ភ្នំពេញៈ កម្ពុជារំពឹងថា នឹងអាចធ្វើការនាំចេញដោយផ្ទាល់នូវផលិតផលផ្លែមៀនប៉ៃលិនទៅកាន់ទីផ្សារប្រទេសចិនក្នុងពេលឆាប់ៗ បន្ទាប់ពីអគ្គរដ្ឋបាលគយប្រទេសចិននឹងធ្វើការវាយតម្លៃ និងវិភាគហានិភ័យក្នុងសប្តាហ៍ទី ១ នៃខែមករា ឆ្នាំ ២០២២ ខាងមុខតាមរយៈប្រព័ន្ធវីដេអូ បន្ទាប់ពីការស្នើសុំរបស់ក្រសួងកសិកម្ម។ នេះបើតាមក្រសួងកសិកម្ម រុក្ខាប្រមាញ់ និងនេសាទ។
លិខិតរបស់ក្រសួងកសិកម្មបានឱ្យដឹងថា ក្រសួងនឹងសម្រិតសម្រាំងយកចម្ការមួយចំនួនជាតំណាង និងរោងចក្រវេចខ្ចប់សម្លាប់សមាសភាពចង្រៃតែមួយគត់ក្នុងខេត្តប៉ៃលិន ដើម្បីវាយតម្លៃបញ្ចប់ដំណាក់កាល មុននឹងបន្តនីតិវិធីរៀបចំចុះហត្ថលេខាលើពិធីសារបច្ចេកទេស។
ជាមួយគ្នានេះក្រសួងក៏បានប្រាប់ឱ្យម្ចាស់ចម្ការ សហគមន៍កសិកម្មមៀនប៉ៃលិន និងម្ចាស់រោងចក្រវេចខ្ចប់សម្លាប់សមាសភាពចង្រៃ ត្រៀមលក្ខណៈជាស្រេចក្នុងការរួមសហការជាមួយមន្ត្រីនៃអគ្គនាយកដ្ឋានកសិកម្ម ដើម្បីឱ្យដំណើរការវាយតម្លៃ ការវិភាគហានិភ័យពីចម្ងាយនេះទទួលបានជោគជ័យ តាមផែនការគ្រោងទុក។
បន្ថែមលើនេះក្រសួងក៏អំពាវនាវដល់ម្ចាស់ចម្ការ និងរោងចក្រវេចខ្ចប់សម្លាប់សមាសភាពចង្រៃ ចាប់ផ្តើមរួសរាន់ដាក់ពាក្យស្នើសុំចុះបញ្ជី ដើម្បីស្នើសុំនាំចេញផ្លែមៀនប៉ៃលិនទៅកាន់ប្រទេសចិន នៅអគ្គនាយកដ្ឋានកសិកម្មផងដែរ។
ប្រធានសហគមន៍កសិកម្មផលិតផលមៀនប៉ៃលិន លោក សួស ស៊ីយ៉ាត បានប្រាប់ថា ក្រោយទទួលបានព័ត៌មានពីមន្ទីរកសិកម្មខេត្តប៉ៃលិនពីការត្រៀមវាយតម្លៃ និងវិភាគហានិភ័យនៃផលិតផលមៀនប៉ៃលិននៅខែមករាខាងមុខ ខាងសហគមន៍នឹងខិតខំបន្តការដាំដុះ និងថែទាំធ្វើយ៉ាងណាដើម្បីឱ្យស្របទៅតាមស្តង់ដា ដែលប្រទេសចិនចង់បាន។
លោកបន្ថែមថា ក្នុងចំណោមកសិករជាង ២ ពាន់គ្រួសារនៅខេត្តប៉ៃលិន មានប្រមាណតែ ៣០ ភាគរយប៉ុណ្ណោះ ដែលបានដាំដុះតាមរយៈកម្មវិធីអនុវត្តកសិកម្មល្អ (GAP) ក្រៅពីនេះការដាំដុះមិនទាន់បានត្រឹមត្រូវតាមស្តង់ដានៅឡើយទេ។
