.jpg)
ស្ត្រីម្នាក់កំពុងរែកប្រដាប់ប្រដាក្មេងលេងលក់នៅឆ្នេរព្រែកត្រែងខេត្តព្រះសីហនុ។ ហេង ជីវ័ន
ព្រះសីហនុៈ ដោយមើលឃើញអំពីលំហូរនៃភ្ញៀវទេសចរជាតិ និង អន្តរជាតិ និងមានចំនួនកាន់តែច្រើនមកទស្សនាខេត្តព្រះសីហនុនាពេលដ៏ខ្លីខាងមុខនេះ ស្របជាមួយនឹងស្ថានភាពធូរស្រាលនៃជំងឺកូវីដ ១៩ ខេត្តព្រះសីហនុស្វាគមន៍ដល់វិស័យឯកជនមកសាងសង់កំពង់ផែទូកអេកូទេសចរណ៍ធម្មជាតិថ្មីមួយ ស្ថិតនៅក្នុងភូមិត្រពាំងគា ឃុំជើងគោ ស្រុកព្រៃនប់ ដើម្បីជាជម្រើសនៃទិសដៅទេសចរណ៍ថ្មីបន្ថែមទៀត។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ ប្រាប់ភ្នំពេញប៉ុស្តិ៍នៅថ្ងៃទី ១៥ ខែធ្នូ ឆ្នាំ ២០២១ ថា គម្រោងស្នើសុំសាងសង់កំពង់ផែទូកអេកូទេសចរណ៍ធម្មជាតិថ្មីមួយនេះត្រូវបានលោក គួច ចំរើន អភិបាលខេត្តព្រះសីហនុកាលពីថ្ងៃទី ១៤ ខែធ្នូបានចុះទៅពិនិត្យទីតាំងជាក់ស្តែង និងបានគាំទ្រចំពោះគម្រោងនេះ បន្ទាប់ពីមានការស្នើសុំវិនិយោគពីក្រុមហ៊ុន GTVC របស់លោក ទៀ វិចិត្រ។
លោកបន្តថា បន្ទាប់ពីទទួលបានការគាំទ្រ ក្រុមហ៊ុននឹងបន្តសិក្សាលម្អិតទៀត ពាក់ព័ន្ធទៅលើទំហំ និងរបាយការណ៍នៃការចំណាយចំពោះការសាងសង់ និងរៀបចំឱ្យទៅជាកំពង់ផែទូកអេកូទេសចរណ៍។ លោក ឃាង ភារម្យ ពន្យល់ថា លោក ទៀ វិចិត្រ មានដីនៅទីនេះមានទំហំប្រមាណ ៥០ ហិកតាជាប្រភេទដីស្រែ និងស្ថិតនៅជាប់ដងព្រែក និងចំណីដីព្រែករបស់រដ្ឋ ទើបលោកស្នើសុំសាងសង់ជាផែទូកអេកូទេសចរណ៍ដែលនៅជាប់នឹងដីនោះ។
បើតាមលោក ឃាង ភារម្យ នៅពេលដែលមានសំណើសុំវិនិយោគ ដូច្នេះក្រុមការងារចម្រុះគ្រប់ជំនាញរបស់រដ្ឋបាលខេត្តត្រូវតែចុះទៅពិនិត្យ ដើម្បីធ្វើការវាយតម្លៃជាក់ស្តែង បើមិនមានបញ្ហាអ្វីទេនឹងត្រូវស្នើសុំទៅថ្នាក់ដឹកនាំ ដើម្បីសម្រេច បន្ទាប់ពីសម្រេចឯកភាពគាំទ្រហើយ រដ្ឋបាលខេត្តនឹងធ្វើ ស.ជ.ណ អនុញ្ញាតជូនទៅម្ចាស់សំណើ ដើម្បីធ្វើការសាងសង់ជាផ្លូវការ។
លោកបានថ្លែងថា៖ «ទីតាំងដែលត្រូវរៀបចំកំពង់ផែទេសចរណ៍ខ្នាតតូចនេះ គឺវាជាដីចំណីព្រែករបស់រដ្ឋ ដែលត្រូវស្នើសុំការអនុញ្ញាតពីរដ្ឋបាលខេត្តជាមុនសិន។ ផែនោះគឺជាផែបណ្តែតទឹក ដែលអាចកាត់បន្ថយផលប៉ះពាល់ឱ្យបានទាបបំផុត។ ក្រុមហ៊ុន គឺជាអ្នកសិក្សាក្នុងការចំណាយទៅលើការសាងសង់ និងសួនលម្អនៅបរិវេណនោះ»។
