The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​រកចំណូលបាន​ជាង​ ២ ​ពាន់​លាន​ដុល្លារ​ពី​ពន្ធគយ

កម្ពុជា​រកចំណូលបាន​ជាង​ ២ ​ពាន់​លាន​ដុល្លារ​ពី​ពន្ធគយ

Content image - Phnom Penh Post
អគារ​របស់​អគ្គនាយកដ្ឋាន​គយ និង​រដ្ឋាករ​ក្នុង​រាជធានី​ភ្នំពេញ​។ ហេង ជីវ័ន

កម្ពុជា​រកចំណូលបាន​ជាង​ ២ ​ពាន់​លាន​ដុល្លារ​ពី​ពន្ធគយ

ភ្នំពេញ: អគ្គនាយក​នៃ​អគ្គនាយដ្ឋាន​គយ និង​រដ្ឋាករ​កម្ពុជា​ (GDCE) លោក គុណ ញឹម ​បាន​លើកឡើង​អំពី​ស្ថានភាព​ប្រសើរ​ឡើងវិញ​នៃ​ការប្រមូល​ពន្ធគយ​បន្ទាប់ពី​រាជរដ្ឋាភិបាល​បាន​ប្រកាស​ការបើក​សេដ្ឋកិច្ច​ឡើងវិញ​កាលពី​ដើម​ខែវិច្ឆិកា​។

របាយការណ៍​របស់ GDCE ចេញផ្សាយ​កាលពី​ថ្ងៃទី​ ១៥ ខែធ្នូ ក្នុង​រយៈពេល​ ១១ ​ខែ ឆ្នាំ​ ២០២១ ​នេះ អគ្គនាយកដ្ឋាន​គយ និង​រដ្ឋាករ​កម្ពុជា ប្រមូល​ចំណូល​សម្រាប់​ថវិកាជាតិ​បាន​ចំនួន ២ ០៦៥ ​លាន​ដុល្លារ​។

លោក គុណ ញឹម បាន​ថ្លែង​ក្នុង​កិច្ចប្រជុំ​កាលពី​ថ្ងៃទី​ ១៥ ខែធ្នូ​ថា បើ​យោងតាម​ច្បាប់​ហិរញ្ញវត្ថុ​សម្រាប់​ការគ្រប់គ្រង​ឆ្នាំ​ ២០២១ ​នេះ អគ្គនាយកដ្ឋាន​គយ និង​រដ្ឋាករ​កម្ពុជា​ត្រូវ​ប្រមូល​ចំណូល​ឱ្យបាន​ចំនួន ២ ៣៦៣ ​លាន​ដុល្លារ​។ ប៉ុន្តែ​ការប្រមូល​ចំណូល​នេះ​អាច​មិន​សម្រេច​តាម​ផែនការ​។

លោក​បញ្ជាក់ថា នៅ​ឆ្នាំ​ ២០២១ ​នេះ អគ្គនាយកដ្ឋានគយ និង​រដ្ឋាករ​អាច​ប្រមូល​ចំណូល​បាន ៩៧ ​ភាគរយ​នៃ​ផែនការ​ដែល​ស្មើនឹង​ទឹកប្រាក់ ២ ៣០០ ​លាន​ដុល្លារ​។

លោក​មាន​ប្រសាសន៍​ថា​៖ «​យើង​សង្កេតឃើញ​ពី​និន្នាការ​កើនឡើង​វិញ​នៃ​ចំណូល​ពន្ធគយ​នៅ​ចុងឆ្នាំ​ ២០២១ ​នេះ បន្ទាប់ពី​រាជរដ្ឋាភិបាល​បើក​ដំណើរការ សេដ្ឋកិច្ច​ឡើងវិញ ហើយ​តម្រូវការ​នាំចូល​ទំនិញ​ក៏មាន​ការកើនឡើង​ផងដែរ​»​។

