ភ្នំពេញៈ រដ្ឋាភិបាលចិនបានសម្រេចអនុញ្ញាតឱ្យកម្ពុជាបន្តនាំចេញអង្ករទៅទីផ្សារខ្លួនក្នុងបរិមាណ ៤០ ម៉ឺនតោនសម្រាប់កូតានាំចេញឆ្នាំ ២០២២ ដែលចាប់ផ្តើមអនុវត្តចាប់ពីខែធ្នូឆ្នាំ ២០២១ នេះតទៅ បន្ទាប់ពីថ្នាក់ដឹកនាំនៃប្រទេសទាំង ២ បានឯកភាពគ្នាតាមរយៈកិច្ចប្រជុំអនឡាញកាលពីខែវិច្ឆិកាកន្លងមក។ នេះបើយោងតាមការលើកឡើងរបស់អ្នកនាំពាក្យក្រសួងពាណិជ្ជកម្ម។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍កាលពីថ្ងៃទី ២៣ ខែធ្នូថា រដ្ឋាភិបាលចិនបានសម្រេចបន្តការផ្តល់កូតានាំចេញអង្ករដល់កម្ពុជា ៤០ ម៉ឺនតោនសម្រាប់ឆ្នាំ ២០២២ បន្ទាប់ពីកូតាឆ្នាំចាស់ដែលមានចំនួនដូចគ្នានេះត្រូវបានបញ្ចប់កាលពីពេលថ្មីៗនេះ។
លោក សុវិជាតិ ថ្លែងថា៖ «ក្នុងឆ្នាំ ២០២០ គឺយើងទទួលបានកូតានាំចេញចំនួន ៤០ ម៉ឺនតោន ដែលគេអនុញ្ញាតឱ្យនាំចេញបានក្នុងរយៈពេល ១៧ ខែ។ ចំណែកឆ្នាំ ២០២១ នេះភាគីចិនបានយល់ព្រមផ្តល់លទ្ធភាពឱ្យយើងធ្វើការនាំចេញអង្ករ ៤០ ម៉ឺនតោនដូចឆ្នាំ ២០២០ ដែរ ដោយចាប់អនុវត្តពីខែធ្នូនេះតទៅសម្រាប់រយៈពេល ១៧ ខែបន្ទាប់ទៀត»។
បើយោងតាមលោក សុវិជាតិ សម្រាប់កូតា ៤០ ម៉ឺនតោនក្នុងរយៈពេល ១៧ ខែនេះ បើកម្ពុជាអាចមានលទ្ធភាពនាំចេញចប់មុនផែនការនោះភាគីចិននឹងអនុញ្ញាតឱ្យកូតាប្រមាណ ៥០ ម៉ឺនតោនបន្ថែមទៀត ដើម្បីធ្វើយ៉ាងណាជួយដល់ទីផ្សារនាំចេញអង្ករកម្ពុជាបន្ថែមទៀតចូលទីផ្សារចិន។
លោក សុង សារ៉ន ប្រធានសហព័ន្ធស្រូវអង្ករកម្ពុជា និងជាអគ្គនាយកក្រុមហ៊ុន Amru Rice(Cambodia) បានសាទរចំពោះកិច្ចព្រមព្រៀងថ្មីដែលកម្ពុជាទទួលបានចំពោះការនាំចេញអង្ករទៅទីផ្សារចិនដែលជាទីផ្សារដ៏មានសក្តានុពល។
លោកថ្លែងថា៖ «យើងសាទរចំពោះកិច្ចខិតខំប្រឹងប្រែងរបស់រដ្ឋាភិបាល ដើម្បីទទួលបាននូវអនុស្សរណៈនៃការយោគយល់គ្នាថ្មីស្របទៅតាមការប្តេជ្ញាចិត្តរបស់ភាគីចិនក្នុងការទិញអង្កររបស់កម្ពុជា។ ការណ៍នេះគឺជាដំណឹងល្អបំផុតសម្រាប់កម្ពុជាក្នុងការធ្វើពិពិធកម្មទំនិញទៅកាន់ទីផ្សារចិន»។
