តម្លៃប្រេងបាននិងកំពុងប្រែប្រួលនៅក្នុងចន្លោះតម្លៃ ៧២ ទៅ ៧៣ (ដុល្លារក្នុងមួយបារ៉ែល) ចាប់តាំងពីដើមសប្តាហ៍មុន ខណៈអ្វីដែលត្រូវតាមដានក្នុងសប្តាហ៍នេះ គឺទីផ្សារប្រេង និងឧស្ម័ន។ ចំណែកអ្នកវិភាគកំពុងមើលទៅលើភាពតានតឹងភូមិសាស្ត្រនយោបាយ ដែលពាក់ព័ន្ធនឹងប្រទេសរុស្ស៊ី និងអ៊ុយក្រែនអំពីផលប៉ះពាល់លើបំពង់បង្ហូរ Nord Stream 2។
លោក Mohammed Al-Jadaan បានលើកឡើងថា៖ «យើងមានការព្រួយបារម្ភយ៉ាងខ្លាំង ដែលពិភពលោកអាចខ្វះថាមពល ប្រសិនបើយើងមិនប្រុងប្រយ័ត្នក្នុងការគ្រប់គ្រងការផ្លាស់ប្តូរ។ នៅ អារ៉ាប៊ីសាអូឌីត យើងមានចំណាប់អារម្មណ៍ក្នុងការរក្សាតម្រូវការ ហើយយើងក៏មានការព្រួយបារម្ភផងដែរថា តម្រូវការកំពុងកើនឡើង»។
ការកើនឡើងនៃភាពតានតឹងភូមិសាស្ត្រនយោបាយក៏បានបង្កើនហានិភ័យនៃការផ្លាស់ប្តូរតម្លៃភ្លាមៗ ដែលឈានទៅដល់ចុងឆ្នាំ។ ជាក់ស្ដែង ការឈ្លានពានរបស់រុស្ស៊ីលើអ៊ុយក្រែនហាក់ដូចជាជិតមកដល់ ហើយការចរចានុយក្លេអ៊ែរអ៊ីរ៉ង់ហាក់ដូច ជាកាន់តែយ៉ាប់យ៉ឺន។ ចំណែក អាមេរិកបានគំរាមដាក់ទណ្ឌកម្មសេដ្ឋកិច្ចប្រឆាំងនឹងរុស្ស៊ី។ ម្យ៉ាងទៀត កង្វះការផ្គត់ផ្គង់នៅអឺរ៉ុបកំពុងជំរុញឱ្យតម្លៃឧស្ម័នធម្មជាតិឡើងដល់កម្រិតខ្ពស់។ ដូច្នេះហើយ ប្រតិបត្តិការចាប់ផ្តើមរបស់ Nord Stream 2 មានភាពស្មុគស្មាញបន្ថែមទៀតចាប់តាំងពីអាល្លឺម៉ង់បានគំរាមដាក់ទណ្ឌកម្ម ប្រសិនបើរុស្ស៊ីប្រឆាំងនឹងអ៊ុយក្រែន ខណៈអធិការបតីថ្មីកំពុងឡើងកាន់តំណែង។
ផ្នែកបច្ចេកទេសវិញ តម្លៃប្រេងអាចទៅរកទម្រកម្រិតទាបកាលពីថ្ងៃសុក្រសប្តាហ៍មុនក្នុងតម្លៃ ៧០,៣០។ ដូចនេះ សម្រាប់ការវិភាគជួញដូរក្នុងសប្តាហ៍នេះ វិនិយោគិនអាចរង់ចាំទិញតម្លៃប្រេងនៅទម្រទី ១ តម្លៃ ៧០,៣០ និងទី ២ តម្លៃ ៦៧,៨០ ដោយកំណត់មុខងារការពារហានិភ័យនៅតម្លៃ ៦៦ និងមុខងារទាញយកប្រាក់ចំណេញនៅតម្លៃ ៧៦។