កម្ពុជាទទួលបាននូវបទពិសោធទេសចរណ៍បែបឌីជីថល 4.0 ពីបច្ចេកវិទ្យាប្រកបដោយភាពច្នៃប្រឌិត និងដំណោះស្រាយការទូទាត់តាមរយៈភាពជាដៃគូរបស់ក្រុមហ៊ុន វីង និង ក្រុមហ៊ុន វ៉នឌើរផាស!
ក្រុមហ៊ុន វ៉នឌើរផាស ថេកណឡជី ឯ.ក បានចុះហត្ថលេខាលើអនុស្សរណៈយោគយល់គ្នាជាមួយ ក្រុមហ៊ុន វីង ម៉ាន់នី (ខេមបូឌា) ម.ក ដើម្បីសហការជាដៃគូយុទ្ធសាស្ត្រក្នុងការជំរុញការទូទាត់តាមឌីជីថលក្នុងយុគសម័យទំនើបនៃវិស័យទេសចរណ៍ឌីជីថលនៅកម្ពុជា។
លោក ម៉ានូ រ៉ាចាន់ អគ្គនាយកនៃក្រុមហ៊ុន វីង និងលោក Frederic H. Proulx ប្រធានក្រុមហ៊ុន វ៉នឌើរផាស និងជាប្រធានសភាពាណិជ្ជកម្មកាណាដានៅកម្ពុជាបានចុះហត្ថលេខាលើកិច្ចព្រមព្រៀងនៃភាពជាដៃគូយុទ្ធសាស្ត្រស្តីពីកិច្ចសហការរវាងក្រុមហ៊ុន វ៉នឌើរផាស និងក្រុមហ៊ុន វីង ដើម្បីផ្សព្វផ្សាយបច្ចេកវិទ្យាទូទាត់ដោយមិនប្រើប្រាស់សាច់ប្រាក់ ការទូទាត់តាមប្រព័ន្ធអេឡិចត្រូនិក ដំណោះស្រាយទូទាត់ឧបករណ៍ពាក់ដៃ សំបុត្រឆ្លាតវៃ ក៏ដូចជាឌីជីថលភាវូនីយកម្មនៃបទពិសោធន៍ភ្ញៀវទេសចរក្នុងអំឡុងពេលក្រោយកូវីដ។
លោក ម៉ានូ រ៉ាចាន់ បានមានប្រសាសន៍ថា៖ «ដំណោះស្រាយឌីជីថលជួយអ្នកទេសចរឱ្យរៀបចំផែនការធ្វើដំណើររបស់ពួកគេ ហើយថែមទាំងជួយឱ្យការទូទាត់បានលឿន មានសុវត្ថិភាព និងមានការការពារ នៅមុនពេល អំឡុងពេល និងក្រោយពេលការធ្វើដំណើររបស់ពួកគេក្នុងប្រទេសកម្ពុជា ដោយប្រើប្រាស់ប្រព័ន្ធដំណោះស្រាយនៃការទូទាត់បែបឌីជីថលប្រកបដោយភាពច្នៃប្រឌិត និងទូលំទូលាយរបស់ វីង។ ភាពជាដៃគូនៅថ្ងៃនេះនឹងអនុញ្ញាតឱ្យពួកយើងពង្រីកដំណោះស្រាយ និងប្រព័ន្ធអេកូឡូស៊ីនៃការទូទាត់តាមឌីជីថលរបស់យើង ដើម្បីគាំទ្រដល់ការស្តារឡើងវិញនៃវិស័យទេសចរណ៍នៅក្នុងប្រទេសកម្ពុជា និងជួយប្រទេសនេះក្នុងការប្រកួតប្រជែងជាមួយប្រទេសដទៃទៀតនៅក្នុងតំបន់»។
ខ្សែដៃ វ៉នឌើរផាស អនុញ្ញាតឱ្យអ្នកប្រើប្រាស់ធ្វើការទូទាត់ដោយមិនចាំបាច់ប្រើសាច់ប្រាក់ផ្ទាល់ជាមួយហាងជាច្រើននៅក្នុងប្រទេសកម្ពុជា ដោយប្រើប្រាស់សេវាកម្មទូទាត់តាមឌីជីថលរបស់ វីង។
