.jpg)
ទិដ្ឋភាពនៅពីមុខសណ្ឋាគារ ហៃយ៉ាត់ រីជិនស៊ី ភ្នំពេញ។ រូបថត SPM
ភ្នំពេញៈ ក្រុមអ្នកជំនាញអចលនទ្រព្យលើកឡើងថា ការបើកដំណើរការសណ្ឋាគារលំដាប់ផ្កាយ ៥ «ហៃយ៉ាត់ រីជិនស៊ី ភ្នំពេញ» គឺមិនត្រឹមតែបង្ហាញទៅពិភពលោកពីភាពរឹងមាំនៃកំណើនសេដ្ឋកិច្ចកម្ពុជា និងការបើកទូលាយក្នុងការទទួលភ្ញៀវទេសចរអន្តរជាតិក្នុងអំឡុងនៃវិបត្តិនៃការរីករាលដាលជំងឺកូវីដ ១៩ ប៉ុណ្ណោះទេ ប៉ុន្តែវាក៏នឹងជះឥទ្ធិពលជាវិជ្ជមានយ៉ាងច្រើនទៅដល់ទីផ្សារអចលនទ្រព្យនៅកម្ពុជាទៀតផងដែរ។
សណ្ឋាគារ ហៃយ៉ាត់ រីជិនស៊ី ភ្នំពេញ គឺជាសណ្ឋាគារប្រណីតលំដាប់ផ្កាយ ៥ ដ៏ធំមួយស្ថិតក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ ដែលវិនិយោគដោយក្រុមហ៊ុនក្នុងស្រុក ជីប ម៉ុង ក្នុងទឹកប្រាក់សរុប ១៨០ លានដុល្លារ។ សណ្ឋាគារ ហៃយ៉ាត់ រីជិនស៊ី ភ្នំពេញ សាងសង់លើផ្ទៃដី ៧ ០៣១ ម៉ែត្រការ៉េ ដោយបានបើកការដ្ឋានសាងសង់កាលពីដើមឆ្នាំ ២០១៧ និងបញ្ចប់ការសាងសង់ជាស្ថាពរកាលពីដើមឆ្នាំ ២០២១។ សណ្ឋាគារនេះមានបន្ទប់ស្នាក់នៅ ២៤៧ ព្រមទាំងមានសេវាកម្មចម្រុះជាច្រើនដូចជា កន្លែងសម្រាកកម្សាន្ត ភោជនីយដ្ឋាន និងសាលប្រជុំដ៏ធំ និងទំនើប (Regency Ballroom) ជាដើម។
ក្រុមហ៊ុន ជីប ម៉ុង បានទិញម៉ាកយីហោសណ្ឋាគារ ហៃយ៉ាត់ នេះមកពីអាមេរិក។ សណ្ឋាគារ «Hyatt Regency» គឺជាពាណិជ្ជកម្មមួយរបស់ «Hyatt Hotels Corporation» ដែលជាក្រុមហ៊ុនលំដាប់ពិភពលោកកំពុងប្រតិបត្តិការសណ្ឋាគារជាង ៩០០ ទីតាំង ក្នុង ៦៥ ប្រទេស និងមានយីហោប្រណីតចំនួន ២១។
សហស្ថាបនិក និងជាប្រធានក្រុមប្រឹក្សាភិបាលក្រុមហ៊ុន ជីប ម៉ុង លោក លាង ឃុន បានឱ្យដឹងថា នៅក្នុងឆ្នាំ ២០១៦ ក្រុមហ៊ុន ជីប ម៉ុង បានបោះជំហានចូលក្នុងវិស័យសណ្ឋាគារ និងបដិសណ្ឋារកិច្ចតាមរយៈការនាំយកយីហោសណ្ឋាគារលំដាប់អន្តរជាតិ «Hyatt Regency» ដ៏ល្បីរបស់អាមេរិកមកកាន់ប្រទេសកម្ពុជា។
លោកបន្តថា៖ «សណា្ឋគារនេះនឹងចូលរួមចំណែកលើកកម្ពស់ការរស់នៅបែបទាន់សម័យស៊ីវិល័យដូចអរិយប្រទេសផ្សេងៗស័ក្តិសមទៅនឹងការវិវឌ្ឍនៃជីវភាពរបស់ប្រជាជនក្នុងប្រទេសកម្ពុជា ដែលនេះឆ្លុះបញ្ចាំងពីកំណើនសេដ្ឋកិច្ចដ៏រឹងមាំ»។
បើយោងតាម លោក លាង ឃុន «សណ្ឋាគារ ហៃយ៉ាត់ រីជិនស៊ី ភ្នំពេញ» ក៏បានចំណាយប្រាក់ប្រហែល ៥ លានដុល្លារដើម្បីអភិរក្សអគារបុរាណសម័យអាណានិគមបារាំងដែលបច្ចុប្បន្ននេះបានក្លាយជាកន្លែងទទួលបដិសណ្ឋារកិច្ចភ្ញៀវយ៉ាងប្រណីតនៅចំកណ្តាលសណ្ឋាគារដ៏ស្កឹមស្កៃនេះផងដែរ។
