ភ្នំពេញៈ ការធ្វើពាណិជ្ជកម្មរវាងកម្ពុជា និងចិន ត្រូវបានរំពឹងថានឹងមានទំហំកាន់តែធំបន្ថែមទៀត បន្ទាប់ពីភាគីទាំង ២ បានចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពី «ការបង្កើតក្រុមការងារកិច្ចសហប្រតិបត្តិការវិនិយោគ និងសេដ្ឋកិច្ច»។
ពិធីចុះហត្ថលេខាលើ MoU រវាងក្រុមប្រឹក្សាអភិវឌ្ឍន៍កម្ពុជា(CDC) និងក្រសួងពាណិជ្ជកម្មនៃសាធារណរដ្ឋប្រជាមានិតចិន ត្រូវបានរៀបចំឡើងតាមប្រព័ន្ធវីដេអូ កាលពីថ្ងៃទី១៦ ខែធ្នូ ក្រោមអធិបតីភាពលោក សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា លោក រិន ហុងពីង អនុរដ្ឋមន្ត្រីក្រសួងពាណិជ្ជកម្មនៃសាធារណរដ្ឋប្រជាមានិតចិន និងលោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មកម្ពុជា។
សេចក្តីប្រកាសព័ត៌មានរបស់ CDC ឱ្យដឹងថា នេះជាព្រឹត្តិការណ៍ដ៏សំខាន់ដែលក្រុមប្រឹក្សាអភិវឌ្ឍន៍កម្ពុជា ក្រសួងពាណិជ្ជកម្មនៃសាធារណរដ្ឋប្រជាមានិតចិន និងក្រសួងពាណិជ្ជកម្មកម្ពុជា បានបញ្ជាក់ពីការប្តេជ្ញាចិត្តរួមគ្នាដើម្បីលើកកម្ពស់គំនិតផ្តួចផ្តើម «ខ្សែក្រវាត់ និងផ្លូវ» ភ្ជាប់ជាមួយគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ នៃព្រះរាជាណាចក្រកម្ពុជា។ កម្ពុជា និងចិន ក៏បានសន្យានឹងសហការគ្នាលើការលើកកម្ពស់ទំនាក់ទំនងសេដ្ឋកិច្ច ពាណិជ្ជកម្ម ការវិនិយោគ និងកិច្ចសហប្រតិបត្តិការសេដ្ឋកិច្ចក្នុងវិស័យផ្សេងៗទៀត។
លោក សុខ ចិន្តាសោភា បានវាយតម្លៃខ្ពស់ចំពោះអនុស្សរណៈយោគយល់គ្នានេះ និងបានសម្តែងនូវសុទិដ្ឋិនិយមយ៉ាងមុតមាំថានឹងជំរុញរំហូរវិនិយោគ និងពាណិជ្ជកម្មទ្វេទិសរវាងប្រទេសទាំងពីរ ស្របតាមស្មារតីនៃជំនួបកំពូលរវាងប្រមុខរដ្ឋាភិបាលតាមប្រព័ន្ធវីដេអូកាលពីថ្ងៃទី១៥ ខែវិច្ឆិកា ឆ្នាំ២០២១ កន្លងទៅនេះ។
លោក សុខ ចិន្តាសោភា ក៏បានប្រាប់ដល់ភាគីចិនផងដែរ ពីការប្រកាសឱ្យប្រើច្បាប់ថ្មីស្តីពីវិនិយោគនៃព្រះរាជាណាចក្រកម្ពុជា ដែលតាមរយៈច្បាប់នេះលោករំពឹងថា ការបណ្តាក់ទុនរបស់ចិននៅកម្ពុជានឹងមានកំណើនខ្ពស់បន្ថែមទៀត ដើម្បីជាការចូលរួមចំណែកជួយពន្លឿនសមត្ថភាពកម្ពុជាក្នុងការស្តារសង្គម-សេដ្ឋកិច្ចឡើងវិញក្រោយវិបត្តិនៃជំងឺកូវីដ១៩។
យោងតាម CDC គិតត្រឹមចុងឆមាសទី១ ឆ្នាំ២០២១ ក្នុងចំណោមទឹកប្រាក់វិនិយោគផ្ទាល់បរទេសនៅកម្ពុជាចំនួន ៣៩ពាន់លានដុល្លារ ប្រទេសចិន ឈរនៅលេខរៀងទី១ មានចំនួន ១៧,៣លានដុល្លារ ឬស្មើនឹង ៤៤,២ភាគរយនៃចំនួនសរុប៕