ភ្នំពេញៈ ក្រុមហ៊ុនអាកាសយានដ្ឋានកម្ពុជា និងក្រុមហ៊ុនអាកាសចរណ៍សិង្ហបុរី (SIA) បានចេញសេចក្តីប្រកាសព័ត៌មានរួមនៅថ្ងៃទី ១៧ ខែធ្នូ អំពីការចាប់ផ្តើមបើកដំណើរការឡើងវិញនូវជើងហោះហើរអន្តរជាតិទៅកាន់អាកាសយានដ្ឋានអន្តរជាតិខេត្តសៀមរាប ជាមួយនឹងជើងហោះហើររបស់ក្រុមហ៊ុនអាកាសចរណ៍ SIA ដែលបានចុះចតនៅម៉ោង ៩ និង ៤៥ នាទីព្រឹកថ្ងៃសុក្រនេះ។
ជើងហោះហើររបស់ SIA ទៅកាន់ខេត្តសៀមរាបបានក្លាយជាជើងហោះហើរអន្តរជាតិដំបូងគេ ដែលចុះចតនៅទីនោះ ចាប់តាំងពីខែមីនា ឆ្នាំ ២០២០ បន្ទាប់ពីផ្អាករយៈពេល ២០ ខែ។ ឥឡូវនេះ ចាប់ពីថ្ងៃទី ១៧ ខែធ្នូតទៅ ក្រុមហ៊ុនអាកាសចរណ៍SIA នឹងដំណើរការជើងហោះហើរប្រចាំថ្ងៃរវាងខេត្តសៀមរាប និងសិង្ហបុរី នៅលើយន្តហោះ Boeing 737-8 របស់ពួកគេ។
នាយកប្រតិបត្តិនៃអាកាសយានដ្ឋានកម្ពុជា លោក Alain Brun បាននិយាយនៅក្នុងសេចក្តីថ្លែងការណ៍ថា "ដំណាក់កាលថ្មីនេះ ក្នុងការចាប់ផ្តើមការតភ្ជាប់អន្តរជាតិឡើងវិញ គឺជាជំហានវិជ្ជមានមួយសម្រាប់កម្ពុជា គឺពិតណាស់វាមិនអាចទៅរួចទេ ប្រសិនបើអាជ្ញាធរកម្ពុជា មិនបានសម្រេចឱ្យមានការបើកប្រទេសឡើងវិញ ដើម្បីទទួលស្វាគមន៍ភ្ញៀវទេចរដែលបានវ៉ាក់សាំងពេញលេញ"។
ក្រុមហ៊ុនអាកាសចរណ៍ SIA នឹងផ្តល់ជូនជើងហោះហើរភ្ញៀវដែលចាក់វ៉ាក់សាំងពេញលេញ"Vaccinated Travel Lane" បួនដងក្នុងមួយសប្តាហ៍ពីខេត្តសៀមរាបទៅកាន់ប្រទេសសិង្ហបុរី ដែលនឹងអនុញ្ញាតឱ្យអ្នកធ្វើដំណើរដែលត្រូវបានចាក់វ៉ាក់សាំងគឺមិនត្រូវបានតម្រូវការធ្វើចត្តាឡីស័កឱ្យនៅដាច់ពីគេក្នុងប្រទេសសិង្ហបុរីឡើយ ប្រសិនបើពួកគេបំពេញតាមលក្ខខណ្ឌនៃកម្មវិធីនេះ៕