.jpg)
ការហោះហើរនៃយន្តហោះរបស់ក្រុមហ៊ុន SIA។ រូបថត សហការី
ភ្នំពេញៈ ក្រុមហ៊ុនអាកាសចរណ៍សិង្ហបុរី (SIA) បានចាប់ផ្តើមបើកជើងហោះហើរដំបូងមកកម្ពុជា កាលពីថ្ងៃទី ១៧ ខែ ធ្នូ ឆ្នាំ ២០២១ ក្រោយផ្អាកជិត ២ ឆ្នាំ ដោយសារវិបត្តិកូវីដ ១៩ ដោយក្រុមហ៊ុននេះនឹងធ្វើការហោះហើរ ៧ ជើងក្នុង ១ សប្តាហ៍ទៅកាន់ខេត្តសៀមរាបនិង ១៤ ជើងក្នុង ១ សប្តាហ៍មកកាន់រាជធានីភ្នំពេញ។
ជើងហោះហើររបស់ SIA ទៅកាន់ខេត្តសៀមរាប បានក្លាយជាជើងហោះហើរអន្តរជាតិដំបូងគេដែលចុះចតនៅទីនោះ ចាប់តាំងពីខែមីនា ឆ្នាំ ២០២០ បន្ទាប់ពីផ្អាករយៈពេល ២០ ខែ។ ក្រុមហ៊ុន SIA នឹងដំណើរការជើងហោះ-ហើរប្រចាំថ្ងៃរវាងខេត្តសៀមរាប និងសិង្ហបុរី ដោយប្រើប្រាស់យន្តហោះ Boeing 7378។ នេះបើតាមសេចក្តីប្រកាសព័ត៌មានរបស់ក្រុមហ៊ុនអាកាសយានដ្ឋានកម្ពុជា។
អ្នកគ្រប់គ្រងទូទៅក្រុមហ៊ុន SIA លោក Zechariah Chai និយាយថា៖ «ការដាក់ឱ្យប្រើប្រាស់ឡើងវិញនូវសេវាកម្មអន្តរជាតិរវាងសិង្ហបុរី និងខេត្តសៀមរាប គឺជាដំណឹងល្អសម្រាប់អតិថិជនរបស់យើង ដែលអាចបន្តការធ្វើដំណើររវាងទីក្រុង និងអាចតភ្ជាប់ទៅគោលដៅផ្សេងទៀត»។
នាយកប្រតិបត្តិនៃអាកាសយានដ្ឋានកម្ពុជា លោក Alain Brun បានឱ្យដឹងនៅក្នុងសេចក្តីថ្លែងការណ៍ថា៖ «ការតភ្ជាប់ជើងហោះហើរអន្តរជាតិឡើងវិញ គឺជាជំហានវិជ្ជមានមួយ។ ពិតណាស់វាមិនអាចទៅរួចទេ បើសិនអាជ្ញាធរកម្ពុជាមិនបានសម្រេចឱ្យមានការបើកប្រទេសឡើងវិញ ដើម្បីទទួលស្វាគមន៍ភ្ញៀវទេសចរដែលបានចាក់វ៉ាក់សាំងពេញលេញ»។
លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានប្រាប់ ភ្នំពេញ ប៉ុស្តិ៍ថា ខាងអាកាសចរស៊ីវិលបានជូនដំណឹងពីការបើកជើងហោះហើរឡើងវិញរបស់ក្រុមហ៊ុនអាកាសចរណ៍ SIA តាំងពីខែមុនមកម្ល៉េះ។
លោកបន្តថា៖ «ការបើកជើងហោះហើរសិង្ហបុរី-សៀមរាប គឺមាន ១ ជើង ក្នុង ១ ថ្ងៃ ឬស្មើនឹង ៧ ជើង ក្នុង ១ សប្តាហ៍ ដោយចំនួនជើងហោះហើរនេះ គឺអាស្រ័យទៅលើចំនួនអ្នកដំណើរតិច ឬច្រើនដែរបើអ្នកដំណើរមានតិចពេក ក្រុមហ៊ុននឹងពិចារណាផ្លាស់ប្តូរជើងហោះហើរផងដែរ»។
លោកស្រី ឆាយ ស៊ីលីន ប្រធានសមាគមទីភ្នាក់ងារទេសចរណ៍កម្ពុជា បានចាត់ទុកការបើកជើងហោះហើរឡើងវិញរបស់ក្រុមហ៊ុនអាកាសចរណ៍សិង្ហបុរី គឺជាសញ្ញាល្អសម្រាប់វិស័យទេសចរណ៍កម្ពុជា ក្រោយពីខកខានទទួលទេសចរជិត ២ ឆ្នាំ ដោយសារការរីករាលដាលជំងឺកូវីដ។ លោកស្រីបន្ថែមថា បើទោះរដ្ឋាភិបាលអនុញ្ញាត ឱ្យបើកទទួលភ្ញៀវទេសចរដែលបានចាក់វ៉ាក់ហើយក៏ពិតមែន ប៉ុន្តែនៅមិនទាន់បានពេញលេញនោះទេ ដោយសារមានឧបសគ្គចំពោះការធ្វើដំណើរតាមផ្លូវអាកាស។
លោកស្រីបញ្ជាក់ថា៖ «ការបើកជើងហោះហើរនេះនឹងផ្តល់ផលវិជ្ជមានជាច្រើន ពិសេសវាជាការហោះហើរត្រង់ទៅខេត្តសៀមរាប ដែលនេះ គឺល្អមែនទែន ដោយនឹងបង្កលក្ខណៈកាន់តែងាយស្រួលដល់ភ្ញៀវទេសចរ មិនចាំបាច់ធ្វើដំណើរបន្តច្រើន គឺអាចទៅដល់ទីតាំងដោយផ្ទាល់តែម្តង»៕
