ភ្នំពេញៈ កម្ពុជារំពឹងនឹងប្រមូលចំណូលពន្ធគយ និងពន្ធដារបានជាង ៤,៥ ពាន់លានដុល្លារនៅក្នុងឆ្នាំ ២០២១ នេះ ខណៈកំណើនសេដ្ឋកិច្ចនឹងមានក្នុងរង្វង់ ៣ ភាគរយ។ នេះបើយោងតាមលោកនាយករដ្ឋមន្ត្រី ហ៊ុន សែន។ ថ្លែងក្នុងពិធីសម្ពោធដាក់ឱ្យប្រើប្រាស់អគាររដ្ឋបាលថ្មីនៃអគ្គនាយកដ្ឋានគយ និងរដ្ឋាករកម្ពុជា នាថ្ងៃទី ២៣ ខែធ្នូ លោកនាយករដ្ឋមន្ត្រី ហ៊ុន សែន បានលើកឡើងថា ជាមួយនឹងការបើកដំណើរការសកម្មភាពសេដ្ឋកិច្ចទូលំទូលាយឡើងវិញរបស់ប្រទេសកម្ពុជា ការប្រមូលចំណូលសារពើពន្ធរបស់រដ្ឋាភិបាលក្នុងឆ្នាំ ២០២១ នេះនឹងមានចំនួនជាង ៤ ៥០០ លានដុល្លារ ហើយកំណើនសេដ្ឋកិច្ចក៏ត្រូវបានព្យាករថានឹងកើនឡើងក្នុងរង្វង់ ៣ ភាគរយផងដែរ។
លោកបន្តថា សម្រាប់ចំណូលរបស់អគ្គនាយកដ្ឋានគយ និងរដ្ឋាករកម្ពុជា ក្នុងរយៈពេល ១១ ខែ ឆ្នាំ ២០២១ មានប្រមាណ ២ ០៥៥ លានដុល្លារ ស្មើ ៨៧ ភាគរយនៃផែនការ។ បើគិតពេញ ១ ឆ្នាំ ២០២១ អគ្គនាយកដ្ឋានគយ និងរដ្ឋាករកម្ពុជាអាចនឹងរកប្រាក់ចំណូលបានជាង ២ ២០០ លានដុល្លារ។ ដោយឡែកអគ្គនាយកដ្ឋានពន្ធដារក្នុងរយៈពេល ១១ ខែ ឆ្នាំនេះរកចំណូលបាន ២ ២៤៣ លានដុល្លារ ស្មើ ១១៤,១៣ ភាគរយនៃផែនការ។
លោកមានប្រសាសន៍ថា៖ «បើគិតចំណូលទាំងអគ្គនាយកដ្ឋានពន្ធដារ និងអគ្គនាយកដ្ឋានគយ យើងអាចមានទំហំទឹកប្រាក់ប្រមាណជាង ៤,៥ ពាន់លានដុល្លារ»។ លោកបន្ថែមថា៖ «ក្នុងឆ្នាំនេះផងដែរ តាមការរំពឹងទុករបស់យើង អត្រានៃកំណើនសេដ្ឋកិច្ចរបស់យើងប្រហែលជាជុំវិញ ៣ ភាគរយ ក្នុងពេលដែលឆ្នាំទៅយើងស្ថិតក្នុងរង្វង់ -៣,១ ភាគរយ»។
លោក ហ៊ុន សែន លើកឡើងទៀតថា ស្ថាប័នគយជាសេវាអធិបតេយ្យ និងជាចំណែកមួយនៃឯករាជភាពរបស់ប្រទេស ដូច្នេះការគ្រប់គ្រង និងអភិវឌ្ឍន៍ស្ថាប័នមួយនេះឱ្យរីកចម្រើន គឺពិតជាមានសារៈសំខាន់សម្រាប់ចំណូលរបស់ជាតិ។ កំណើនសេដ្ឋកិច្ចកំពុងចូលរួមចំណែកយ៉ាងច្រើនក្នុងការបង្កើនប្រាក់ចំណូលពន្ធកម្ពុជា។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុន្នីរ័ត្ន បានលើកឡើងថា ជាមួយនឹងការខិតខំអនុវត្តការងារប្រកបដោយស្មារតីទទួលខុសត្រូវខ្ពស់របស់អគ្គនាយកដ្ឋានគយ និងរដ្ឋាករកម្ពុជា ការប្រមូលចំណូលគយក្នុងឆ្នាំ ២០២១ នេះបានកើនឡើងគួរឱ្យកត់សម្គាល់បើធៀបនឹងឆ្នាំ ២០២០។ លោកបន្តថា ឆ្នាំ ២០១៩ គឺជាចំណុចកំពូលដែលការប្រមូលចំណូលពន្ធគយ ដោយមានទឹកប្រាក់ ៣ ២១៤ លានដុល្លារ។
លោកបន្ថែមថា ទោះយ៉ាងណាការរាតត្បាតនៃជំងឺកូវីដ-១៩ បានជះឥទ្ធិពលអវិជ្ជមានធ្ងន់ធ្ងរលើសេដ្ឋកិច្ចសកល រួមទាំងសេដ្ឋកិច្ចកម្ពុជា និងបានធ្វើឱ្យរង្គោះរង្គើយ៉ាងខ្លាំងដល់ខ្សែចង្វាក់ផ្គត់ផ្គង់ពាណិជ្ជកម្មអន្តរជាតិ។ កត្តានេះ បានធ្វើឱ្យចំណូលប្រមូលដោយអគ្គនាយកដ្ឋានគយ និងរដ្ឋាករកម្ពុជា ក្នុងឆ្នាំ ២០២០ ធ្លាក់ចុះគួរឱ្យកត់សម្គាល់៕ LA
វីដេអូ៖