ភ្នំពេញៈ បន្ទាប់ពីស្ថានភាពនៃការរីករាលដាលជំងឺកូវីដ ១៩ មានភាពធូរស្រាលជាងមុន និងការបើកដំណើរការឡើងវិញសេដ្ឋកិច្ចសង្គមរបស់កម្ពុជាកាលពីខែវិច្ឆិកា លំហូរភ្ញៀវទេសចរ និងវិនិយោគិនចិនបានចាប់ផ្តើមត្រឡប់មកកាន់ខេត្តព្រះសីហនុជាបណ្តើរៗវិញហើយ។ នេះបើតាមអ្នកនាំពាក្យរបស់ខេត្តតំបន់ឆ្នេរសមុទ្រមួយនេះ។
ខេត្តព្រះសីហនុ គឺជាទិសដៅទេសចរណ៍នៃតំបន់ឆ្នេរធំជាងគេរបស់ប្រទេសកម្ពុជា ដែលត្រូវបានរដ្ឋាភិបាលជ្រើសរើសជាទិសដៅទេសចរណ៍មុនគេ សម្រាប់ស្វាគមន៍ការត្រឡប់មកវិញនៃភ្ញៀវទេសចរចាក់វ៉ាក់សាំងការពារជំងឺកូវីដ ១៩ ពេញលេញ។
អ្នកនាំពាក្យរដ្ឋបាលខេត្តព្រះសីហនុលោក ឃាង ភារម្យ បានប្រាប់ភ្នំពេញ-ប៉ុស្តិ៍នៅថ្ងៃទី ២០ ខែធ្នូថា បច្ចុប្បន្នអ្នកវិនិយោគក៏ដូចជាភ្ញៀវជនជាតិចិនបានធ្វើដំណើរចូលមកខេត្តព្រះសីហនុបណ្តើរៗហើយ ក្រោយពេលរដ្ឋាភិបាលសម្រេចបើកសេដ្ឋកិច្ចឡើងវិញ ជាពិសេសការទទួលភ្ញៀវទេសចរបរទេសដែលចាក់វ៉ាក់សាំងប្រឆាំងនឹងជំងឺកូវីដ ១៩ គ្រប់ដូស។
លោកប្រាប់ថា៖ «ការវិលត្រឡប់មកវិញរបស់ជនជាតិចិន ជាសញ្ញាវិជ្ជមានមួយក្នុងការចូលរួមស្តារសេដ្ឋកិច្ចខេត្តព្រះសីហនុ ក្រោយវិបត្តិកូវីដ ១៩ ដែលបានយាយីដល់សេដ្ឋកិច្ចកន្លងមក»។
ទោះយ៉ាងណាលោកបញ្ជាក់ថា ជនជាតិចិនចូលមកខេត្តព្រះសីហនុមិនទាន់មានចំនួនច្រើនទេ។
លោក វណ្ណ សុខហេង ប្រធានសភាពាណិជ្ជកម្មខេត្តព្រះសីហនុបានប្រាប់ថា ជាធម្មតាពេលមានការបើកជើងហោះហើរឡើងវិញ ចំនួនវិនិយោគិន និងភ្ញៀវទេសចរនឹងមានកំណើន ប៉ុន្តែទោះយ៉ាងណាមិនទាន់អាចចាត់ទុកថា ប្រសើរខ្លាំងបានទេ ព្រោះកូវីដ ១៩ ជាវិបត្តិសកល។
លោកបន្ថែមថា ការវិលត្រឡប់របស់វិនិយោគិនចិន ឬវិនិយោគិនប្រទេសដទៃទៀត ក៏អាស្រ័យទៅលើស្ថានភាពសេដ្ឋកិច្ចរបស់ប្រទេសគេ និងស្ថានភាពសេដ្ឋកិច្ចសកលផងដែរ។