លោក ចាន់ សុឃាំង នាយកប្រតិបត្តិក្រុមហ៊ុន Signature of Asia Co., Ltd ក៏បានប្រាប់ថា ការសម្រេចបាននូវកិច្ចព្រមព្រៀងថ្មីជាមួយប្រទេសចិន គឺជាសមិទ្ធផលមួយទៀតដែលសហព័ន្ធស្រូវអង្ករបានធ្វើការរួមគ្នាជាមួយក្រុមហ៊ុន Green Trade របស់ក្រសួងពាណិជ្ជកម្មក្រោមការជួយត្រួសត្រាយផ្លូវរបស់លោករដ្ឋមន្ត្រីក្រសួងពាណិជ្ជកម្ម និងលោករដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុក្នុងការស្វែងរកចំណុចខ្វះខាតទាំងឡាយ ដើម្បីធ្វើយ៉ាងណាឱ្យកម្ពុជាអាចនាំចេញអង្ករបានកាន់តែច្រើន។
លោកនិយាយថា៖ «ក្នុងការចុះ MoU មានកថាខណ្ឌមួយបានចែងថា បើយើងសម្រេចបានការនាំចេញចំនួន ៤០ ម៉ឺនតោន គេនឹងផ្តល់ជូនបន្តទៀតនូវលទ្ធភាពនាំចេញចន្លោះពី ៤០-៥០ ម៉ឺនតោនបន្តទៀត»។
លោកប្រាប់ទៀតថា សម្រាប់ក្រុមហ៊ុនលោកក្នុងឆ្នាំ ២០២១ បាននាំចេញអង្ករបានប្រហែល ១,៧ ម៉ឺនតោន។
ទោះយ៉ាងណា លោក សុង សារ៉ន បានលើកឡើងនូវបញ្ហាប្រឈមមួយចំនួនទៀតពាក់ព័ន្ធទៅនឹងការដឹកជញ្ជូន ការសម្របសម្រួលទៅលើការទិញ លក់ ដែលត្រូវឱ្យភាគីចិន និងកម្ពុជាត្រូវធ្វើការជជែកគ្នា ដើម្បីឱ្យផែនការនៃការនាំចេញនេះអាចសម្រេចបានទៅតាមផែនការកំណត់ ឬអាចមុនរយៈពេលដែលបានកំណត់។
លោកបន្តថា សម្រាប់ការនាំចេញទៅទីផ្សារចិនបានកើនឡើងប្រមាណ ១២ ភាគរយក្នុងរយៈពេល ១១ ខែ ឆ្នាំ ២០២១ ដែលតំណាងឱ្យ ៥០ ភាគរយនៃការនាំចេញសរុបរបស់កម្ពុជា។
លោក ប៉ែន សុវិជាតិ បានឱ្យដឹងទៀតថា ថ្នាក់ដឹកនាំនៃភាគីចិន-កម្ពុជាបានធ្វើការដោះស្រាយរួចរាល់ហើយនូវបញ្ហាប្រឈមនានាដែលអ្នកនាំចេញបានជួបប្រទះកន្លងមក។
លោកប្រាប់ថា៖ «ខ្ញុំសង្កេតឃើញថាទីផ្សារអង្កររបស់យើងនៅប្រទេសចិន គឺទទួលបានការគាំទ្រខ្លាំងណាស់ ទោះបីជាកន្លងមកយើងមានបញ្ហាខ្លះពាក់ព័ន្ធការដឹកជញ្ជូនដោយសារកង្វះទូកុងតឺន័រ ប៉ុន្តែតាមរយៈកិច្ចប្រជុំរវាងថ្នាក់ដឹកនាំនៃប្រទេសទាំង ២ ឥឡូវបញ្ហានានា លែងចោទទៀតហើយ»។
របាយការណ៍ក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ចាប់ពីខែមករា ដល់ខែវិច្ឆិកា ឆ្នាំ ២០២១ កម្ពុជានាំចេញអង្ករសរុប ៥៣២ ១៧៩ តោន ថយចុះ ១១,៤៦ ភាគរយធៀបនឹងរយៈពេល ១១ ខែ ឆ្នាំ ២០២០ ដែលមានចំនួន ៦០១ ០៤៥ តោន។ ប្រាក់ទទួលពីការនាំចេញអង្ករមានចំនួន ៤៥៤ ៤៨០ ៨៦៦ ដុល្លារ៕ LA
វីដេអូ៖