The Phnom Penh Post Search

Search form




Logo of Phnom Penh Post newspaper Phnom Penh Post - ​ការនាំចេញ​ទំនិញ​ទៅ​អាមេរិក​សម្រេចបាន​ជាង ៧,២​ ពាន់​លាន​ដុល្លារ​

​ការនាំចេញ​ទំនិញ​ទៅ​អាមេរិក​សម្រេចបាន​ជាង ៧,២​ ពាន់​លាន​ដុល្លារ​

Content image - Phnom Penh Post

​ការនាំចេញ​ទំនិញ​ទៅ​អាមេរិក​សម្រេចបាន​ជាង ៧,២​ ពាន់​លាន​ដុល្លារ​

​ភ្នំពេញៈ កម្ពុជា​ប្រមូលបាន​ប្រា​ក់ជាង ៧,២​ពាន់​លាន​ដុល្លារ​ពី​ការនាំចេញ​ទំនិញ​ទៅ​ទីផ្សារ​អាមេរិក នា​រយៈពេល ១០​ខែ​ឆ្នាំ​២០២១ កើនឡើង​ជាង ៣០​ភាគរយ​បើ​ធៀប​នឹង​រយៈពេល​ដូចគ្នា​ឆ្នាំ​២០២០​។ នេះ​បើ​យោងតាម​ទិន្នន័យ​ពី​ការិយាល័យ​ជំរឿន​អាមេរិក​។

​ទិន្នន័យ​បង្ហាញថា ចាប់ពី​ខែមករា ដល់​ខែតុលា ឆ្នាំ​២០២១ ការនាំ​ទំនិញ​ពី​កម្ពុជា​ទៅ​អាមេរិក មាន​ទឹកប្រាក់​សរុប ៧ ២២៤​លាន​ដុល្លារ កើន ៣០,៩៤​ភាគរយ​បើ​ធៀប​នឹង​រយៈពេល ១០​ខែ​ឆ្នាំ​២០២០ ដែលមាន​ចំនួន ៥ ៥១៦,៩​លាន​ដុល្លារ​។ ជាមួយគ្នានេះ​កម្ពុជា​ក៏បាន​នាំចូល​ទំនិញ​ពី​អាមេរិក​ក្នុង​ទឹកប្រាក់ ៣៤៦,៦​លាន​ដុល្លារ កើន ២៨,៣៧​ភាគរយ​ពី​ចំនួន ២៧០​លាន​ដុល្លារ​។​

​យោងតាម​តួលេខ​ខាងលើ ទំហំ​ទឹកប្រាក់​នៃ​ការផ្លាស់ប្តូរ​ពាណិជ្ជកម្ម​រវាង​ប្រទេស​ទាំង ២ រយៈពេល ១០​ខែ​ឆ្នាំ​២០២១ មាន​ចំនួន​សរុប ៧ ៥៧០,៦​លាន​ដុល្លារ កើនឡើង ៣០,៨២​ភាគរយ ពី​ចំនួន ៥ ៧៨៦,៩​លាន​ដុល្លារ កាលពី​រយៈពេល ១០​ខែ​ឆ្នាំ​២០២០​។

​សម្រាប់​ខែតុលា ឆ្នាំ​២០២១ ការនាំចេញ​របស់​កម្ពុ​ជា​ទៅ​អាមេរិក​មាន​ទឹកប្រាក់ ១ ០៤៨,២​លាន​ដុល្លារ កើនឡើង ៤៩,៣១​ភាគរយ ពី​ចំនួន ៧០២​លាន​ដុល្លារ​កាលពី​ខែតុលា​ឆ្នាំ​២០២០​។

​ផលិតផល​ដែល​កម្ពុជា​នាំទៅ​ទីផ្សារ​អាមេរិក ភាគច្រើន​ជា សម្លៀកបំពាក់ ស្បែកជើង ផលិតផល​ធ្វើដំណើរ កង់ និង​គ្រឿង​បង្គុំ​អគ្គិសនី​។ ដោយឡែក​ផលិតផល​ដែល​អាមេរិក​នាំមក​កម្ពុជា មានដូចជា រថយន្ត គ្រឿង​ម៉ាស៊ីន និង​ឧបករណ៍​អេឡិចត្រូនិក​។

​បើតាម​ក្រសួងពាណិជ្ជកម្ម ក្នុង​ឆ្នាំ​២០២០ អាមេរិក គឺជា​ទីផ្សារ​នាំចេញ​ទំនិញ​ធំ​បំផុត​របស់​កម្ពុជា តាម​ពីក្រោយ​ដោយ​ប្រទេស​ចិន ជប៉ុន ចក្រភព​អង់គ្លេស កាណាដា និង​ប្រទេស​កូរ៉េ​។

​ទំហំ​ពាណិជ្ជកម្ម​សរុប​រវាង​កម្ពុជា និង​អាមេរិក ក្នុង​ឆ្នាំ​២០២០ មានតម្លៃ​សរុប ៦ ៩២១,៣ លាន​ដុល្លារ ឡើង ១៧,៨៩​ភាគរយ​ធៀប​នឹង​ឆ្នាំ​២០១៩​។ ក្នុងនោះ​ការនាំចេញ​របស់​កម្ពុជា​មានតម្លៃ ៦ ៥៧៧,៧ លាន​ដុល្លារ កើន ២២,៧៩ ភាគរយ ចំណែក​ការនាំ​ពី​អាមេរិក​មក​កម្ពុ​ជាមាន​តម្លៃ ៣៤៣,៦ លាន​ដុល្លារ ធ្លាក់ ៣៣,១៥ ភាគរយ​ពី​ចំនួន ៥១៤ លាន​ដុល្លារ​។ នេះ​បើតាម​ការិយាល័យ​ពាណិជ្ជកម្ម​អាមេរិក​៕

វីដេអូ៖

អត្ថបទគួរចាប់អារម្មណ៍