លោកនិយាយថា៖ «សភាពាណិជ្ជកម្មកម្ពុជា ក៏ដូចជាសភាពាណិជ្ជខេត្តព្រះសីហនុបាននិងកំពុងខិតខំពង្រឹងការផលិត និងទីផ្សារក្នុងស្រុកឱ្យបានរឹងមាំ ព្រោះគ្មានជម្រើសអ្វីផ្សេងក្រៅពីខិតខំដោយខ្លួនឯងទេ។ ម្យ៉ាងវិញទៀត បើទោះជាស្ថានភាពបានល្អប្រសើរ ឬត្រឡប់ទៅរកភាពប្រក្រតី ក៏មិនត្រូវបោះបង់អាជីវកម្មក្នុងដៃហើយទៅពឹងផ្អែកលើគេទាំងស្រុងនោះទេ»។
លោកលើកឡើងទៀតថា៖ «ប្រទេសយើងត្រូវជំរុញ SME ឱ្យខ្លាំង។ ទោះមានវិបត្តិអ្វីក៏យើងអាចរស់រានបាន ហើយបើមានឱកាសពីវិនិយោគិនខាងក្រៅមក យើងអាចចាប់យកឱកាសនោះ តែសុំកុំបោះបង់នូវអ្វីដែលយើងមាននៅក្នុងដៃ»។
កាលពីថ្ងៃទី ១៨ ខែតុលាឆ្នាំ ២០២១ រដ្ឋាភិបាលកម្ពុជាបានសម្រេចជ្រើសរើសវិទ្យាស្ថាននគរូបនីយកម្ម និងឌីហ្សាញស៊ិនជិន (UPDIS) ដ៏មានបទពិសោធរបស់ប្រទេសចិនឱ្យរៀបចំផែនការមេសម្រាប់អភិវឌ្ឍ និងប្រែក្លាយខេត្តព្រះសីហនុឱ្យទៅជា «តំបន់សេដ្ឋកិច្ចពិសេសគំរូពហុបំណង» ដែលជាមជ្ឈមណ្ឌលនវានុវត្តន៍ថ្មី និងជាមជ្ឈមណ្ឌលឡូជីស្ទិក និងរមណីយដ្ឋានក្នុងតំបន់។
ផែនការមេនេះ គឺជាផែនទីបង្ហាញផ្លូវដ៏សំខាន់ក្នុងការអភិវឌ្ឍក្រុងព្រះសីហនុទៅជា «ទីក្រុង Shenzhen ទី ២» ស្របតាមគោលនយោបាយអភិវឌ្ឍន៍ឧស្សាហកម្ម ២០១៥-២០២៥។
ទិន្នន័យពីរដ្ឋបាលខេត្តព្រះសីហនុឱ្យដឹងថា ចាប់ពីឆ្នាំ ១៩៩៤ ដល់ពាក់កណ្តាលឆ្នាំ ២០២០ ខេត្តព្រះសីហនុបានទាក់ទាញការវិនិយោគជិត ៤ ពាន់លានដុល្លារ។ គិតត្រឹមខែឧសភា ឆ្នាំ ២០២០ ក្រុមហ៊ុនចំនួន ២០ បានបង្កើតឆ្នេរ និងកោះចំនួន ១១ ៦៣៧ ហិកតាជាមួយនឹងការវិនិយោគដើមទុនសរុប ៣,៩ ពាន់លានដុល្លារ។
គិតត្រឹមខែមិថុនាឆ្នាំ ២០២០ ខេត្តព្រះសីហនុមានវត្តមានរោងចក្រឧស្សាហកម្មពាណិជ្ជកម្ម និងសេវាកម្មចំនួន ៩២២ ក្នុងនោះមានសណ្ឋាគារ ៩៨ ផ្ទះសំណាក់ ២៦២ ភោជនីយដ្ឋាន ៣៤០ បឹងហ្គាឡូ ២៦ កន្លែងខារ៉ាអូខេ ៣៩។ នៅចន្លោះឆ្នាំ ២០០៧ ទៅដល់ខែកក្កដាឆ្នាំ ២០២០ គម្រោងចំនួន ៨១៩ ត្រូវបានអនុម័តក្នុងខេត្ត។ មុនកូវីដ ១៩ ខេត្តព្រះសីហនុបានស្វាគមន៍ ភ្ញៀវទេសចរប្រមាណ ២ លាននាក់កាលឆ្នាំ ២០១៨ ផងដែរ៕ LA
វីដេអូ៖