.jpg)
ភ្នំពេញៈ កម្ពុជា និងប្រទេសហុងគ្រី បានកំណត់យកត្រីមាសទី១ ឆ្នាំ២០២២ ខាងមុខដើម្បីរៀបចំវេទិកាជំនួបធុរកិច្ច ដែលវេទិកានេះនឹងជួយរឹតចំណងកិច្ចសហប្រតិបត្តិការរវាងប្រទេសទាំង២ ពិសេសផ្នែកពាណិជ្ជកម្មកាន់តែមានភាពល្អប្រសើរ។
ការសម្រេចនេះបានធ្វើឡើងក្នុងកិច្ចពិភាក្សារវាងលោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្មកម្ពុជា ជាមួយលោក István Bakos ភារធារីនៃការិយាល័យតំណាងនៅទីក្រុងភ្នំពេញ នៃស្ថានទូតប្រទេសហុងគ្រី កាលពីថ្ងៃទី១៥ ខែធ្នូ ឆ្នាំ២០២១ នៅទីស្តីការក្រសួងពាណិជ្ជកម្ម។
លោក ប៉ែន សុវិជាតិ បានលើកឡើងថា វេទិកាជំនួបធុរកិច្ចដែលគ្រោងនឹងរៀបចំនៅពេលខាងមុខ នឹងជួយលើកកម្ពស់កិច្ចសហប្រតិបត្តិការ និងការគាំទ្រគ្នាទៅវិញទៅមករវាងប្រទេសកម្ពុជា និងហុងគ្រី សំដៅលើកកម្ពស់ផលប្រយោជន៍រួម និងការអភិវឌ្ឍដៃគូសេដ្ឋកិច្ច និងពាណិជ្ជកម្មជាមួយគ្នាឱ្យកាន់តែប្រសើរ។
តាមរយៈជំនួបនេះ ភាគីទាំង២បានឯកភាពរៀបចំ«វេទិកាជំនួបធុរកិច្ចកម្ពុជា-ហុងគ្រី» នៅក្នុងអំឡុងត្រីមាសទី១ ឆ្នាំ២០២២ ដោយនឹងមានការចូលរួមពីសហប្រធានទាំង២ នៃគណៈកម្មការចម្រុះនៃកិច្ចសហប្រតិបត្តិការលើវិស័យសេដ្ឋកិច្ចរវាងកម្ពុជា-ហុងគ្រី និងសភាពាណិជ្ជកម្មនៃភាគីទាំង២។ ភាគីទាំង២ក៏បានឯកភាពក្នុងការផ្តោតលើការផ្គូផ្គងធុរកិច្ច និងបង្ហាញអំពីកាលានុវត្តភាពក្នុងវិស័យសក្តានុពលមួយចំនួន រួមមាន កសិកម្ម ការកែច្នៃម្ហូបអាហារ សុវត្ថិភាពចំណីអាហារ និងសេវាកម្មក្នុងវិស័យទេសចរណ៍។
យោងតាមសេចក្តីប្រកាសព័ត៌មានរបស់ក្រសួងពាណិជ្ជកម្ម ភាគីទាំងពីរមានសុទិដ្ឋិនិយមថា វេទិកាជំនួបធុរកិច្ចកម្ពុជា-ហុងគ្រី នឹងជួយជំរុញឱ្យធុរជន និងវិនិយោគិនហុងគ្រី មកពង្រីកប្រតិបត្តិការធុរកិច្ច និងវិនិយោគ នៅកម្ពុជា កាន់តែច្រើនបន្ថែមទៀត។
អនុប្រធានសភាពាណិជ្ជកម្មកម្ពុជា លោក លឹម ហេង ធ្លាប់បានប្រាប់ភ្នំពេញប៉ុស្តិ៍ថា វេទិកានេះនឹងបើកឱកាសទីផ្សារឱ្យកម្ពុជាបន្ថែមទៀត ខណៈទំហំពាណិជ្ជកម្មទ្វេភាគីរវាងប្រទេសទាំង ២នៅមានចំនួនតិចតួចនៅឡើយ។
លោកថ្លែងថា៖ «វេទិកានេះនឹងជំរុញទំនាក់ទំនងសេដ្ឋកិច្ច និងការវិនិយោគរវាងភាគីទាំង ២ បើទោះជាទំហំពាណិជ្ជកម្មរវាងប្រទេសទាំង ២ នៅមានកម្រិតទាបក៏ដោយ»។
គិតចាប់ពីឆ្នាំ២០១៧ រហូតត្រឹមឆ្នាំ២០២០ ទំហំពាណិជ្ជកម្មទ្វេភាគីរវាងកម្ពុជា-ហុងគ្រី សម្រេចបានក្នុងទំហំទឹកប្រាក់ សរុបជាង ១៦លានដុល្លារ ខណៈពេញមួយឆ្នាំ២០២០ ទំហំពាណិជ្ជកម្ម កម្ពុជា-ហុងគ្រី សរុបមានជាង ៤លានដុល្លារ៕