លោក គួច ចំរើន អភិបាលខេត្តព្រះសីហនុដែលបានចូលរួមនៅក្នុងពិធីចុះត្រួតពិនិត្យគម្រោងសាងសង់កំពង់ផែទូកអេកូទេសចរណ៍កាលពីថ្ងៃទី ១៤ ខែធ្នូ ឆ្នាំ ២០២១ បានថ្លែងគាំទ្រលើគម្រោងសាងសង់កំពង់ផែទូកអេកូទេសចរណ៍ធម្មជាតិ នេះ ដែលអាចនឹងផ្តល់អត្ថប្រយោជន៍ជាច្រើនដល់វិស័យទេសចរណ៍ ជាពិសេសសហគមន៍នេសាទមូលដ្ឋាន ព្រមទាំងអាចរួមចំណែកក្នុងការការពារ និងអភិរក្សព្រៃលិចទឹកនៅតំបន់នោះផងដែរ។
លោកថ្លែងថា៖ «ការបង្កើតកំពង់ផែទេសចរណ៍នេះជាប្រយោជន៍ចំពោះសេដ្ឋកិច្ចខេត្តព្រះសីហនុ និងផ្តល់ការងារជូនកូនចៅប្រជាពលរដ្ឋនៅក្នុងសហគមន៍បានមួយចំនួន ជាពិសេសសហគមន៍មូលដ្ឋានអាចយកផលនេសាទ ផលវារីវប្បកម្ម និងកសិផលផ្សេងៗមកលក់ជូនភ្ញៀវទេសចរ ព្រមទាំងអាចប្រើប្រាស់កំពង់ផែនេះ សម្រាប់ដឹកភ្ញៀវទេសចរទស្សនកិច្ចតំបន់ព្រៃលិចទឹកនៅតាមដងព្រែកបានផងដែរ។
លោកអភិបាលខេត្តរូបនេះ បានស្នើលោក ទៀ វិចិត្រ ដែលជាម្ចាស់សំណើសុំធ្វើការសាងសង់កំពង់ផែអេកូទេសចរណ៍ធម្មជាតិនេះ ត្រូវសិក្សាពីបច្ចេកទេសនៃការសាងសង់ផែទូកនេះ ដោយធ្វើយ៉ាងណាកាត់បន្ថយផលប៉ះពាល់ដល់ធនធានធម្មជាតិឱ្យនៅកម្រិតទាបបំផុត។
ភ្នំពេញប៉ុស្តិ៍មិនអាចទាក់ទងលោក ទៀ វិចិត្រ សុំធ្វើអត្ថាធិប្បាយលម្អិតពីគម្រោងសាងសង់កំពងផែនេះបានទេ នៅថ្ងៃទី ១៥ ខែធ្នូ ប៉ុន្តែបើតាមរបាយការណ៍របស់ក្រុមការងារជំនាញរដ្ឋបាលខេត្តព្រះសីហនុបញ្ជាក់ថា ការសាងសង់ផែទូកទេសចរណ៍នេះមានលក្ខណៈជាផែទូកតូចៗ ពុំមានបង្កឱ្យស្ទះដល់លំហូរទឹកក្នុងព្រែកកំពង់ស្មាច់នោះទេ ដោយឡែកអាចធ្វើឱ្យមានការទាក់ទាញភ្ញៀវទេសចរជាតិ និងអន្តរជាតិមកលេងកម្សាន្តនៅតំបន់នេះកាន់តែច្រើន។
លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុប្រាប់ភ្នំពេញប៉ុស្តិ៍នៅថ្ងៃទី ១៥ ខែធ្នូ ឆ្នាំ ២០២១ ដោយបានសម្តែងការស្វាគមន៍ នៅពេលដែលមានការសាងសង់កំពង់ផែទូកអេកូទេសចរណ៍នេះ ព្រោះវាជាផលិតផលទេសចរណ៍ថ្មីមួយទៀត សម្រាប់ខេត្តព្រះសីហនុក្នុងការទាក់ទាញភ្ញៀវទេសចរជាតិ និងអន្តរជាតិអាចមកលេងកម្សាន្តបានច្រើនកន្លែង និងស្នាក់នៅបានយូរថ្ងៃ។
បើតាមលោក តាំង សុចិត្រគ្រឹស្នា ខេត្តព្រះសីហនុ មិនមែនមានតែគម្រោងសាងសង់កំពង់ផែអេកូទេសចរណ៍នេះទេ គឺមានគម្រោងច្រើនផ្សេងៗទៀតដែលស្ថិតនៅក្នុងផែនការអភិវឌ្ឍន៍ទេសចរណ៍របស់ខេត្ត ដើម្បីទាក់ទាញភ្ញៀវទេសចរជាតិ និងអន្តរជាតិឱ្យមកលេងកម្សាន្ត និងស្នាក់នៅបានយូរ ព្រោះខេត្តព្រះសីហនុ គឺជាគោលដៅទេសចរណ៍ និងអភិវឌ្ឍទៅជាតំបន់សេដ្ឋកិច្ចពហុបំណង៕
