.jpg)
លោក ស៊ឹម សេនាជាតិ អតីតនាយកប្រតិបត្តិគ្រឹះស្ថានមីក្រូហិរញ្ញវត្ថុប្រាសាក់។ សហការី
ភ្នំពេញៈ ជាមួយនឹងបទពិសោធដ៏ជោកជាំនៅក្នុងវិស័យហិរញ្ញវត្ថុ លោក ស៊ឹម សេនាជាតិ ដែលជាប្រធាន និងជានាយកប្រតិបត្តិគ្រឹះស្ថានមីក្រូហិរញ្ញវត្ថុប្រាសាក់ បានសម្រេចចិត្តចាកចេញពីតំណែងក្រោយពីបានដឹកនាំអស់រយៈពេលជិត ២ ទសវត្សរ៍។ ការលាលែងពីតំណែងរបស់លោកបានធ្វើឡើង បន្ទាប់ពីធនាគារ KB Kookmin របស់ប្រទេសកូរ៉េខាងត្បូង បានបញ្ចប់ការទិញភាគហ៊ុនចំនួន ១០០ ភាគរយពីប្រាសាក់ កាលពីខែតុលាថ្មីៗនេះ។
ក្នុងអំឡុងពេលចូលរួមជាមួយប្រាសាក់ រយៈពេលជិត ២៦ ឆ្នាំ ដែលក្នុងនោះបម្រើការជាប្រធាន និងនាយកប្រតិបត្តិអស់រយៈពេល ១៨ ឆ្នាំ នៅគ្រឹះស្ថានមីក្រូហិរញ្ញវត្ថុប្រាសាក់ លោក ស៊ឹម សេនាជាតិ បានដឹកនាំប្រាសាក់ពីស្ថាប័នតូចមួយទៅជាគ្រឹះស្ថានមីក្រូហិរញ្ញវត្ថុឈានមុខមួយនៅកម្ពុជា។
យោងតាមរបាយការណ៍ហិរញ្ញវត្ថុរបស់ប្រាសាក់ ក្រោមការដឹកនាំរបស់លោករយៈពេល ១៨ ឆ្នាំចុងក្រោយ គឺចាប់ពីពេលប្រាសាក់ទទួលបានអាជ្ញាប័ណ្ណប្រតិបត្តិការជាគ្រឹះស្ថានមីក្រូហិរញ្ញវត្ថុក្នុងឆ្នាំ ២០០៤ ដល់ខែ កញ្ញា ឆ្នាំ ២០២១ ទ្រព្យសកម្មសរុបបានកើន ៤៥៣ ដងពី ៩ លានដុល្លារ ដល់ ៤ ពាន់លានដុល្លារ ខណៈកំណើនភាគហ៊ុនសរុបកើន ១ ២០៤ ដងពី ៥២៦ ០០០ ដុល្លារ ដល់ ៦៣៤ លានដុល្លារ។
ជាមួយគ្នានេះ ប្រាក់កម្ចីបានការកើនប្រហែល ៤៥៣ ដង ពី ៧,៧ លានដុល្លារទៅ ៣,៥ ពាន់លានដុល្លារ ខណៈប្រាក់បញ្ញើសរុបកើនពីត្រឹម ១៩៦ ០០០ ទៅ ២,៤ ពាន់លានដុល្លារ និងចំនួនបុគ្គលិកកើនឡើងប្រហែល ២៥ ដង ពី ៣៧២ នាក់ ទៅ ៩ ២០៣ នាក់។
ក្នុងពេលជាមួយគ្នានេះ ក៏នឹងមានសមាជិកគណៈកម្មាធិការប្រតិបត្តិ ៧ រូប និងថ្នាក់ដឹកនាំជាន់ខ្ពស់មួយចំនួនទៀតក៏នឹងចាកចេញពីស្ថាប័នមួយនេះពីចន្លោះខែមករា និងកុម្ភៈ ឆ្នាំ២០២២ ខាងមុខនេះផងដែរ។
លោក ស៊ឹម សេនាជាតិ បានផ្តល់បទសម្ភាសឱ្យលោក ម៉ៃ គុណមករា ការីនិពន្ធព័ត៌មានសេដ្ឋកិច្ចនៃកាសែត ភ្នំពេញ ប៉ុស្តិ៍ អំពីការចាកចេញ និងបេសកកម្មបន្ទាប់របស់លោក។
លោកបានដឹកនាំប្រាសាក់ជិត ២ ទសវត្សរ៍ គឺចាប់តាំងពីប្រាសាក់ជាស្ថាប័នតូចមួយ ជាពិសេសតាំងពីស្ថាប័ននេះស្ថិតជាអង្គការមិនមែនរដ្ឋាភិបាល និងបានប្រែក្លាយវាជាគ្រឹះស្ថានមីក្រូហិរញ្ញវត្ថុដ៏ធំមួយនៅកម្ពុជា។ ឥឡូវនេះលោកបានសម្រេចចិត្តចុះចេញពីតំណែង។ តើមូលហេតុអ្វីទើបធ្វើឱ្យលោកសម្រេចចិត្តចាកចេញ?