លោកបញ្ជាក់ថា៖ «យើងត្រូវមានការត្រៀមខ្លួនច្រើនណាស់ចំពោះការងារនេះ ព្រោះទីផ្សារចិនតឹងរ៉ឹងណាស់ មិនងាយឱ្យយើងនាំចូលបានទេបើយើងមិនព្រមធ្វើតាមតម្រូវការស្តង់ដារបស់គេ ប៉ុន្តែបើយើងអាចនាំចេញទៅបានឆាប់ៗមែននោះ កសិករដាំមៀនទាំងអស់មិនត្រឹមតែខេត្តប៉ៃលិននោះទេ នឹងមិនចាំបាច់បារម្ភពីរឿងទីផ្សារទៀតឡើយ»។
លោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន បានប្រាប់ភ្នំពេញប៉ុស្តិ៍កាលពីថ្ងៃទី ២៣ ខែធ្នូថា មន្ទីរកសិកម្មបានចងក្រងជាសហគមន៍ និងបានបណ្តុះបណ្តាលដល់កសិករជាសមាជិកពីការអនុវត្តកសិកម្មល្អ (GAP) ហើយនឹងធ្វើការណែនាំបន្ថែមទៀតពីការផលិតផ្លែមៀនធ្វើយ៉ាងណាឱ្យត្រឹមត្រូវបានស្តង់ដារបស់ទីផ្សារប្រទេសចិន។
លោកបន្តថា បច្ចុប្បន្នខេត្តប៉ៃលិនមានរោងចក្រតែមួយគត់ដែលបានសាងសង់ ដែលរោងចក្រនេះមានឧបករណ៍អប់ផ្សែង ដើម្បីសម្លាប់មេរោគនៅលើសម្បកផ្លែមៀន និងត្រូវការអ្នកជំនាញការចិនមកពិនិត្យបន្ថែមទៀត មុននឹងអាចនាំទៅប្រទេសចិនបាន។
លោកបន្ថែមថា៖ «យើងសង្ឃឹមថា ភាគីចិន ឬក៏ដៃគូពាណិជ្ជកម្មជាមួយចិននឹងអនុញ្ញាតឱ្យយើងនាំចូលផ្លែមៀនខ្មែរទៅកាន់ទីផ្សារប្រទេសចិន ដោយយើងនឹងកែតម្រូវរាល់ចំណុចខ្វះខាតទាំងអស់តាមការស្នើសុំភាគីចិន ជាពិសេសគឺធ្វើយ៉ាងណាឱ្យស្របតាមស្តង់ដាភូតគាមអនាម័យ»។
បើតាមលោក សាយ សុផាត ក្នុងខេត្តប៉ៃលិនមានផ្ទៃដីដាំដុះមៀនជាង ៥ ០០០ ហិកតា ដោយដើមមៀនគេប្រមូលផល ២ ដងក្នុង ១ ឆ្នាំ និងទទួលផលចន្លោះពី ១-២ ម៉ឺនតោន។ ក្នុងចំណោមកសិករដាំដុះជាង ២ ០០០ គ្រួសារ គឺមានជាង ២០០ គ្រួសារដែលបានចូលក្នុងសហគមន៍ និងបានអនុវត្តតាមគោលការណ៍ GAP។
កន្លងមកផ្លែមៀនប៉ៃលិន ត្រូវបានឈ្មួញនាំចេញទៅប្រទេសចិនតាមរយៈក្រុមហ៊ុនរបស់ប្រទេសជិតខាងតែប៉ុណ្ណោះ ដោយសារបញ្ហាលក្ខខណ្ឌភូតគាមអនាម័យ បានធ្វើឱ្យកម្ពុជាមិនអាចនាំចេញមៀនទៅចិនដោយផ្ទាល់បានឡើយ៕ LA