លោក គុណ ញឹម បាន​ពន្យល់​ថា ចំណូល​គយ​នឹង​កើនឡើង​ខ្ពស់ ដោយសារ​ហេតុផល​សំខាន់ៗ​ ៣ គឺ​ទី​ ១៖ ការប្រមូល​ចំណូល​ពន្ធ​លើ​រថយន្ត​ជ្រកក្រោម​ស្លាកលេខ​ផ្សេងៗ ទី​ ២ ដោយសារ​បើក​សកម្មភាព​សេដ្ឋកិច្ច​ឡើងវិញ​ធ្វើឱ្យ​តម្រូវការ​ទំនិញ​នឹង​មាន​សម្ទុះ​កើនឡើង ការនាំ​ចូល​ក៏​កើនឡើង​ផងដែរ និង​ទី​ ៣ ក្នុងឱកាស​ចុងឆ្នាំ ពាណិជ្ជករ​តែងតែមាន​តម្រូវការ​នាំចូល​ច្រើន តាមរយៈ​កម្មវិធី​ក្រុមហ៊ុន​លក់​លាង​ឃ្លាំង ដែល​ធ្វើឱ្យ​ទំនិញ​មាន​តម្លៃថោក ជា​ឱកាស​របស់​ពាណិជ្ជកម្ម​ខ្មែរ ប្រមូល​ទិញ និង​នាំ​ចូលមក​កម្ពុជា​។

លោកនាយក​រដ្ឋមន្ត្រី ហ៊ុន សែន កាលពី​ថ្ងៃទី​ ១៥ ខែធ្នូ​បាន​អំពាវនាវ​ដល់​ម្ចាស់​រថយន្ត​ទាំងអស់ ដែល​មិនទាន់​បាន​បង់ពន្ធ​រថយន្ត​រួសរាន់​ទៅ​បង់​ឱ្យបាន​ទាន់​ពេលវេលា ដើម្បី​ទទួលបាន​ការអនុគ្រោះ​ពន្ធ ១០ ​ភាគរយ ដែលមាន​រយៈពេល​កំណត់​ត្រឹម​ដំណាច់​ខែធ្នូ ឆ្នាំ​ ២០២១ នេះ​។

លោក​បាន​លើកឡើង​ថា រាល់​រថយន្ត​មិន​បង់ពន្ធ​ជ្រក​ក្រោម​ស្លាក​លេខ​ផ្សេងៗ ហើយក៏​មិន​ឱ្យមាន​វត្តមាន​បើក​លើផ្លូវ ចំពោះ​រថយន្ត​ចង្កូត​ស្តាំ​ដែរ គឺ​ត្រូវ​យកទៅ​កែ​ចង្កូត​ពីស្តាំ​ទៅ​ឆ្វេង​វិញ ដូចនេះ​អ្នក​ដែល​មិនទាន់បាន​បង់ពន្ធ សូម​រួសរាន់​ទៅ​បង់ពន្ធ​។

លោក​បាន​បញ្ជាក់ថា​៖ «​ក្រោយ​ថ្ងៃទី​ ៣១ ខែធ្នូ ឆ្នាំ​ ២០២១ ត្រូវ​បង់ពន្ធ​ពេញ មិនមាន​ការអនុគ្រោះ​ពន្ធ​ ១០ ​ភាគរយ​ទៀត​ទេ ព្រោះនេះ​ជា​រឿង​ជា​បញ្ហា ដែល​យក​ឡាន​មក​ជិះ​អត់​ពន្ធ​»​។

កាលពី​ឆ្នាំ​ ២០២០ GDCE បាន​កៀរគរ​ប្រាក់ចំណូល​ពន្ធ​មាន​ចំនួន​ប្រមាណ​ជាង ២,៤ ​ពាន់​លាន​ដុល្លារ​ធ្លាក់ចុះ ២៤,៨ ភាគរយ​ធៀប​ឆ្នាំ​ ២០១៩​។

ជាមួយ​គ្នា​នេះដែរ ការប្រមូល​ចំណូល​របស់​អគ្គនាយកដ្ឋាន​ពន្ធដារ​ក៏​សម្រេច​បាន​ជាង ២,៥៦ ពាន់​លាន​ដុល្លារ​ក្នុង​រយៈពេល​ ១១ ​ខែ ឆ្នាំ​ ២០២១ ​ស្មើនឹង​ ១១៤,១៣ ​ភាគរយ​នៃ​ផែនការ​ច្បាប់​ហិរញ្ញវត្ថុ​សម្រាប់​ការគ្រប់គ្រង​ឆ្នាំ​ ២០២១ ឬ​មាន​ការកើនឡើង ១៤,១៣ ភាគរយ​បើ​ធៀប​នឹង​រយៈពេល​ដូចគ្នា​ឆ្នាំ​ ២០២០៕

អត្ថបទគួរចាប់អារម្មណ៍