ខ្ញុំកាន់តំណែង CEO រយៈពេល ១៨ ឆ្នាំមកហើយ ហើយបានធ្វើការជាមួយប្រាសាក់ជាង ២៥ ឆ្នាំ ដូច្នេះវាជាពេលដែលខ្ញុំត្រូវចាកចេញពីប្រាសាក់ ដើម្បីត្រួសត្រាយផ្លូវសម្រាប់ KB ក្នុងការចូលរួមពេញលេញក្នុងការគ្រប់គ្រងប្រាសាក់។ ម្យ៉ាងវិញទៀត ខ្ញុំក៏រំពឹងថា ការផ្លាស់ប្តូរការគ្រប់គ្រងនឹងអាចឱ្យប្រាសាក់ឈានទៅកម្រិតបន្ទាប់ទៀត។
លោកជាអ្នកមានបទពិសោធច្រើនក្នុងវិស័យមីក្រូហិរញ្ញវត្ថុ។ លើសពីនេះលោកក៏បានកសាងប្រាសាក់ពីស្ថាប័នដ៏តូចឱ្យក្លាយជាស្ថាប័នមានសាខារាប់រយ រួមផ្សំនឹងការនាំយកឌីជីថលថ្មីទៅក្នុងស្ថាប័ននេះផង។ តើលោកអាចចែករំលែករឿងរ៉ាវជោគជ័យខ្លះៗជាមួយខ្ញុំដែរឬទេ?
ភាពជោគជ័យត្រូវបានរួមចំណែកដោយកត្តាជាច្រើនដូចជាសន្តិភាព និងស្ថិរភាពនយោបាយ, ស្ថិរភាពម៉ាក្រូ-សេដ្ឋកិច្ច និងកំណើនសេដ្ឋកិច្ច, មានបទប្បញ្ញត្តិគ្រប់គ្រាន់, ការគាំទ្រពីភាគីពាក់ព័ន្ធទាំងអស់ (រដ្ឋាភិបាល, ធនាគារជាតិនៃកម្ពុជា, អ្នកផ្តល់ប្រាក់កម្ចី, ម្ចាស់ភាគហ៊ុន, អ្នកដាក់ប្រាក់បញ្ញើ អាជ្ញាធរមូលដ្ឋាន) ការគាំទ្រពីអ្នកជឿទុកចិត្ត និងអតិថិជនស្មោះត្រង់ ពិសេសការគាំទ្រពីអ្នកគ្រប់គ្រង និងបុគ្គលិកខិតខំធ្វើការ។
កាលពីថ្ងៃទី ៥ ខែ ឧសភា ឆ្នាំ ២០២០ ប្រាសាក់បានចុះបញ្ជីមូលបត្របំណុលសាជីវកម្មនៅលើផ្សារមូលបត្រកម្ពុជា ដោយបានបោះផ្សាយភាគហ៊ុនចំនួន ១ ២៧២ ០០០ មានតម្លៃសរុប ៣១ លានដុល្លារ។ តើហេតុអ្វីបានជាលោកសម្រេចចិត្តចុះបញ្ជីអ្វីនៅលើផ្សារហ៊ុន ខណៈលោកអាចធ្វើការកៀរគរពីប្រភពទុនផ្សេងៗបានយ៉ាងងាយ?
យើងសម្រេចចិត្តបោះផ្សាយមូលបត្របំណុលសាជីវកម្មដោយសារតែហេតុផលមួយចំនួនដូចជាការចូលរួមការអភិវឌ្ឍទីផ្សារមូលបត្រនៅកម្ពុជា, ការជួយលើកកម្ពស់ការប្រើប្រាស់ប្រាក់រៀល, ការធ្វើពិពិធកម្មប្រភពមូលនិធិ និងជួយទីតាំងសាច់ប្រាក់ងាយស្រួល, កែលម្អអភិបាលកិច្ច និងការបង្ហាញព័ត៌មានរបស់យើងដល់សាធារណជន និងការជួយផ្សព្វផ្សាយប្រាសាក់ដល់សាធារណជន។
តើលោកមានគម្រោងអ្វីខ្លះ បន្ទាប់ពីចាកចេញពីប្រាសាក់?
មកដល់ពេលនេះខ្ញុំទំនេរ ហើយមិនទាន់មានគម្រោងនៅឡើយទេ។ ប៉ុន្តែខ្ញុំសង្ឃឹមថា ខ្ញុំនឹងអាចបន្តធ្វើការក្នុងវិស័យនេះដើម្បីឱ្យខ្ញុំអាចប្រើប្រាស់បទពិសោធ និងចំណេះដឹងរបស់ខ្ញុំដែលបានធ្វើការលើវិស័យនេះ៕
