ្នូ ឆ្នាំ ២០២១ ដើម្បីបានទទួលការអនុគ្រោះបន្ធូរបន្ថយពន្ធ និងអាករចំនួន ១០ ភាគរយ។
នៅពេលផុតឱសានវាទ គឺចាប់ពីថ្ងៃទី ១ ខែកក្កដា ឆ្នាំ ២០២២ តទៅ រថយន្តគ្មានពន្ធនឹងរងនូវការបង្ក្រាបយ៉ាងតឹងរ៉ឹង និងម៉ឺងម៉ាត់៕
វីដេអូ៖