សៀមរាបៈ អាជ្ញាធរខេត្តសៀមរាបនឹងរៀបចំព្រឹត្តិការណ៍ឆ្លងឆ្នាំសកល ២០២១-២០២២ ខាងមុខ រយៈពេល ៣ ថ្ងៃចាប់ពីថ្ងៃទី ៣០ ខែធ្នូ ឆ្នាំ ២០២១ ដល់ថ្ងៃទី ១ ខែមករា ឆ្នាំ ២០២២ នៅទីតាំងសំខាន់ៗចំនួន ២ គឺនៅសួនច្បារជិតព្រះរាជដំណាក់ក្រុងសៀមរាប និងនៅសហគមន៍ព្រៃឈើចង្ក្រានរយនៃស្រុកវារិន្ទ ដើម្បីស្វាគមន៍ភ្ញៀវទេសចរជាតិ និងអន្តរជាតិ។
លោក លី ប៊ុនរិទ្ធ អភិបាលរងខេត្តសៀមរាប ប្រាប់ភ្នំពេញប៉ុស្តិ៍នៅថ្ងៃទី ២៣ ខែធ្នូថា រដ្ឋបាលខេត្តនឹងរៀបចំព្រឹត្តិការណ៍ឆ្លងឆ្នាំសកល ២០២១-២០២២ ក្នុងគោលបំណង ដើម្បីបង្កលក្ខណៈសប្បាយរីករាយ ដោយមានរៀបចំព្រឹត្តិការណ៍ប្រគំតន្ត្រី ការតាំងពិព័រណ៍ ការដាក់តាំងលក់សម្ភារ និងទំនិញផ្សេងៗនៅពីមុខសួនច្បារចន្លោះពីសណ្ឋាគារអង្គរ និងព្រះរាជដំណាក់ ខណៈនៅថ្ងៃឆ្លងឆ្នាំសកល ក៏នឹងមានការបាញ់កាំជ្រួច ដើម្បីកំដរបរិយាកាសនៅពេលរាត្រីផងដែរ។
លោកថ្លែងថា៖ «ខ្ញុំចង់ជម្រាបជូនថា នៅក្នុងខេត្តសៀមរាប ពិសេសនៅក្រុងសៀមរាបនេះឯកឧត្តម អភិបាលខេត្ត និងអាជ្ញាធរ មូលដ្ឋាន បានរួមចំណែក ក្នុងការរៀបចំព្រឹត្តិការណ៍សំខាន់ៗបង្កលក្ខណៈសប្បាយរីករាយជូនដល់ប្រជាពលរដ្ឋក្នុងពិធីចូលឆ្នាំសកល ២០២១ និងឆ្នាំ ២០២២»។
លោក ប៊ុនរិទ្ធ រំពឹងថា ព្រឹត្តិការណ៍នេះនឹងទាក់ទាញភ្ញៀវទេសចរជាតិមកលេងកម្សាន្តច្រើន ប៉ុន្តែសម្រាប់ទេសចរបរទេសនឹងមិនមានច្រើនទេ បើទោះបីកម្ពុជាបើកឱ្យមានជើងហោះហើរក៏ដោយ ព្រោះភ្ញៀវទេសចរបរទេសនៅមានភាពភ័យខ្លាចពីមេរោគកូវីដបំប្លែងថ្មី «អូមីក្រុង»។
លោក ទៀ សីហា អភិបាលខេត្តសៀមរាបកាលពីថ្ងៃទី ២១ ខែធ្នូ ថ្លែងថា ដើម្បីបើកទំព័រថ្មីទទួលភ្ញៀវទេសចរជាតិ និងបរទេស ក្រោយពេលលោកនាយករដ្ឋមន្ត្រី ហ៊ុន សែន បានប្រកាសបញ្ចប់ព្រឹត្តិការណ៍សហគមន៍ ២០ កុម្ភៈ កាលពីថ្ងៃទី ២០ ខែធ្នូ កន្លងទៅថ្មីៗនេះ ខេត្តសៀមរាបនឹងរៀបចំព្រឹត្តិការណ៍ឆ្លងឆ្នាំសកល ដើម្បីរួមចំណែកក្នុងការជួយជំរុញ និងផ្សព្វផ្សាយពីសក្តានុពលរបស់ខេត្តសៀមរាបលើគ្រប់វិស័យ។ លោកបន្តថា ខេត្តសៀមរាបបាននិងកំពុងរៀបចំតុបតែងលម្អផ្លូវ ដើម្បីលើកកម្ពស់សោភណភាពក្រុងឱ្យកាន់តែស្រស់ត្រកាល ដោយបំពាក់ភ្លើងបំភ្លឺសាធារណៈ និងបំពាក់ភ្លើងសញ្ញាចរាចរណ៍ ព្រមទាំងរៀបចំតុបតែងសួនស្ពាន ព្រះរាជដំណាក់ ដើម្បីចូលរួមអបអរឆ្នាំថ្មី ឆ្នាំសកល ២០២២ ស្របពេលផ្លូវ ៣៨ ខ្សែគ្រោងនឹងបញ្ចប់តាមផែនការដែលបានគ្រោងទុក។
លោក ឌិន សុមេធារិទ្ធ ប្រធានសមាគមសណ្ឋាគារកម្ពុជាបាននិយាយថា ជារឿងធម្មតាចំពោះរាជធានីខេត្តដែលជាគោលដៅទេសចរណ៍ត្រូវតែរៀបចំកម្មវិធី ឬព្រឹត្តិការណ៍អ្វីមួយ ទើបមានភ្ញៀវទេសចរជាតិ និងអន្តរជាតិទៅលេងកម្សាន្ត។ ចំពោះខេត្តសៀមរាបរៀបចំព្រឹត្តិការណ៍ឆ្លងឆ្នាំនេះ គឺជាការល្អមួយកម្រិតទៀតសម្រាប់ភ្ញៀវទេសចរ។ លោកបន្តថា ការរៀបចំព្រឹត្តិការណ៍ឆ្លងឆ្នាំសកលនេះ នឹងទាក់ទាញភ្ញៀវទេសចរជាតិ និងអន្តរជាតិឱ្យដើរលេងកម្សាន្ត។ នៅពេលដែលមានភ្ញៀវទេសចរដើរលេងកម្សាន្ត ទើបធ្វើឱ្យមានចរន្តសេដ្ឋកិច្ចនៅក្នុងមូលដ្ឋានមានដំណើរការល្អ។
លោកថ្លែងថា៖ «ប្រជាពលរដ្ឋយើងមានស្ត្រេសទាក់ទងនឹងរឿងកូវីដ ខណៈឥឡូវស្រុកយើងមានភាពធូរស្បើយ ដូច្នេះខ្ញុំយល់ថា ម្នាក់ៗចង់ដើរ ហើយបើសៀមរាប រៀបចំកម្មវិធីអបអរសាទរបុណ្យចូលឆ្នាំសកលនេះ គឺជាពេលវេលាដ៏ល្អសម្រាប់ប្រជាពលរដ្ឋយើងដើរកម្សាន្ត»។
បើតាមលោក សុមេធារិទ្ធ ការរៀបចំព្រឹត្តិការណ៍ឆ្លងឆ្នាំសកលនេះនឹងរួមចំណែកធ្វើឱ្យមានតម្រូវការលើសេវាកម្មទេសចរណ៍កាន់តែកើនឡើងតាមរយៈសេវាកម្មចំណីអាហារ ស្នាក់នៅ និងកម្សាន្ត ដែលនឹងជះឥទ្ធិពលល្អសម្រាប់សេដ្ឋកិច្ចទេសចរណ៍នៅក្នុងមូលដ្ឋាននៅក្នុងខេត្តគោលដៅទេសចរណ៍មួយនេះ៕ LA
វីដេអូ៖