.jpg)
កប៉ាល់ដឹកកុងតឺន័រផ្ទុកទំនិញនាំចេញ-នាំចូល តាមទន្លេមេគង្គ។ រ៉ាស់ហ៊ីម
ភ្នំពេញៈ រដ្ឋាភិបាលកម្ពុជាបានអនុម័តទៅលើ «សេចក្តីព្រាងច្បាប់ស្តីពីវិសោធនកម្មច្បាប់ស្តីពីសហគ្រាសពាណិជ្ជកម្ម និងសេចក្តីព្រាងច្បាប់ស្តីពីវិសោធនកម្មច្បាប់ស្តីពីវិធានពាណិជ្ជកម្ម និងបញ្ជីពាណិជ្ជកម្ម» ដើម្បីលើកកម្ពស់ភាពងាយស្រួលនៃការធ្វើធុរកិច្ចនៅកម្ពុជា និងត្រៀមខ្លួនសម្រាប់ការស្តារសេដ្ឋកិច្ចឡើងវិញ ក្រោយវិបត្តិនៃជំងឺកូវីដ ១៩។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាថ្លែងក្រោយកិច្ចប្រជុំគណៈរដ្ឋមន្ត្រីនៅថ្ងៃទី ១៦ ខែធ្នូ ឆ្នាំ ២០២១ ថា សេចក្តីព្រាងច្បាប់ខាងលើនេះ នឹងធ្វើឱ្យប្រសើរឡើងនូវតម្លាភាព និងសង្គតិភាពក្នុងក្របខ័ណ្ឌគតិយុត្តរបស់កម្ពុជា ព្រមទាំងលើកស្ទួយបរិយាកាសធុរកិច្ចនៅកម្ពុជា សំដៅចូលរួមស្តារសង្គមសេដ្ឋកិច្ចកម្ពុជាពីវិបត្តិនៃជំងឺកូវីដ ១៩ និងបង្កើនកំណើនសេដ្ឋកិច្ចផងដែរ។
លោកថ្លែងបន្តថា ច្បាប់ស្តីពីវិធានពាណិជ្ជកម្ម និងបញ្ជីពាណិជ្ជកម្មបានប្រកាសឱ្យប្រើកាលពីថ្ងៃទី ២៦ ខែមិថុនា ឆ្នាំ ១៩៩៥ ច្បាប់ស្តីពីវិសោធនកម្មច្បាប់ស្តីពីវិធានពាណិជ្ជកម្ម និងបញ្ជីពាណិជ្ជកម្មបានប្រកាសឱ្យកាលពីថ្ងៃទី ១៨ ខែវិច្ឆិកា ឆ្នាំ ១៩៩៩ និងច្បាប់ស្តីពីសហគ្រាសពាណិជ្ជកម្មបានប្រកាសឱ្យប្រើកាលពីថ្ងៃទី ១៩ ខែឧសភា ឆ្នាំ ២០០៥ ដែលច្បាប់ទាំង ២ នេះត្រូវបានអនុវត្តដោយរលូនអស់រយៈកាលជាច្រើនឆ្នាំកន្លងមកហើយ ប៉ុន្តែមានមាត្រាមួយចំនួនក្នុងច្បាប់ទាំង ២ នេះមិនដែលបានអនុវត្ត និងដើរមិនទាន់ល្បឿននៃការកែទម្រង់របស់រាជរដ្ឋាភិបាលពាក់ព័ន្ធទៅនឹងការផ្តល់សេវាសាធារណៈ និងបរិយាកាសនៃការធ្វើធុរកិច្ចក្នុងតំបន់ និងជាសកល។
បើតាមលោក ផៃ ស៊ីផាន ជាក់ស្តែងការផ្តល់សេវាសាធារណៈនាពេលបច្ចុប្បន្នគឺត្រូវបានធ្វើឡើងតាមរយៈប្រព័ន្ធស្វ័យប្រវត្តិកម្ម ដែលព័ត៌មាន ឯកសារភ្ជាប់ និងលក្ខខណ្ឌតម្រូវសម្រាប់ការបង្កើត និងការចុះបញ្ជីសហគ្រាស-ក្រុមហ៊ុនក៏ត្រូវបានកាត់បន្ថយជាអតិបរមាផងដែរ។ ទោះជាយ៉ាងណាក៏ដោយ នីតិវិធីមួយចំនួនដែលលែងជាលក្ខខណ្ឌតម្រូវក្នុងការអនុវត្តជាក់ស្តែង នៅមានចែងក្នុងច្បាប់ទាំង ២ នេះជាធរមាននៅឡើយ។
លោកបញ្ជាក់ថា ទន្ទឹមនឹងនេះដែរមានមាត្រាមួយចំនួនមិនមានសង្គតិភាព តម្លាភាព ជាមួយនឹងច្បាប់ និងកាតព្វកិច្ចដទៃទៀតនៅក្រោមអនុសញ្ញា សន្ធិសញ្ញា ឬកិច្ចព្រមព្រៀងអន្តរជាតិដែលកម្ពុជាជាភាគីហត្ថលេខី។
លោកថ្លែងថា៖ «ដើម្បីចូលរួមចំណែកក្នុងការបន្តកំណែទម្រង់របស់រាជរដ្ឋាភិបាលលើកកម្ពស់ភាពងាយស្រួលនៃការធ្វើធុរកិច្ចនៅកម្ពុជា ធ្វើឱ្យមានសង្គតិភាព និងសុខដុមនីយកម្មរវាងលិខិតបទដ្ឋានគតិយុត្ត និងស្តារសង្គមសេដ្ឋកិច្ចកម្ពុជាពីវិបត្តិនៃជំងឺកូវីដ ១៩ បានរៀបចំធ្វើវិសោធនកម្មច្បាប់ស្តីពីសហគ្រាសពាណិជ្ជកម្ម និងច្បាប់ស្តីពីវិធានពាណិជ្ជកម្ម និងបញ្ជីពាណិជ្ជកម្ម តាមនីតិវិធីច្បាប់ជាធរមាន»។
លោក លឹម ហេង អនុប្រធានសភាពាណិជ្ជកម្មកម្ពុជាប្រាប់ភ្នំពេញប៉ុស្តិ៍នៅថ្ងៃទី ១៦ ខែធ្នូឆ្នាំ ២០២១ នេះឱ្យដឹងថា ការអនុម័តទៅលើ“សេចក្តីព្រាងច្បាប់ស្តីពីវិសោធនកម្មច្បាប់ស្តីពីសហគ្រាសពាណិជ្ជកម្ម និងសេចក្តីព្រាងស្តីពីវិសោធនកម្មច្បាប់ស្តីពីវិធានពាណិជ្ជកម្ម និងបញ្ជីពាណិជ្ជកម្ម” នេះគឺស្របទៅនឹងកម្ពុជាកំពុងតែស្ថិតនៅក្នុងការធ្វើពាណិជ្ជកម្ម «ឌីជីថល»។
លោកបន្តថា ច្បាប់មួយចំនួនរបស់កម្ពុជាដែលត្រូវបានប្រើប្រាស់កាលពីកន្លងមកនេះ មិនទាន់ឆ្លើយតបសេចក្តីត្រូវការរបស់អ្នកវិនិយោគក្នុងការធ្វើធុរកិច្ចនៅឡើយទេ ដូច្នេះរដ្ឋាភិបាលធ្វើវិសោធនកម្ម និងកែសម្រួលហើយមាត្រា ក៏ដូចជាធ្វើថ្មី ដូចជាច្បាប់វិនិយោគដែលបានអនុម័តកន្លងមកនេះក៏ត្រូវបានរៀបចំឡើង ដើម្បីបរិយាកាសធុរកិច្ច។ ដូច្នេះច្បាប់មួយចំនួនរបស់កម្ពុជាទាមទារត្រូវតែធ្វើវិសោធនកម្ម និងជារឿងល្អដើម្បីតម្រូវទៅតាមស្ថានភាព សេដ្ឋកិច្ចរបស់ប្រទេសដែលឈានដល់ «បដិវត្តន៍ឧស្សាហកម្ម ៤.០» ផងដែរ។
លោកថ្លែងថា៖ «ការធ្វើវិសោធនកម្មច្បាប់ទាំងនេះ មិនមែនតម្រូវតែធុរកិច្ចប្រទេសកម្ពុជាទេ ប៉ុន្តែវា គឺតម្រូវទាំងនៅក្នុងតំបន់ និងសកលលោកសម្រាប់ឱ្យពួកគេមកវិនិយោគនៅក្នុងប្រទេសយើង ឬឆ្លងប្រទេសយើង ព្រោះយើងបានចូលនៅក្នុងសហគមន៍សេដ្ឋកិច្ចអាស៊ានរួចហើយ តាំងពីឆ្នាំ ២០១៥ កន្លងមកនេះ»។
បើតាមលោក លឹម ហេង ភាពប្រឈមនៃច្បាប់ចាស់ដែលរដ្ឋាភិបាលអនុវត្តកាលពីកន្លងមកនេះ បានធ្វើឱ្យមានភាពប្រទាំងប្រទើសក្នុងការធ្វើធុរកិច្ច ពាណិជ្ជកម្ម និងការធ្វើចរាចរណ៍ទំនិញឆ្លងកាត់ជាដើម ហើយការធ្វើវិសោធនកម្ម “សេចក្តីព្រាងច្បាប់ស្តីពីវិសោធនកម្មច្បាប់ស្តីពីសហគ្រាសពាណិជ្ជកម្ម និងសេចក្តីព្រាងស្តីពីវិសោធនកម្មច្បាប់ស្តីពីវិធានពាណិជ្ជកម្ម និងបញ្ជីពាណិជ្ជកម្ម” នេះក៏វានឹងរួមចំណែកដល់ការទាញវិនិយោគ និងផ្តល់ជំនឿទុកចិត្តកាន់ច្រើនថែមទៀតដល់ប្រទេសកម្ពុជា៕