លោកនាយករដ្ឋមន្ត្រី ហ៊ុន សែន ក្នុងឱកាសអញ្ជើញចូលរួមក្នុងពិធីបើកសម្ពោធដាក់ឱ្យដំណើរការជាផ្លូវការ «សណ្ឋាគារ ហៃយ៉ាត់ រីជិនស៊ី ភ្នំពេញ» កាលពីព្រឹកថ្ងៃទី ១៥ ខែធ្នូ បានលើកឡើងថា ក្រៅពីអាចទាក់ទាញចំណាប់អារម្មណ៍អតិថិជននៅក្នុងស្រុក និងវិនិយោគិនអន្តរជាតិធំៗ សណ្ឋាគារនេះក៏អាចនឹងត្រូវប្រើប្រាស់ជាកន្លែងស្នាក់នៅសម្រាប់ថ្នាក់ដឹកនាំនៃបណ្តាប្រទេសនៅក្នុងតំបន់ ខណៈប្រទេសកម្ពុជានឹងត្រូវធ្វើជាប្រធានអាស៊ាន នៅក្នុងឆ្នាំ ២០២២ ខាងមុខ។
លោកនាយករដ្ឋមន្ត្រីបានអះអាងថា៖ «សណ្ឋាគារ ហៃយ៉ាត់ រីជិនស៊ី ភ្នំពេញអាចនឹងទទួលថ្នាក់ប្រមុខរដ្ឋ និងប្រមុខរដ្ឋាភិបាលបានច្រើន»។
លោក សំ សុខនឿន ប្រធានសមាគមអចលនទ្រព្យសកលបានប្រាប់ភ្នំពេញប៉ុស្តិ៍ក្នុងថ្ងៃទី ១៥ ខែធ្នូថា ការបើកដំណើរការសណ្ឋាគារលំដាប់ផ្កាយ ៥ ហៃយ៉ាត់ រីជិនស៊ី ភ្នំពេញគឺជាសារដ៏ពិសេសមួយដែលបង្ហាញទៅពិភពលោកថា ដំណើរការសេដ្ឋកិច្ច និងសង្គមរបស់ប្រទេសកម្ពុជា បានចាប់ផ្តើមមានសញ្ញាវិជ្ជមានឡើងវិញហើយ បើទោះបីស្ថានភាពនៃការរីករាលដាលជំងឺកូវីដ ១៩ នៅមិនទាន់បិទបញ្ចប់ទាំងស្រុងក៏ដោយ។ លោកបន្តថា កាបើកដំណើរការរបស់សណ្ឋាគារនេះមិនត្រឹមតែអាចទាក់ទាញភ្ញៀវទេសចរលំដាប់ខ្ពស់ឱ្យចូលមកកម្សាន្តនៅកម្ពុជាប៉ុណ្ណោះទេ ប៉ុន្តែវាក៏នឹងទាក់ទាញអ្នកវិនិយោគធំៗឱ្យមានការស្វែងរកឱកាសវិនិយោគនៅកម្ពុជាក្នុងពេលឆាប់ៗនេះផងដែរ។
លោកអះអាងថា៖ «កំណើននៃការមកដល់របស់អ្នកវិនិយោគធំៗនឹងមានឥទ្ធិពលខ្លាំងសម្រាប់កំណើនសេដ្ឋកិច្ចជាតិ និងទីផ្សារអចលនទ្រព្យ ព្រោះការវិនិយោគតែងត្រូវការទីតាំង (ដី ឬអគារ) មួយដែលស័ក្តិសមរបស់ប្រភេទអាជីវកម្មរបស់ពួកគេ។ នេះជាក្តីសង្ឃឹមថ្មីមួយបន្ថែមទៀតសម្រាប់ទីផ្សារអចលនទ្រព្យនៅកម្ពុជា»។
ជាមួយគ្នានេះដែរ លោក ឌឹត ចណ្ណា អគ្គនាយកនៃក្រុមហ៊ុនអចលនទ្រព្យ ឡាក់គី រៀលធី បាននិយាយថា បន្ថែមពីលើកត្តាស្ថិរភាពនយោបាយ ការមានសណ្ឋាគារលំដាប់ផ្កាយ ៥ នេះនឹងក្លាយជាមេដែកឆក់មួយទៀតក្នុងការទាញឱ្យអ្នកវិនិយោគធំៗចូលមកវិនិយោគវិស័យអចលនទ្រព្យនៅកម្ពុជាកាន់តែច្រើន ខណៈវិស័យអចលនទ្រព្យនៅកម្ពុជាត្រូវបានគេដឹងថានៅមានតម្លៃសមរម្យ ឬទាប បើធៀបទៅនឹងប្រទេសជិតខាង។
លោកលើកឡើងថា៖ «សណ្ឋាគារ ហៃយ៉ាត់ រីជិនស៊ី ភ្នំពេញ មិនត្រឹមតែជួយវិស័យទេសចរណ៍ប៉ុណ្ណោះទេ ប៉ុន្តែវាក៏នឹងជួយទីផ្សារអចលនទ្រព្យកម្ពុជាឱ្យមានសកម្មភាពរស់រវើកឡើងវិញជាមិនខាន ព្រោះនៅពេលសេដ្ឋកិច្ចដំណើរការល្អ ទីផ្សារអចលនទ្រព្យនឹងដំណើរការល្អដូចគ្នា»។
គិតមកដល់ពេលនេះ ក្នុងរាជធានីភ្នំពេញមានសណ្ឋាគារសរុប ៤៩ ស្មើ នឹង ៧ ៥០១ បន្ទប់ ក្នុងនោះសណ្ឋាគារផ្កាយ ៥ មាន ៨ ស្មើ ៣ ៤៥១ បន្ទប់, ផ្កាយ ៤ មាន ១០ ស្មើនឹង ១ ៧១៧ បន្ទប់, ផ្កាយ ៣ មាន ១៥ ស្មើនឹង ១ ៤៤៦ បន្ទប់, ផ្កាយ ២ មាន ៨ ស្មើនឹង ៤៧៧ បន្ទប់ និងសណ្ឋាគារផ្កាយ ១ មាន ៨ ស្មើនឹង ៤១០ បន្ទប់៕
