.jpg)
កម្មការ-កម្មការិនីចូលរួមសិក្ខាសាលា ១ នៅខេត្តស្វាយរៀង កាលពីឆ្នាំ ២០២០។ ហ៊ាន រង្សី
ភ្នំពេញ: ជាមួយភាពអនុគ្រោះពីបណ្តាប្រទេសដៃគូពាណិជ្ជកម្មនានា និងការបង្វែរទិសដៅការបញ្ជាទិញពីប្រទេសមីយ៉ាន់ម៉ា និងវៀតណាមមកកាន់កម្ពុជាដោយផ្ទាល់ បានធ្វើឱ្យវិស័យកាត់ដេរ និងកម្មន្តសាល កើនប្រមាណ ១៣,៥ ភាគរយនៅឆ្នាំ ២០២១ នេះ ដោយមានកំណើនពីដក ២០ ភាគរយក្នុងរយៈពេលដូចគ្នាកាលពីឆ្នាំ ២០២០។ នេះបើយោងតាមការលើកឡើងរបស់លោកនាយករដ្ឋមន្ត្រី ហ៊ុន សែន នៅព្រឹកថ្ងៃព្រហស្បតិ៍។
លោកនាយករដ្ឋមន្ត្រីបានថ្លែងបែបនេះ ក្នុងពេលលោកបើកកិច្ចប្រជុំពេញអង្គគណៈរដ្ឋមន្ត្រីនាព្រឹកថ្ងៃព្រហស្បតិ៍ទី ១៦ ខែធ្នូ ឆ្នាំ ២០២១។ លោកបានថ្លែងចាត់ទុកស្ថានភាពនេះថា វិស័យកាត់ដេរ និងកម្មន្តសាលរបស់កម្ពុជានៅតែទទួលបានការអនុគ្រោះពីបណ្តាប្រទេសដៃគូនាំចេញនានា ស្របពេលដែលភាពអំណោយផលវិស័យផលិតកម្មនៅកម្ពុជាពុំមានការរំខានដល់ផ្នែកផលិតកម្មឡើយ។
លោកនាយករដ្ឋមន្ត្រីបានថ្លែងយ៉ាងដូច្នេះថា៖«យើងឃើញថា កំណើននៃវិស័យកាត់ដេរ និងកម្មន្តសាលរហូតទៅដល់ ១៣,៥ ភាគរយ សម្រាប់ឆ្នាំនេះប្រៀបធៀបនឹងដក ២០ ភាគរយកាលពីឆ្នាំទៅ។ មូលហេតុគឺផ្ទេរការបញ្ជាទិញចេញពីប្រទេសមីយ៉ាន់ម៉ា និងវៀតណាមមកកាន់កម្ពុជាតែម្តង ដូច្នេះធ្វើឱ្យរោងចក្រសហគ្រាសរបស់យើងបានដំណើរការពេញលេញបន្ថែមទៅលើការបន្ថែមម៉ោងទៅទៀត»។ លោកបានថ្លែងបញ្ជាក់ផងដែរថា សម្រាប់ការនាំចេញ និងការនាំចូលវត្ថុធាតុដើមសម្រាប់ការផលិតក៏មានការកើនឡើង។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជាបានប្រាប់ភ្នំពេញប៉ុស្តិ៍នៅថ្ងៃទី ១៦ ខែធ្នូថា ទាំងការនាំចេញ និងការនាំចូលវត្ថុធាតុដើមសម្រាប់ផលិតកម្មរោងចក្រកាត់ដេរកើនឡើងនៅឆ្នាំនេះ ជាពិសេសគឺមានកំណើននៃការនាំចេញសម្លៀកបំពាក់ ស្បែកជើង និងផលិតផលសម្រាប់ធ្វើដំណើរ។
លោកបានឱ្យដឹងយ៉ាងដូច្នេះថា កំណើននៅក្នុងវិស័យនីមួយៗខុសគ្នាបន្តិច ឃើញថា សម្លៀកបំពាក់មានកំណើនទាបជាងគេប្រហែល ៥% ក្នុងរយៈពេល ៩ ខែដើមឆ្នាំនេះ ប៉ុន្តែបើស្បែកជើងមានកំណើនប្រហែលជាង ១៥% ហើយបើផលិតផលធ្វើដំណើរវិញ មានកំណើនខ្លាំងមែនទែន គឺជាង ៣០% ធៀបទៅនឹងឆ្នាំមុន។ ជាទូទៅផលិតផលសម្លៀកបំពាក់ ជាផលិតផលដែលមានកំណើនទាប ហើយកម្ពុជាត្រូវការប្រកួតប្រជែងខ្លាំងជាមួយប្រទេសផ្សេងទៀត ជាពិសេសបង់ក្លាដែស វៀតណាម ដោយឡែកកំណើនខ្ពស់ទៅលើផលិតផលធ្វើដំណើរ ដោយសារតែកម្ពុជាទទួលបានការលើកលែងពន្ធនាំចូលទៅក្នុងសហរដ្ឋអាមេរិក។
លោកបន្ថែមថា៖ «បើធៀបនឹងឆ្នាំមុន នៅឆ្នាំ ២០២១ នេះ ស្ថានភាពវិស័យកាត់ដេរនៅកម្ពុជាមានភាពល្អប្រសើរ ដោយសារមានស្ថិរភាពផលិតកម្ម ដែលរក្សាការផលិត នាំឱ្យមានកំណើននៃការនាំចេញ ខណៈការបញ្ជាទិញសម្រាប់ឆ្នាំនេះកើនឡើងជាងឆ្នាំមុនផងដែរ»។
កម្ពុជាបាននាំចេញសម្លៀកបំពាក់មានតម្លៃជាង ៩,៥ ពាន់លានដុល្លារ ដែលរួមទាំងសម្លៀកបំពាក់ ស្បែកជើង និងកាបូប ក្នុងឆ្នាំ ២០២០ ធ្លាក់ចុះ ១០,៤៤ ភាគរយ បើធៀបក្នុងឆ្នាំ ២០១៩ ។ នេះបើយោងតាមក្រសួងពាណិជ្ជកម្ម៕
