.jpg)
លោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្ម ក្នុងជំនួបជាមួយលោក Istvan Bakos ភារធារីនៃការិយាល័យតំណាងនៅទីក្រុងភ្នំពេញនៃស្ថានទូតប្រទេសហុងគ្រី កាលពីថ្ងៃទី ១៥ ខែ ធ្នូ ឆ្នាំ ២០២១។ ក្រសួងពាណិជ្ជកម្ម
ភ្នំពេញៈ កម្ពុជា និងប្រទេសហុងគ្រី នឹងរៀបចំវេទិកាជំនួបធុរកិច្ច នាត្រីមាសទី១ ឆ្នាំ ២០២២ ក្នុងគោលបំណងដើម្បីជំរុញការដោះដូរពាណិជ្ជកម្ម និងវិនិយោគរវាងប្រទេសទាំង ២។
ការសម្រេចនេះបានធ្វើឡើងក្នុងកិច្ចពិភាក្សារវាង លោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្ម ជាមួយលោក Istvan Bakos ភារធារីនៃការិយាល័យតំណាងនៅទីក្រុងភ្នំពេញនៃស្ថានទូតប្រទេសហុងគ្រី កាលពីថ្ងៃទី ១៥ ខែ ធ្នូ ឆ្នាំ ២០២១ នៅទីស្តីការក្រសួងពាណិជ្ជកម្ម។
លោក ប៉ែន សុវិជាតិ បានលើកឡើងថា វេទិកាជំនួបធុរកិច្ចដែលគ្រោងនឹងរៀបចំនៅពេលខាងមុខ និងជួយលើកកម្ពស់កិច្ចសហប្រតិបត្តិការ និងការគាំទ្រគ្នាទៅវិញទៅមករវាងកម្ពុជា និងហុងគ្រី សំដៅលើកកម្ពស់ផលប្រយោជន៍រួម និងការអភិវឌ្ឍដៃគូសេដ្ឋកិច្ច និងពាណិជ្ជកម្ម។
តាមរយៈជំនួបនេះ ភាគីទាំង ២ បានឯកភាពគ្នារៀបចំ «វេទិកាជំនួបធុរកិច្ចកម្ពុជា-ហុងគ្រី» ក្នុងអំឡុងត្រីមាសទី១ ឆ្នាំ ២០២២ ដោយនឹងមានការចូលរួមពីសហប្រធានទាំង ២ នៃគណៈកម្មការចម្រុះនៃកិច្ចសហប្រតិបត្តិការលើវិស័យសេដ្ឋកិច្ចកម្ពុជា-ហុងគ្រី និងសភាពាណិជ្ជកម្មនៃភាគីទាំង ២។ ភាគីទាំង ២ ក៏បានឯកភាពនៅក្នុងការផ្តោតលើការផ្គូផ្គងធុរកិច្ច និងបង្ហាញអំពីកាលានុវត្តភាពក្នុងវិស័យសក្តានុពលមួយចំនួនផងដែរ។
យោងតាមសេចក្តីប្រកាសព័ត៌មានក្រសួងពាណិជ្ជកម្ម ភាគីទាំង ២ មានសុទិដ្ឋិនិយមថា វេទិកាជំនួបធុរកិច្ចកម្ពុជា-ហុងគ្រី នឹងជួយជំរុញឱ្យធុរជន និងវិនិយោគិនហុងគ្រី មកពង្រីកប្រតិបត្តិការធុរកិច្ច និងវិនិយោគនៅកម្ពុជា កាន់តែច្រើនបន្ថែមទៀត។
អតីតតំណាងស្ថានពាណិជ្ជកម្មប្រទេសហុងគ្រី ប្រចាំនៅកម្ពុជា លោក ធួន ស៊ីណាន បានប្រាប់ ភ្នំពេញ ប៉ុស្តិ៍ ក្នុងថ្ងៃទី ១៩ ខែធ្នូថា ហុងគ្រី គឺជាប្រទេសមានសេដ្ឋកិច្ចរីកចម្រើន និងជាសមាជិកមួយរបស់សហភាពអឺរ៉ុប ដូច្នេះបើកម្ពុជាមានទំនាក់ទំនងពាណិជ្ជកម្មល្អជាមួយហុងគ្រីនោះផលិតផលកម្ពុជាមិនត្រឹមតែចូលទីផ្សារហុង-គ្រីប៉ុណ្ណោះទេ ប៉ុន្តែក៏អាចឆ្លងទៅដល់ទីផ្សារអឺរ៉ុបផ្សេងៗទៀតផងដែរ។
លោកថ្លែងថា៖ «ការបង្កើតទំនាក់ទំនងពាណិជ្ជកម្មល្អជាមួយហុងគ្រី នឹងផ្តល់ផលវិជ្ជមានជាច្រើនសម្រាប់ទីផ្សារនាំចេញរបស់កម្ពុជា ពិសេសផលិតផលកសិកម្មទៅទីផ្សារអឺរ៉ុប»។
យោងតាមលោក ស៊ីណាន កន្លងមក កម្ពុជាធ្លាប់នាំផលិតផលមួយចំនួនដូចជា ផលិតផលកសិកម្ម និងថ្នាំជក់ជាដើម រីឯទំនិញនាំចូលពីប្រទេសហុងគ្រី មកកម្ពុជាមានដូចជា ស្រា គ្រឿងយន្តកសិកម្ម និងបច្ចេកវិទ្យាព័ត៌មានវិទ្យា ជាដើម។
នៅក្នុងឆ្នាំ ២០២០ ទំហំពាណិជ្ជកម្មកម្ពុជា-ហុងគ្រី មានទឹកប្រាក់សរុបត្រឹមតែជាង ៤ លានដុល្លារ៕
