.jpg)
ទិដ្ឋភាពពីលើនៃសណ្ឋាគារ ហ្គូដថាម រីលែក រីសត។ រូបថត សហការី
កំពតៈ សណ្ឋាគារ ហ្គូដថាម រីលែក រីសត ដ៏ប្រណីតថ្មីមួយនៅក្នុងស្រុកទឹកឈូ ខេត្តកំពតបានដាក់សម្ពោធជាផ្លូវការដើម្បីឆ្លើយតបនឹងសេចក្តីត្រូវការរបស់ភ្ញៀវទេសចរជាតិ និងអន្តរជាតិនៅឆ្នាំក្រោយ និងឆ្នាំបន្តបន្ទាប់ទៀត ក្រោយពីស្ថានភាពកូវីដ ១៩ លើពិភពលោកមានភាពធូរស្បើយ។
សណ្ឋាគារ ហ្គូដថាម រីលែក រីសត ដែលសម្ពោធកាលពីថ្ងៃទី ១៧ ខែធ្នូ ឆ្នាំ ២០២១ សាងសង់លើផ្ទៃដី ៤,៥ ហិកតា និងមាន ៥១ បន្ទប់។
លោក លី ហុងហួរ ម្ចាស់សណ្ឋាគារ ហ្គូដថាម រីលែក រីសត ប្រាប់ភ្នំពេញ-ប៉ុស្តិ៍នៅថ្ងៃទី ២០ ខែធ្នូថា ការសម្ពោធដាក់ឱ្យដំណើរការសណ្ឋាគារនេះមិនទាន់សមាមាត្រនឹងតម្រូវការបច្ចុប្បន្នទេ ព្រោះស្ថិតក្នុងស្ថានភាពកូវីដ ១៩ ប៉ុន្តែវានឹងឆ្លើយតបសេចក្តីត្រូវការនៅឆ្នាំក្រោយៗទៀត។ លោកបន្តថា ការសម្ពោធដាក់ឱ្យដំណើរការសណ្ឋាគារនេះ គឺសម្រាប់បម្រើឱ្យភ្ញៀវទេសចរជាតិ និងអន្តរជាតិ។ ម្យ៉ាងទៀតទីនោះក៏មានកន្លែងប្រជុំផងដែរ។
លោកថ្លែងថា៖ «ខ្ញុំជ្រើសរើសខេត្តកំពតសម្រាប់បង្កើតសណ្ឋាគារនេះដោយចំណាយទុន ៣,៥ លានដុល្លារ ដើម្បីជួយជំរុញវិស័យទេសចរណ៍ ខណៈខ្ញុំសង្កេតឃើញថា ភ្ញៀវទេសចរ ជាពិសេសភ្ញៀវអឺរ៉ុប គាត់ចូលចិត្តមកនៅតាមមាត់ព្រែក តាមមាត់សមុទ្រ និងក្នុងព្រៃជាដើម។ ម្យ៉ាងខេត្តកំពត គឺជាខេត្តដែលមានតំបន់ឆ្នេរ ដងព្រែក ភ្នំ និងព្រៃព្រឹក្សាដែលជាទីទាក់ទាញក្នុងការវិនិយោគផងដែរ»។
ប្រធានមន្ទីរទេសចរណ៍ខេត្តកំពត លោក សយ ស៊ីណុល និយាយថា សណ្ឋាគារនេះគឺជាផលិតផលទេសចរណ៍ថ្មីមួយទៀតសម្រាប់ខេត្តកំពត ដែលនឹងរួមចំណែកក្នុងការទាក់ទាញភ្ញៀវទេសចរ។ លោកបន្តថា រយៈពេលកន្លងមកក៏ដូចពេលបច្ចុប្បន្ន ទោះបីកម្ពុជាប្រឈមនឹងវិបត្តិជំងឺកូវីដ ១៩ ក៏ការអភិវឌ្ឍផលិតផល និងសេវាកម្មទេសចរណ៍ខេត្តកំពត នៅតែមានភាពផុលផុស ជាពិសេសក្នុងក្រុងកំពតនាពេលនេះមានសំណង់សណ្ឋាគារ ផ្ទះសំណាក់ និងសំណង់ដែលបម្រើឱ្យវិស័យទេសចរណ៍ជាច្រើនកំពុងសាងសង់ ដើម្បីត្រៀមទទួលទេសចរ។
លោកថ្លែងថា៖ «យើងមើលឃើញថា ទាំងអ្នកវិនិយោគនៅក្នុងស្រុក និងក្រៅស្រុក ក៏ដូចបងប្អូនដែលធ្លាប់ប្រកបមុខរបរទេសចរណ៍នៅក្នុងទឹកដីនេះ ពួកគេកំពុងបង្កើនការវិនិយោគដើម្បីឆ្លើយតបនឹងសេចក្តីត្រូវការភ្ញៀវ ដែលមានការកើនឡើងជាលំដាប់ និងអាចជួយវិស័យទេសចរណ៍ឱ្យមានដំណើរការល្អឡើងវិញផងដែរ»។
បើតាមលោក ស៊ីណុល ទាំងសេវាកម្មម្ហូបអាហារ និងសេវាស្នាក់នៅប្រកបដោយស្តង់ដានៅខេត្តកំពត មានការកើនឡើងគួរឱ្យកត់សម្គាល់ ខណៈនិន្នាការភ្ញៀវទេសចរនៅមួយរយៈចុងក្រោយនេះ បានប្រែមកកម្សាន្តនៅថ្ងៃអាទិត្យមកថ្ងៃសុក្រ និងថ្ងៃសៅរ៍វិញ និងកំពុងកើនឡើងគួរឱ្យកត់សម្គាល់ ពិសេសភ្ញៀវទេសចរក្នុងស្រុក៕LA