លោក Frederic H. Proulx បានមានប្រសាសន៍ថា៖ «ការវិវត្តនៃការធ្វើដំណើរជាសាកល ដែលជាផែនការទេសចរណ៍បែបឌីជីថល 4.0 គឺជាចំណុចសំខាន់មួយដែល វ៉នឌើរផាស អាចជាដំណោះស្រាយដ៏មានប្រសិទ្ធភាពសម្រាប់អាជីវកម្ម និងប្រតិបត្តិករទេសចរណ៍កម្ពុជា នៅពេលដែលពួកគេកំពុងប្រកួតប្រជែងនៅក្នុងតំបន់ តាមរយៈការផ្តល់នូវបទពិសោធន៍នៃការធ្វើដំណើរដ៏រលូន និងងាយស្រួលបំផុតសម្រាប់អ្នកទេសចរ»។
វ៉នឌើរផាស ត្រូវបានគាំទ្រដោយក្រសួងទេសចរណ៍នៃព្រះរាជាណាចក្រកម្ពុជាក្នុងភាពជាដៃគូដែលមានគោលបំណងប្រតិបត្តិ និងផ្សព្វផ្សាយប្រព័ន្ធលក់សំបុត្រនៅតាមតំបន់ទេសចរណ៍ និងគោលដៅនានារបស់ប្រទេសកម្ពុជា ដោយភ្ជាប់ជាមួយគេហទំព័រ និងកម្មវិធីទូរស័ព្ទ «Visit Cambodia» និង «Kingdom of Wonder»។
ក្រុមហ៊ុន វីង និងក្រុមហ៊ុន វ៉នឌើរផាស មានឆន្ទៈក្នុងការប្រើប្រាស់ជំនាញរបស់ពួកគេក្នុងបច្ចេកវិទ្យាប្រកបដោយភាពច្នៃប្រឌិត និងដំណោះស្រាយការទូទាត់តាមឌីជីថល ដើម្បីជំរុញការអភិវឌ្ឍវិស័យទេសចរណ៍នៅកម្ពុជា។ ក្រុមហ៊ុន វីង ត្រូវបានគេស្គាល់តាមរយៈភ្នាក់ងារ វីង ដែលអាចឱ្យអ្នកប្រើប្រាស់ធ្វើការដកប្រាក់បានគ្រប់ពេលវេលា និងគ្រប់ទីកន្លែង ខណៈដែលកម្មវិធីស្មាតហ្វូន វីង ផ្តល់នូវដំណោះស្រាយទូទាត់តាមឌីជីថលជាច្រើន។ ក្រុមហ៊ុន វ៉នឌើរផាស គឺជាក្រុមហ៊ុនដែលអាចគ្រប់គ្រងព្រឹត្តិការណ៍ និងលក់សំបុត្រឆ្លាតវៃដោយមិនបាច់ប្រើសាច់ប្រាក់ផ្ទាល់ ដែលត្រូវបានដាក់ឱ្យដំណើរការដោយមានការគាំទ្រពីក្រុមហ៊ុន HaystackFund ដែលជាក្រុមហ៊ុនមូលធនវិនិយោគសាកល។ ក្រុមហ៊ុន Haystack Fund បានដាក់ទុនជាទឹកប្រាក់ជាង ២ លានដុល្លារអាមេរិក ដើម្បីវិនិយោគលើការបណ្តាក់ទុនឌីជីថលនៅក្នុងប្រទេសកម្ពុជា រួមទាំង ១ លានដុល្លារអាមេរិក ដើម្បីអភិវឌ្ឍក្រុមហ៊ុន វ៉នឌើរផាស ថេកណឡជី៕