ភ្នំពេញៈ អគ្គនាយកដ្ឋានពន្ធដារ (GDT) បានអំពាវនាវដល់ម្ចាស់អាជីវកម្មដែលកំពុងធ្វើប្រតិបត្តិការតាមប្រព័ន្ធអេឡិចត្រូនិក (អាជីវកម្មតាមអនឡាញ) ត្រូវទៅចុះបញ្ជីនៅអគ្គនាយកដ្ឋានពន្ធដារ ចាប់ពីថ្ងៃទី ១ ខែមករា ឆ្នាំ ២០២២ តទៅដើម្បីអនុវត្តអាករលើតម្លៃបន្ថែមលើទំនិញ និងសេវាឌីជីថល ស្តីពីការធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា។
លោក គង់ វិបុល អគ្គនាយកនៃអគ្គនាយកដ្ឋានពន្ធដារបានលើកឡើងនៅក្នុងសិក្ខាសាលាស្តីពីការផ្សព្វផ្សាយការអនុវត្តអាករលើតម្លៃបន្ថែមចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក កាលពីថ្ងៃទី ២២ ខែធ្នូថា ក្នុងឆ្នាំ ២០២០-២០២១ នៅគ្រាដែលវិស័យជាច្រើននៅលើសកលលោកត្រូវដួលរលំដោយសារវិបត្តិកូវីដ ១៩ បែរជាវិស័យ E-Commerce រីកដុះដាលកាន់តែខ្លាំងដោយសារតែការលក់ដូរទំនិញផ្សេងៗត្រូវធ្វើតាមអនឡាញវិញ។
លោកនិយាយថា៖ «កន្លងទៅការធ្វើប្រតិបត្តិការនេះមិនបានគោរពកាតព្វកិច្ចពន្ធដារបានត្រឹមត្រូវទេ សូម្បីតែការធ្វើប្រតិបត្តិការតាមប្រព័ន្ធអេឡិចត្រូនិកឆ្លងប្រទេសដូចជា ក្រុមហ៊ុន Netflix, Facebook, Google និង Amazone ជាដើម ក៏នៅមិនទាន់បានអនុវត្តតាមច្បាប់បញ្ញត្តិរបស់អគ្គនាយកដ្ឋានពន្ធដារនៅឡើយទេ ពោលគឺនៅមានចន្លោះខ្វះខាត»។
ទោះយ៉ាងណា លោកលើកឡើងថា ថ្មីៗនេះក្រុមហ៊ុនប្រតិបត្តិការពាណិជ្ជកម្មតាមប្រព័ន្ធអេឡិចត្រូនិកអន្តរជាតិទាំងនោះបានចាប់ផ្តើមពិភាក្សាជាមួយអគ្គនាយកដ្ឋានពន្ធដារបានខ្លះៗហើយពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា ដើម្បីចៀសវាងការខូចកេរ្តិ៍ឈ្មោះរបស់ក្រុមហ៊ុននៅលើផ្សារហ៊ុនអន្តរជាតិ។
លោកបន្ថែមថា៖ «បច្ចុប្បន្ននៅកម្ពុជាអ្នកបើកអាជីវកម្មតាមប្រព័ន្ធអនឡាញកំពុងមានការរីកចម្រើនខ្លាំង ប៉ុន្តែមិនទាន់បានមកចុះបញ្ជីឱ្យបានត្រឹមត្រូវទេ ដូចនេះដើម្បីចៀសវាងការដាក់ទោសទណ្ឌ សូមរួសរាន់ទៅបង់ពន្ធឱ្យបានទាន់ពេលវេលា»។
លោក គីង រតនា អគ្គនាយកក្រុមហ៊ុនសេវាកម្មបញ្ញើទំនិញក្នុងស្រុក និងក្រៅប្រទេស KR Express បានឱ្យដឹងថា ក្រុមហ៊ុនរបស់លោកគ្រោងនឹងទៅចុះបញ្ជីតាមកាលកំណត់របស់អគ្គនាយកដ្ឋានពន្ធដារនៅឆ្នាំក្រោយ ដោយបច្ចុប្បន្នក្រុមហ៊ុនកំពុងរៀបចំឯកសារដែលពន្ធដារត្រូវការ ដើម្បីបំពេញកាតព្វកិច្ចពន្ធឱ្យបានត្រឹមត្រូវ។
យ៉ាងណាក៏ដោយ លោកបានសំណូមពរដល់អគ្គនាយកដ្ឋានពន្ធដារ បន្តការផ្សព្វផ្សាយបន្ថែមទៀត ជាពិសេសដំណើរការនីតិវិធី និងអត្ថប្រយោជន៍ការចុះបញ្ជីនេះទៅដល់ពាណិជ្ជករតាមប្រព័ន្ធឱ្យបានទូលំទូលាយ ដើម្បីចៀសវាងការធ្វេសប្រហែស ដោយសារមិនដឹង ឬខកខានចំពោះការចុះបញ្ជីនេះ ដែលនឹងអាចធ្វើឱ្យអាជីវកម្មមានបញ្ហានៅថ្ងៃក្រោយ។
ប្រតិបត្តិការពាណិជ្ជកម្មតាមប្រព័ន្ធអេឡិចត្រូនិកសំដៅដល់សកម្មភាពទិញ លក់ ជួល ផ្លាស់ប្តូរទំនិញ ឬសេវាកម្ម ដោយរាប់បញ្ចូលទាំងសកម្មភាពពាណិជ្ជកម្ម និងរដ្ឋប្បវេណីតាមប្រព័ន្ធអេឡិចត្រូនិក៕ LA