ភ្នំពេញៈ បណ្តាថ្នាក់ដឹកនាំនៃវិស័យទេសចរណ៍ក្នុងតំបន់អាស៊ាន បានព្រមព្រៀងគ្នាលើផែនការបើកទទួលស្វាគមន៍ភ្ញៀវទេសចរអន្តរជាតិមកទស្សនាតំបន់អាស៊ានឡើងវិញ ក្នុងអំឡុង និងក្រោយវិបត្តិជំងឺកូវីដ ១៩។
ការឯកភាពគ្នានេះធ្វើឡើងក្នុងអំឡុងកិច្ចប្រជុំស្ថាប័នជាតិទេសចរណ៍អាស៊ានលើកទី៥៤ តាមប្រព័ន្ធវីដេអូ ពីក្រុងព្រះសីហនុ កាលពីថ្ងៃទី ១៤-១៥ ខែ ធ្នូ ឆ្នាំ ២០២១ នាអំឡុងពេលកម្ពុជាធ្វើជាម្ចាស់ផ្ទះរៀបចំការប្រឡងជ្រើសរើសជើងឯកទូកក្តោងអាស៊ាន South East Asian Sailing Championship (SEAS)។
ចំណុចសំខាន់ៗដែលគ្រប់ភាគីបានឯកភាព គឺក្នុងគោលបំណងដើម្បីគាំទ្រការបើកទទួលស្វាគមន៍ទេសចរអន្តរជាតិមកកម្សាន្តតំបន់អាស៊ានឡើងវិញ។ ទោះជាយ៉ាងណាឯកសារខាងលើនឹងត្រូវដាក់ឆ្លងកិច្ចប្រជុំរដ្ឋមន្ត្រីទេសចរណ៍អាស៊ាន ដើម្បីសុំការណែនាំ និងតម្រង់ទិសសម្រាប់ការអនុវត្តក្នុងក្របខ័ណ្ឌកិច្ចសហប្រតិបត្តិការអាស៊ាន និងដៃគូពាក់ព័ន្ធផ្សេងទៀត។
លោក តុប សុភ័ក អ្នកនាំពាក្យក្រសួងទេសចរណ៍ប្រាប់ ភ្នំពេញ ប៉ុស្តិ៍ នៅថ្ងៃទី ១៩ ខែធ្នូថា ប្រទេសមួយចំនួនក្នុងតំបន់អាស៊ានមិនទាន់បើកឱ្យមានការចេញចូលទូលំទូលាយទេមកដល់ពេលនេះ ដូច្នេះបានថ្នាក់ដឹកនាំឧត្តមមន្ត្រីទេសចរណ៍អាស៊ានបើកកិច្ចប្រជុំដើម្បីពិភាក្សា និងដាក់ចេញជាផែនការស្តារទេសចរអន្តរជាតិក្នុងតំបន់ឡើងវិញទាំងនៅក្នុង និងក្រោយពីវិបត្តិជំងឺកូវីដ១៩។
លោកបន្ថែមថា ទោះស្ថានភាពឆ្លងរាលដាលជំងឺកូវីដ ១៩ នៅកម្ពុជាថយចុះខ្លាំង ហើយរដ្ឋាភិបាលបានបើកទទួលភ្ញៀវចាក់វ៉ាក់គ្រប់ដូស ក៏ប៉ុន្តែរាល់ការធ្វើដំណើររបស់ភ្ញៀវគឺសុទ្ធតែត្រូវឆ្លងតាមប្រទេសជិតខាង។
លោកបានថ្លែងថា៖ «ដូចយើងដឹងស្រាប់ហើយ ប្រទេសជិតខាងយើងដូចជាប្រទេសថៃ ឡាវ និងវៀតណាម កំពុងជួបបញ្ហាប្រឈមច្រើន។ អ៊ីចឹងវិស័យទេសចរណ៍ក្នុងតំបន់អាស៊ានយើងវាអត់អាចងើបឡើងវិញបានភ្លាមៗទេ ដោយវាត្រូវការពេលមួយរយៈទៀត ដើម្បីស្តារទេសចរអន្តរជាតិបានទូលំទូលាយឡើងវិញ»។
លោក ធួន ស៊ីណា ប្រធានសមាគមទេសចរណ៍អាស៊ីប៉ាស៊ីហ្វិក បានប្រាប់ថា បើថ្នាក់ដឹកនាំឧត្តមមន្ត្រីទេសចរណ៍អាស៊ានមានការឯកភាពគ្នាជាធ្លុងមួយ គឺអាចជំរុញឱ្យទេសចរអន្តរជាតិមកទស្សនានៅតំបន់អាស៊ានឡើងវិញបានលឿន ប៉ុន្តែអាស៊ានមានចរិតមួយ គឺនិយាយតែមាត់ និងមានតែនៅលើក្រដាសប៉ុណ្ណោះ។
លោកនិយាយថា៖ «សម្រាប់តំបន់អាស៊ាន នៅពេលដែលចេញជាផែនការ ឬគោលការណ៍រួចហើយ ទៅដល់មន្ត្រីអនុវត្តបែរជារឿងផ្សេងទៅវិញ។ និយាយទៅអាស៊ានស្ថិតតែនៅលើក្រដាស និងមាត់ ចំណែកការអនុវត្តគឺមិនសូវមានទេ»៕