កាលពីមុន វិទ្យាល័យ ហ៊ុន សែន សេរីភាព មិនធ្លាប់បានប្រើប្រាស់បច្ចេកវិទ្យាឌីជីថលទេ រហូតដល់ពេលផ្ទុះឡើងជំងឺរាតត្បាតកូវីដ ១៩ ដែលនាំឱ្យសាលារៀនបិទទ្វារនៅឆ្នាំ ២០២០។
ក្នុងអំឡុងពេលជំងឺរាតត្បាតនេះ ការបង្រៀនត្រូវបានធ្វើតាមអនឡាញ ហើយសាលាបានចាប់ផ្ដើមប្រើប្រព័ន្ធគ្រប់គ្រងព័ត៌មានសាលារៀន (SIS) ដែលបង្កើតឡើង និងដាក់ឱ្យប្រើប្រាស់ដោយក្រុមហ៊ុន មិត្តហ្វូន សម្រាប់សាលារៀននៅទូទាំងប្រទេស ដើម្បីបម្រើដល់សកម្មភាពរៀន និងបង្រៀន។
នៅក្នុងបរិបទជំងឺរាតត្បាតកូវីដ ១៩ និងការបង្រៀនធ្វើឡើងតាមអនឡាញ ប្រព័ន្ធ SIS បានផ្ដល់អត្ថប្រយោជន៍ជាច្រើនដល់ការរៀនសូត្ររបស់សិស្សផង និងដល់ការងារបង្រៀនរបស់គ្រូផង។ SIS គឺជាកម្មវិធីមួយសម្រាប់រក្សាទុកឯកសារនៅមួយកន្លែងដែលងាយស្រួលក្នុងការស្រាវជ្រាវស្វែងរក ដោយចំណាយពេលត្រឹមតែប៉ុន្មានវិនាទីប៉ុណ្ណោះ ព័ត៌មានជាច្រើនអាចរកឃើញភ្លាម ។
ប្រព័ន្ធនេះក៏ជួយទប់ស្កាត់មិនឱ្យឯកសារបាត់ ឬខូចខាតដោយសារសត្វល្អិត ទឹក ឬក្រដាសពុកផុយជាដើម ។ ជាមួយគ្នានេះដែរ ប្រព័ន្ធបណ្ណសារឌីជីថល ជួយរក្សាទុកព័ត៌មានរបស់សាលារៀនឱ្យកាន់តែមានសុវត្ថិភាពជាងមុន។
យោងតាមលោក ម៉ម សុធានី នាយកវិទ្យាល័យ ហ៊ុន សែន សេរីភាព បានឱ្យដឹងថា អ្វីៗមានភាពងាយស្រួលជាងមុន នៅពេលដែលសាលាបានងាកមកប្រើប្រាស់ប្រព័ន្ធ SIS។ ទាំងគ្រូបង្រៀន និងសិស្សទទួលបានអត្ថប្រយោជន៍ជាច្រើនពីប្រព័ន្ធនេះ។
លោកនាយក ម៉ម សុធានី មានប្រសាសន៍ថា៖ «ឥឡូវនេះ លោកគ្រូអ្នកគ្រូអាចបញ្ចូលពិន្ទុសិស្សនៅក្នុងប្រព័ន្ធបាន។ សិស្សអាចតាមដានកាលវិភាគសិក្សា និងថ្នាក់រៀនរបស់ខ្លួនបាន។ ប្រព័ន្ធនេះងាយស្រួលក្នុងការប្រើប្រាស់នៅពេលយើងយល់ដឹងអំពីវា»។
អ្នកគ្រប់គ្រងរដ្ឋបាលសាលា គឺលោក ឈិន គឹមហេង បានថ្លែងថា៖ «អ្វីៗកាន់តែស្រួលប្រើប្រាស់ជាងមុនជាមួយនឹងប្រព័ន្ធ SIS។ កាលពីមុន កិច្ចការខ្លះដែលចំណាយពេល ៣០ នាទី ទៅមួយម៉ោងដូចជាការបញ្ចូលពិន្ទុប្រចាំឆ្នាំ ឥឡូវនេះចំណាយពេលត្រឹមតែ ៥ នាទីប៉ុណ្ណោះ»។
ប្រព័ន្ធ SIS ដែលត្រូវបានបង្កើតដោយក្រុមហ៊ុនមិត្តហ្វូន គឺត្រូវបានអភិវឌ្ឍឡើងសម្រាប់ដាក់ពង្រាយទៅគ្រប់សាលារៀននៅតាមទីជនបទ ដែលត្រូវការប្រើប្រព័ន្ធនេះជាចាំបាច់បំផុត។
ប្រធានផ្នែកទទួលបន្ទុកប្រព័ន្ធ SIS នៅក្រុមហ៊ុនមិត្តហ្វូនបានឱ្យដឹងថា៖ «យើងនឹងដាក់ពង្រាយ និងគាំទ្រដល់ប្រព័ន្ធអប់រំ ដោយប្រើប្រព័ន្ធ SIS នេះដោយផ្ដល់ស៊ីមកាតដែលប្រើអ៊ីនធឺណិតដោយឥតគិតថ្លៃ ដើម្បីឱ្យសិស្សានុសិស្សអាចរៀនសូត្រដោយមិនចាំបាច់បារម្ភអំពីស្ថានភាពហិរញ្ញវត្ថុគ្រួសារឡើយ»។
មិត្តហ្វូន បាននិងកំពុងនាំមុខគេនៅក្នុងការជួយគាំទ្រដល់រាជរដ្ឋាភិបាលកម្ពុជាដើម្បីអនុវត្តកម្មវិធីអភិវឌ្ឍន៍ឌីជីថលជាតិរបស់ខ្លួន។ កន្លងមក ក្រុមហ៊ុនបានធ្វើការយ៉ាងជិតស្និទ្ធិជាមួយក្រសួងស្ថាប័នរដ្ឋសំខាន់ៗ ដើម្បីអនុវត្តគម្រោងឌីជីថលូបនីយកម្មនៅក្នុងវិស័យជាច្រើន ដូចជា វិស័យអប់រំ សុខាភិបាល និងដឹកជញ្ជូន។
ជាក្រុមហ៊ុនឈានមុខគេមួយនៅក្នុងវិស័យទូរគមនាគមន៍ និងបច្ចេកវិទ្យាឌីជីថល មិត្តហ្វូន មានបណ្ដាញហេដ្ឋារចនាសម្ព័ន្ធធំជាងគេបំផុត ដែលបម្រើសេវាកម្មដល់ប្រជាជនកម្ពុជាប្រមាណ ៩ លាននាក់ នៅទូទាំងប្រទេស៕