ភ្នំពេញៈ រដ្ឋាភិបាលកម្ពុជាដាក់ឱ្យអនុវត្តជាផ្លូវការនូវឯកសារ «ក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ ១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣» សំដៅជំរុញកំណើនសង្គមសេដ្ឋកិច្ចជាតិ ប្រកបដោយភាពធន់ក្នុងរយៈពេលមធ្យម និងរយៈពេលវែង។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងពិធីផ្សព្វផ្សាយដាក់ឱ្យអនុវត្តកម្មវិធីនេះកាលពីថ្ងៃទី ២២ ខែធ្នូ ឆ្នាំ ២០២១ បានឱ្យដឹងថា ឯកសារដ៏មានសារៈសំខាន់នេះ គឺជាមូលដ្ឋានគ្រឹះ និងជាផែនទីបង្ហាញផ្លូវសម្រាប់ការអនុវត្តយុទ្ធសាស្ត្រ និងវិធានការសកម្មភាពជាក់លាក់របស់រាជរដ្ឋាភិបាលក្នុងពេលចំពោះមុខ និងរយៈពេលមធ្យម។ ឯកសារនេះសំដៅស្តារ និងជំរុញកំណើនសេដ្ឋកិច្ចកម្ពុជាឱ្យត្រឡប់ទៅរកកំណើនសក្តានុពលរបស់ខ្លួន និងម្យ៉ាងទៀតសំដៅពង្រឹងភាពធន់សម្រាប់អភិវឌ្ឍសង្គម សេដ្ឋកិច្ចប្រកបដោយចីរភាព និងបរិយាបន្នក្នុងរយៈពេលវែងផងដែរ។
លោកបន្តថា ក្នុងរយៈពេល ២ ឆ្នាំនៃវិបត្តិនៃជំងឺកូវីដ ១៩ កន្លងមកនេះគ្រប់គ្នាអាចកត់សម្គាល់ឃើញយ៉ាងច្បាស់នូវផលវិបាកអវិជ្ជមាន ដែលកើតចេញពីវិបត្តិនេះទៅលើស្ថានភាពសង្គម- សេដ្ឋកិច្ចកម្ពុជា។ ក្រៅពីការគំរាមកំហែង និងឆក់យកជីវិតរបស់ប្រជាជន វិបត្តិនេះបានលាតត្រដាងនូវចំណុចផុយស្រួយមួយចំនួននៃមូលដ្ឋានសេដ្ឋកិច្ចកម្ពុជា ដែលងាយនឹងទទួលរងនូវផលប៉ះពាល់ពីកត្តាខាងក្រៅ។
លោកបានពន្យល់ថា ជាក់ស្តែងការបន្ទច់បង្អាក់ទៅលើខ្សែច្រវាក់ផ្គត់ផ្គង់ ក៏ដូចជាការថមថយនៃតម្រូវការការបញ្ជាទិញផលិតផលកម្ពុជា ក្រោយការដាក់ចេញវិធានការសុខាភិបាល និងវិធានការរដ្ឋបាលនានាពីសំណាក់បណ្តាប្រទេសនៅលើសកលលោក គឺជាសក្ខីភាពដែលបង្ហាញថា ស្ថិរភាពរបស់វិស័យចន្ទល់នៃកំណើនសេដ្ឋកិច្ចកម្ពុជាមានការពាក់ព័ន្ធយ៉ាងជិតស្និទ្ធជាមួយនឹងនិន្នាការសេដ្ឋកិច្ចតំបន់ និងសកល។
លោកបន្តថា រាជរដ្ឋាភិបាលក៏នឹងបន្តផ្តល់ការអនុគ្រោះផ្នែកពន្ធដូចដែលបានដាក់ចេញវិធានការទាំង ១០ ជុំកន្លងមកសម្រាប់ឆមាសទី ១ ឆ្នាំ ២០២២ ដល់ប្រតិបត្តិការនៅក្នុងវិស័យទេសចរណ៍ និងវិស័យអាកាសចរណ៍ដែលបានរងនូវផលប៉ះពាល់ ដោយសារវិបត្តិនៃជំងឺកូវីដ ១៩ ដើម្បីផ្តល់ការគាំទ្របន្ថែមដល់ធុរជនពាក់ព័ន្ធ និងត្រៀមខ្លួនទទួលភ្ញៀវទេសចរ។
រាជរដ្ឋាភិបាលក៏បានត្រៀមថវិកា ២៥០ លានដុល្លារ នៅក្នុងឆ្នាំ ២០២២ សម្រាប់ផ្តល់ឥណទានដោយត្រង់ទៅធនាគារសហគ្រាសធុនតូច និងមធ្យម និងធនាគារអភិវឌ្ឍកសិកម្ម ដែលមានអត្រាការប្រាក់ទាបផងដែរ។
លោក គី សេរីវឌ្ឍន៍ អ្នកជំនាញសេដ្ឋកិច្ចបានថ្លែងថា ការដាក់ឱ្យអនុវត្តជាផ្លូវការនូវឯកសារខាងលើគឺជាយុទ្ធសាស្ត្រថ្មីមួយទៀតក្នុងការជំរុញកំណើនសង្គមសេដ្ឋកិច្ចឱ្យមានដំណើរការ តាមរយៈការរស់នៅជាមួយនឹងកូវីដ ១៩។
លោកពន្យល់ថា ទោះជំងឺកូវីដ ១៩ នៅតែបន្តផ្ទុះឡើង នៅក្នុងប្រទេសក៏នៅតែអាចដំណើរការសេដ្ឋកិច្ចបានដោយមានប្រព័ន្ធគ្រប់គ្រងសេដ្ឋកិច្ច នៅក្នុងបរិបទនៃជំងឺកូវីដ ១៩។ មួយវិញទៀត ពាក់ព័ន្ធនឹងរាជរដ្ឋាភិបាលលើកលែងពន្ធទៅដល់វិស័យសំខាន់ៗ ជាពិសេសវិស័យទេសចរណ៍មួយរយៈពេលទៀតក្នុងគោលបំណងលើកកម្ពស់ឱ្យវិស័យនេះមានដំណើរការឡើងវិញ៕ LA